2 SAMUEL 22 - Boy Lonana

Soolla vi David

¹ David ɓak Yawe kay boy ma hu soollana hu buu ma Yawe buɗum ay ki ko suu babali mamsina halaŋ halaŋ ki ko Sol layna.

² Nam di ana, Yawe ni ɦini manna, ni saɓak manna, ni sa ma buɗun kina.

³ Lona ni ɦinira an ŋgay tan hura, ni mbari manna, ɓagi man ma saɓakŋa, ɦoŋziin ma jivina, liin ma ŋgayra, saan ma suɗta, aŋ suɗun ki ko suu duurunna.

⁴ Gam deɓpa mamu. An yi Yawe aya. An hin ti kay suu babali mansina.

⁵ Semeɗ maɗna ɦeɓen ki kolo, babaa ma Beliyal paɗamma kafan kanu.

⁶ Dlara hu zul ŋgolla kura ŋguyun kiyo. Daw ma vi maɗnana ki kaŋga guni fokonu.

⁷ Hu hahaw manda an yi Yawe. An yi Loonna, ay hu ziimba nam humun delenu. Yiinda tew ha ki humumu.

⁸ Ndaŋgara iiriɗ njay ki dlaka u huulona ma dodona dlaka, njay ki hu li ma nam mbuɗ ki yarana.

⁹ Ndoosna sel ay ki cinimu. Kura ŋgalla kal ay ki funum u murus kura ŋgik ŋgikka.

¹⁰ Nam cuk sem ay ki kaŋga huulona u ɗugulla doɓorokka kaŋga u semu.

¹¹ Nam ful kay Serubim maa dew, pii tak tam ki duk semeɗna.

¹² Nam ŋgay tam ki duk li ma ndufunna, ki duk ɗugul mayra hin tok a si yona kaŋgara.

¹³ Kiɗikka li ki fokomu. Murus kura vi kolo may.

¹⁴ Yawe bay ay kolo huulona, ma Kolo Dayna tak delem aya.

¹⁵ Nam duurusi mbuurura ay kasi njayasi kiyo. Nam ka weleɗa, hin njayasi kiyo.

¹⁶ Voɗ mbo lum ma ŋgolna tak tam kiyo. Duliyara uɗta tin ayra tak ki kiɗik u bayra vi Yawera u semeɗ ma sel ay ki cinimma.

¹⁷ Ay kolo day ni nam sun ay tlan kiyo. Nam tlan ki duk mbo ŋgolna.

¹⁸ Nam buɗun ki ko saan ma babali ma saɓakŋa, ko suu babali suu saɓkasi suunna.

¹⁹ Hu buu man ma daɓpa asi hin duurunu. May Yawe mbuɗ tam ki a vaan ma gis tanna.

²⁰ Nam ɓaɗan kiyo, buɗun kiyo. Nam buɗun ki kay nam mininu.

²¹ Yawe lan jivira ni kay ɗegee manba. Nam lan jivira egenni kay kon ma ki mbusi teteɗna.

²² Kay ana an tuɗ hu voɗta vi Yawera, an mbuɗ tan ka ki co ii Loonnaɗi.

²³ Gaɗ mamba halaŋ ka fokonu. An ka ɦuɗ tan ki eg gaɗ mambaɗi.

²⁴ An li ay ɗegee u namu. An doo tan ay ki kay dla cora.

²⁵ Na ɗaŋŋi Yawe warakanni u ɗegee manda, u teteɗ manda nam waɗ u irimba.

²⁶ Aŋ ɗegee u sa ma ɗegeena. Aŋ jivi u sa ma saɓak ma jivina may.

²⁷ Aŋ teteɗ u sa teteɗna. Sa hurum cona aŋ mbuɗum ki va sanda.

²⁸ Suu gi yasi kaŋgana aŋ mbuɗusi suu saɓakŋa. Aŋ cuk iriŋŋi kay suu ŋga tasina.

²⁹ Aŋŋi pindil manda, Yawe. Yawe ɓoon li ma ndufunna ki egenu.

³⁰ An weɗ ki kay zulla ŋgolla ni uŋŋu. An weɗ ki kay gulumunna ni u Loonna.

³¹ U Lo namma voɗta ki ɗegee. Boy ma vi Yawena tak dlaamba kiyo. Nammi mbari ma vi suu min a ŋgay tasi egemma.

³² Lona ni ge ɗaŋge? Ni ka Yaweɗi su? Ҥinira ni ge ɗaŋge? Ni ka Looyginaɗi su?

³³ Lo namma ni liin ma saɓakŋa. Nam tuɗun hu voɗta ɗegeera.

³⁴ Nam mbuɗun sen ki ko ma vi dukkana na. Nam hinin coli kay li ma mbuyna.

³⁵ Nam haɗan kon a li duuna. Bikin gun gu mbuuru walakka kiyo.

³⁶ Aŋ ɦan mbari maŋ ma saɓakŋa, yal maŋŋa wulunu.

³⁷ Aŋ maɗan gayan ha ki a tuɗta. Kokoɗ sen ka daɓ eg vaɗi.

³⁸ An cuɗ u suu babali mansina, an hin bulumusi kiyo. An ka hoŋ ay jew bay an daɓasi kiɗi.

³⁹ An daɓasi kiyo, kiriɓisi kiyo. Asi ka col kolo oloɗi. Asi ki kaŋga puki u senu.

⁴⁰ Aŋ ɦan saɓakŋa a duuna. Aŋ homon suu li dla cora ki kaŋga unu.

⁴¹ Suu babali mansina ɦan zagaɗasiya. An kiriɓ suu babali mansina kiyo.

⁴² Asi yi kolo u delesi eŋga lay, sa njunusi kaɗi. Asi yi Yawe kolo u delesi eŋga lay, nam ka humusiɗi.

⁴³ An yursusi duk gugumma. An luɗusi kiyo. An tayasi ki kaŋga u senu, ko luɓu ma hu voɗtana na.

⁴⁴ Aŋ buɗun ki ko dla cora suu mansina landa egenda. Aŋ hinin ka kaki fok suuna. Suu an ka wasiɗina mbay lan sunda.

⁴⁵ Koyogina mbuɗ tasi ki banayanna. An dasi vunun na dew ni asi humun gaw.

⁴⁶ Koyogina mbuɗ ki ndaana. Asi sel ay ki hu liisi dlak ko ndaana.

⁴⁷ Yawe kak a fafaɗta. Gi deɓ maŋ ɦini manna. Ko Lona li furira, ɦini manna saɓakŋa.

⁴⁸ Lo namma saan sugulunni namu. Nam hoŋ yam suuna ki kaŋga unu.

⁴⁹ Aŋ tlan ay ki duk suu babali mansina. Aŋ mbuɗun a an li furira kay suu lan dla cora egenna. Aŋ buɗun ay ki ko suu ci maɗna.

⁵⁰ Olo, an gaŋ deɓ duk njaf suuna halaŋ, Yawe. An gi soolla furira u seŋu.

⁵¹ Nam ɦal saɓak ma ŋgolona maŋ mul mamma. Nam li dlara ɗegeera eg sa ma nam fuurumma, eg David u mul mamba a fafaɗta.