2 SAMUEL 21 - Boy Lonana

BOY MA DAŊŊA Suu Gabaonna u njaf suu vi Solna

¹ Mayra ndi hu cokira vi David basara na hindi. David joɓ Yawe. Yawe dam ana, «Dla ndaɗta ni kay Sol u ɦoŋzi ma ci maɗna kay ana nam ci suu Gabaonna kiyo.»

² Mulna yi suu Gabaonna ɓakasi boyna. Suu Gabaonna ka duk goryoŋ Israelna ɗi, may asi ni suu Amorna suu usi hin ka iirina. Gor suu Israelna ɦal tasi ha ki usi ni u suura. Na lay ni Sol u ɦalla ɦal tam ki maŋ goryoŋ Israelna u suu vi Yudana cocora hal a casi kiyo.

³ David ɓak ki maŋ suu Gabaonna ɗaŋŋi ana, «An hin lagi ni mege? An hin gi ii dla ndaɗta ni ana me a agi paɗ vunugi ki kay jo ma vi Yawena ge?»

⁴ Suu Gabaonna dam ana, «Ami dla doonora u lorra ka duk tami u Sol u suu varammaɗi. Ami ka hal a ci sa ki duk suu Israelnaɗi.» David di ana, «Lini agi ɓakŋi ana megelay ni an hin li dla ndaɗta.»

⁵ Asi di mulna ana, «Sa ma hal a cami kina, ma saa ki kam ana ami ki bulumi kay ndaŋgara halaŋi na.

⁶ Ko asi ɦami suu hu njafamma ay ki kiɗisiya ami ɦuɗusi ki fok Yawe hu Gibea ta vi Solla, sa ma Yawe manam kina.» Mulna di ana, «An hin ɦagisina.»

⁷ May mulna hin ŋgay Mefiboset ma goŋ Jonatan, ma goŋ Solna kiyo. Kay suura Yawe suu tam ka dukusira, duk ɦoŋ David u Jonatan ma goŋ Solna.

⁸ Mulna hin yow goryoŋ Rispa suu mbana ta goŋ Aya suu ndaɗ vuɗusi maŋ Solna, Armoni u Mefiboset u goryoŋ Mikal suu vadlna ta goŋ Solla ta ndaɗ vuɗuɗ maŋ Adriyel ma goŋ Barzilay ma Meholana.

⁹ Nam hin ɦasi ki ko suu Gabaonna. Asi ɦuɗusi ha ki kay ɦinira fok Yawe. Asi miɗ ki u dlasira kiɗisiyara halaŋ. Asi casi ki ni hu buu ma jew ma feɗ tlena, hu gijaŋ feɗ wa tlawna.

¹⁰ Rispa ta goŋ Ayara yow mbumbu bolna boɗom kay ɦinira ay hu gijaŋ feɗ tlena day ta ta yo ma ay kolo huulonana si ki kasiya. Ndaɗ ka hin layagi suu kolo huulonana a cuk kaŋga kasi faaliɗi. Mburi suu bagina lay ka mba hu njeŋgeɗi lay.

¹¹ Asi jok David kay dlara Rispa ta goŋ Ayara laɗta, ta banaŋ Solla.

¹² David mbay vaa sok Sol u ma vi Jonatan, gorommana, ki hu Galaad hu ɦoŋzi ma Yabesna. Suu asi kulusi ki hu li ma ki kiɗik ma Bet-Seanna hu li ma suu Filistinna ɓalasi ki huna, hu buu ma suu Filistinna ci Sol ki hu Giboana.

¹³ Nam yow ay hu li namma ni sok Sol u sok goromma Jonatan. Asi hin yow sok suu ɓalasi kina lay.

¹⁴ Asi tos sok Sol u sok goromma Jonatan hu mbassa vi Benjaminda hu Sela eg us bum, Kis. Asi li dlara mulna di kaɗta ki halaŋ. Ŋgoo dagan ɗaŋŋi Lona hin tak hurum ma jivina ki hu mbas ndaɗta.

Duu ma lam u suu Filistinna

¹⁵ Duu ma daŋŋa li duk ɦoŋ suu Filistinna u suu Isaelna olo. David u suu mam suu sunda tuɗ duu suu Filistinna. David gol tam ki loɓiya.

¹⁶ Isebi-Benob, ma hu njaf suu vi Harafa, ma vun ɓagii mamma nekem kelew hindi u nek walakka, min tam ki u ɓagi ma wilina wilina, ɓak ana nam ci David kiyo.

¹⁷ May Abisay ma goŋ Seruyana mbay njunum waɗ sa Filistinna cam kiyo. Ni hu li namma suu vi Davidna suu tasi ki dam ana, «Aŋ kal umi hu li ma duuna oloɗi, ka aŋ tew pindilla vi suu Israelna kiɗi.»

¹⁸ Ŋgoo dagan olo ni, duuna duu u suu Filistinna hu Gob. Ni hu li namma Sibkay ma Husana ci Saf kiyo, ma hu njafna vi Harafana.

¹⁹ Duuna duu u suu Filistinna hu Gob olo. Elanan ma goŋ Yari ma Betlehemma waɗ Goliyat ma Gat ma saɓ mamba nekeɗ ko ndal doroŋ ma vi suu cil barawnana na.

²⁰ Duuna duu hu Gat olo. Sa ma saɓakam su kasina gogor kom karkiya, gogor sem karkiya may taɓ halaŋ dok-mba' yam fiɗi. Nam tamba lay ni hu njafna vi Harafana.

²¹ Nam hal suu Israelna a yara. Yonatan ma goŋ Kammana wayaŋ Davidna cam kiyo.

²² Suu fiɗi asina ni hu njafna vi Harafana hu Gat. Asi hin cuk ki kaŋga ko waɗta vi David u suu mam suu sundana.