2 SAMUEL 2 - Boy Lonana

Tin David ki a mul ma Yudana hu Hebron

¹ Ŋgoo dagan dla ndaɗta David joɓ Yawe ana, «An ndak a tuɗ hu ɦoŋzi ma Yuda maa dew su?» Yawe dam ana, «Tuɗa.» David di ana, «An tuɗ ni hu li manage?» Yawe di ana, «Hu Hebron.»

² David hin tuɗ ko tam u boyogom ko ndaɗta na, Ahinoam ta Jizreella may, Abigal ta caŋ Nabal ma Karmelna may.

³ David hin yi suu u namma ha umu gegelay u suu mamsina, asi hin kak hu ɦoŋzi ma Hebronna.

⁴ Suu vi Yudana mbaya, asi hin fuu David a mulna kay zi ma Yudana. Asi mbay di David ana, «Suu vi Yabes ma Galaadna tos Sol ni asiya.»

⁵ David sun suu vun sunda eg suu vi Yabes ma Galaadna dasi ana, «Ko Yawe paɗ vunum ki kagiya, agi suu lagi sunda ɗegeera eg malagina, Sol, tosomma.

⁶ Cecem wanda Yawe lagi dlara jivira egegi u ɗegeera. An may ni hin lagi dlara jivira egegi u ɗegeera ni ko ndaɗta na may kay ana agi li dla ndaɗta ki jew ni agiya.

⁷ Cecem wanda ko kogi li saɓaki lagi ni suu saɓakŋa. Gasi malagina, Sol, miɗ ki wa, may agi wi ana suu hu zi ma Yudana fuurun a an li a mul masina.»

Isebaal tlam a mul ma Israelna

⁸ Abner ma goŋ Nerna, ŋgol asgaa ma vi Solna mbay u Isebaal, ma goŋ Solna, tuɗum ha ki hu Mahanaim.

⁹ Nam tin mulna kay Galaad, kay suu Aserna u suu Jizreelna ko ndal kay Efrayim, kay Benjamin, Israel u ŋgoloɗ halaŋga na.

¹⁰ Isebaal ma goŋ Solna mbuɗ a mulna kay Israel ni basaɗam tew ki ni dok-fiɗi. Nam ti mulla ni basara mba'. May ɦoŋzi ma Yudana tuɗ ni u David.

¹¹ Buu ma David buurum ay hu Hebron a mulna kay ɦoŋzi ma Yudana ni basara kiɗisiya u tilna karkiya.

Yara duk ɦoŋ Yuda u Israel hu Gabaonda

¹² Abner ma goŋ Nerna u suu li sunda vi Isebaal ma goŋ Solna busuk ay ki hu Mahanaim ii ko ma Gabaonna na.

¹³ Joab, ma goŋ Seruyana, u suu li sunda vi Davidna busuk ay ki may. Hu li ma asi ŋgaf tasi hu ɦuɗugumba Gabaonda may ni asi min tasi kak ka ii ko ma hiŋŋa may, ko ma hiŋŋa may.

¹⁴ Abner di Joab ana, «Gor njufiina col ay kolo mbay njogoɗ tasi fokoy ɗaŋ.» Joab di ana, «Asi yow koloo.»

¹⁵ Asi yow ki koloo. Asi hin ndumusi kiyo, doogo yam mba' maŋ Benjamin, maŋ Isebaal ma goŋ Solna, doogo yam mba' suu li sunda vi Davidna.

¹⁶ Gegelay ni kaw yam babali mamma komu, tin ŋgew mamma pay babali mamma asi puk kaŋga ko tasi jak. Li namma asi tinim sem ana, sene ma gogoyra. Nammi hu Gabaon.

¹⁷ Duuna li ki eŋ coco hu buu namma. Abner u suu Israelna suu sun suu vi Davidna casi kiyo.

¹⁸ Ay hu li namma ni goryoŋ Seruya suu hindina kaa, Joab, Abisay, Azael. Azael sem um feɗta ko ndal dukka bagi duk senenara na.

¹⁹ Azael gi tam kay cee Abner a dikim umba. Nam dikim um ka es ki keŋgi, kay bik njufɗi lay kay bik guluɗi lay.

²⁰ Abner pereɗ irim ay dagan di ana, «Ni aŋ Azael su?» Nam di ana, «Ni anu.»

²¹ Abner dam ana, «Es ki kay bik njuf ɗowba kay bik gulu, vi gogoo maa dew yowom tlegeyem ki maŋu.» May Azael ka min a es kiɗi, ka hin dikka dikim umbaɗi.

²² Abner hoŋ di Azael olo ana, «Ҥuɗ taŋ ha kiyo, hin dikka dikinda. An hin tuɗ puk ha ni ara na ga ɗaŋge? Na ni an ndak a gol ii wayaŋŋa Joab kolo suu?»

²³ May Azael ka min a ɦuɗ tam kiɗi. Na ɗaŋŋi Abner cokom kay hayam u gu saɓ mamba. Saɓpa laɗ ha ki ŋgorom dagani. Nam puk kaŋga miɗ hu li namma ni na gaw. Na ɗaŋŋi suu mbay hu li ma Azael miɗ huna col bel bel.

²⁴ Gi Joab u Abisay cuk tasi kay cee Abner a dikim umba. Faɗta ɗik ki na ni, asi tew ha ki Gibea-Ama ta ka u faɗ maɗii eg Giyara, hu voɗta hu fulla Gabaonda.

²⁵ Goryoŋ Benjaminna tok tasi kay cee Abner, taɓ ki ko tasi dew kolo kay yam ɦinira.

²⁶ Abner yi Joab ha kolo ana, «Na ni ŋgewna hin ka seŋ cira ci suuna duk ɗi su? Na ni aŋ hin a di suu maŋsina seŋ dikka dik u gorseginara ni ge?»

²⁷ Joab di ana, «U iirira vi Lonara, lini aŋ ɓak ka ginɗi ni suuna hin ka seŋ dikka dik u gorsesinara ki jew vin maɗiiɗi.»

²⁸ Joab bu tokolomma. Suuna halaŋ cola, seŋ dikka dik u gorsesi suu Israelnara, sa hin duu tam ka oloɗi.

²⁹ Abner u suu mamsina tuɗ hu ɦuɗugumba Yurdanda duk njeŋgera. Asi ɗiŋ lumma Yurdanna kiyo. Asi tuɗ ki hu li ma Bitronna halaŋtew ha ki hu Mahanaim.

³⁰ Hu li ma Joab seŋ dikka dik u Abnerra may ni, nam tok suuna eg tasi bel. Suu hum ka u yiraɗi duk suu sun suu vi Davidna ni suuna doogo yam dleeŋe u Azael may.

³¹ Suu sun suu vi Davidna ci suu vi Benjaminna ni 360 u suu vi Abnerna lay.

³² Asi tli maɗ Azael tuɗ tosom ha ki hu zulla vi bumba hu Betlehem. Joab u suu mamsina tuɗ duk njeŋgera ta ta lina fo na ni, asi tew ha ki hu Hebron.