2 SAMUEL 20 - Boy Lonana

Seba mbuɗ yara ki eg David

¹ Ha hu li namma wanni sa ma sunum kaɗina ka huwa yam ana Seba ni goŋ Bikri ma Benjaminna. Nam bu tokolomma hin ɓak ana, «Ami va ka duk tami u Davidɗi. Ami ka ti jona u goŋ Jesenaɗi. Suu Israelna gegelay kaŋga hu mbutluɓ mamma.»

² Suu Israelna halaŋ hoŋŋa, hin David ki hinni tuɗ ki u Seba ma goŋ Bikrina. Na may suu vi Yudana hin kakira ni u sem mul masina ay fun lumma Yurdanna day ta ta Yerusalem.

³ David tuɗ ki vo varam hu Yerusalem. Mulna yow banayam boyogi suu doogo suu nam hinisi a gol u zinana hin cukusi ki hu zira goloɗ jivira. Nam ɦasi tlesuu tira may, ka tuɗ egesiɗi. Asi ki gira daŋgayna ta ta hu buu masi ma miɗna, ko ndal suu donora suu njufusi ki miɗɗina na.

Joab ci Amasa kiyo

⁴ Mulna di Amasa ana, «Yan suu vi Yudana ay halaŋ hu buu ma hindi wanna. Aŋ taŋga col ki tani may.»

⁵ Amasa tuɗ yi suu vi Yudana aya, may nam jak buu ma David ŋgaammana kiyo.

⁶ David di Abisay ana, «Cecem wanda Seba ma goŋ Bikrina hin lay dla cora egey su Absalom. Aŋ taŋga yow suu sun suu vi malaŋŋana, tuɗ cuɗ u Seba ka nam fi ɦoŋzi ma saɓakŋa ki jew a suɗ tam iriyɗi.»

⁷ Suu vi Joabma sel ki kay cee Abisay, suu Kretena, suu Peletena, suu saɓakŋa halaŋ. Asi sel ay ki hu Yerusalem a cuɗ u Seba ma goŋ Bikrina.

⁸ Asi tew ki eg gogoyra ŋgolla hu Gabaonda hu li ma Amasa ka mbay fokosina. Joab tam ki damira u baraw mamma, gam ɗikŋa ki kam u ŋgewna hurum kaliya, u furum njuni hu ziimu. Hu li ma nam kal kina, nam ndi ki kaŋgaa.

⁹ Joab di Amasa ana, «Aŋ ka jivi su, wayanna?» Joab kom ma njufna vi njee, Amasa a mboɗom hurumba.

¹⁰ Amasa wi ŋgew ma ko Joabma ka ki jiviɗi. Sa namma cokom hayam selem yoroɗom ki kaŋgaa. Nam miɗ ki ni bay Joab tew a cokom a yamba mbara. Joab asi u wayamma Abisay cuk tasi a cuɗ u Seba ma goŋ Bikrina.

Yara vi Sebara daɓ kiyo

¹¹ Goozoŋ ma vi Joab maa dew hin ka kakira eg Amasa na tok. Goozoŋŋa di ana, «Gegelay ma u Joabma, gegelay ma u Davidna nam gi tammi kay cee Joab.»

¹² Hu li namma wanni, Amasa bulum tam ka duk busuɗum hu voɗta, sana wi kam ana suuna halaŋ colla. Nam taɗ Amasa ki hu voɗta tuɗum duk bubura, cukum borogona kam hu li ma nam wi ana suu mbay egem tokŋa col ni na gaw gaw.

¹³ Hu li ma nam ɦuɗum ki keŋ voɗta ndena, suuna halaŋ jak kay cee Joab a cuɗ u Seba ma goŋ Bikrina.

¹⁴ Sa namma daɓ yam mbassa vi suu Israelnara halaŋ halaŋ ta ta tew ki hu Abel-Bet-Maaka, suu Berna halaŋ tok tasiya. Asi cuk tasi ki um lay.

¹⁵ Suu daŋŋa mbay buu ka kaŋga hu Abel-Bet-Maaka a duuna. Asi mol ndaŋgara kolo pay ɦoŋzi namma hin vun gulumunna ki kolo na tok. Suu ay u Joabma halaŋ to gulumunna a bowom ki kaŋgara.

¹⁶ Cara wi yal dlara ɦayra yi ay kolo u deleɗ eŋga hu ɦoŋzina ana, «Humugi haa, humugi haa. Halagi voɗta dagi Joab ana, ɦuɗ taŋ ay ta ta tani. An min a ɓakaŋ boyo.»

¹⁷ Joab ɦuɗ tam ha egeɗu. Cara dam ana, «Ni aŋ Joab su?» Nam hoŋ dira ana, «Ni anu.» Ndaɗ dam ana, «Hum boy ma vi saaŋ ma sunda haa.» Nam hoŋ dira ana, «An ka humma.»

¹⁸ Ndaɗ tuɗ fok u njaɗta ko wanda na, «Suuna jew day varaygi ni di ana, aygi tuɗ kaɓakŋa ay ni hu Abel, ni boyna ni daɓi gaw.

¹⁹ Anni dla mayra jivi su kira u dlara ki eg liiɗ su hu Israella. Aŋ may ni hal a ɓeŋ ɦoŋzina kiyo. Ni ɦoŋzi ma ŋgol ma hu Israelna. Aŋ min a to jo ma vi Yawena ki kaŋga ni kay mege?»

²⁰ Joab hoŋ dira di ana, «Dla cora, dla cora li kanu. Lini an ka tosoɗ ki kaŋga may ɓeŋeɗ ki may.

²¹ Ka ni kay boy nammaɗi. May sa ma ay kay ɦinira Efrayimba yam ana Seba ma goŋ Bikrina min tam a duu u mulna David. Gagina ha nam dew an hin tli li ma ŋgolna kiyo.» Cara di Joab ana, «Jiviya, asi hin gi kiŋŋa yam ha ki kay gulumunna.»

²² Cara jok suu li ɓakŋa u namma ki halaŋ. Asi ŋgaɗ yam Seba ma goŋ Bikrina. Asi hin gikiɗ ha ki maŋ Joab. Joab bu tokolomma. Asi yow ki kolo hin ɓorow kiyo gegelay tuɗ u mbutluɓ mamma. Joab may ni hoŋ ay Yerusalem eg mulna.

Sem suu ŋgolo suu sun suu vi Davidna

²³ Joab fi ŋgolla kay asgaa suu Israelna halaŋ. Benaya ma goŋ Yoyadana fi ŋgolla kay suu Kretena u suu Peletena.

²⁴ Adorammi sa ma kay sunda laɗ u eŋgana. Yosafat ma goŋ Ahiludna ni sa ma fun mulnana.

²⁵ Seva ni sa ma ɓii tlena, Sadok u Abiyatar ni muli suu li ɓivunna.

²⁶ Ira ma Yairna ay hu lay. Nammi mul ma li ɓivunna ay fok Davidna.