2 SAMUEL 19 - Boy Lonana

David tii goromma

¹ Na ɗaŋŋi mulna dlaka. Nam ɗiŋ kolo hu zira kay vun grekŋara hin gijaŋ tiina. Nam ɓak ha u tuɗta ana, «Goronna, Absalom, goronna Absalom, an miɗ ki balamaŋ an na ɗowɗi amege? Absalom, goronna, goronna.»

² Asi ne yam Joab ana, «Gola mulna ka tiira.» Asi dam ana, nam ka yoo tam kay Absalom.

³ Saɓak ma hu buu nammana mbuɗ ki yoora kay suuna halaŋ kay suuna hum ɓakŋa hu buu namma ana, mulna hurum haɗ kay goromma cocoo.

⁴ Suuna hu buu namma kal vo hu ɦoŋzina u yoora ko ndal suu li dlara zolona hoŋ ay vo fun duunara na.

⁵ Mulna tamba may ni baɗ barawna ki kay irimu. Mulna yi kolo u delem eŋga ana, «Goronna, Absalom, Absalom, goronna.»

⁶ Joab mbay fi mulna kalafiya. Nam di ana, «Aŋ kuluɓ karam ii suu maŋ suu sunda suu suɗuŋ ki karamma ki u zolona goryoŋ suu njufiina u suu gorɓiina lay, boyogoŋ u banayaŋ suu boyogina lay.

⁷ Aŋ minni suu ka miniŋgina, aŋ noy suu miniŋŋa kiyo. Aŋ ɓak ki karam ana mulina u suu sunda aŋ ka wasi sunusiɗi. Jiviya, an wi karam ana lini Absalom ka iiri tuwa, ami ki miɗi karam halaŋ may ni aŋ gol dla ndaɗta iriŋŋi jiviya.

⁸ Cecem wanda, col kolo tuɗ ɓak suu maŋ suu sunda, kay ana an suu tan ki u Yawe, lini aŋ tuɗ ka huɗi ni, sa hin ka kak u aŋ karam njeŋgeɗi, ni dla co ndaɗta hin li ni su dla cora hahawra faŋ ay u goo taŋ day ta ta ceminira.»

⁹ Na ɗaŋŋi mulna col kolo hin tuɗ kak vun grekŋa. Asi hin ɓak ha kolo maŋ suuna halaŋ ana, «Gologi mulna kak ka ki vun grekŋa.» Suuna halaŋ mbay fok mulna. Suu Israelna liŋ kiyo, gegelay hu mbutluɓ mamma.

Asi yi David ana nam hoŋ hu Yerusalem

¹⁰ Hu deera vi suu Israelnara halaŋŋi suuna halaŋ ci wayra. Asi di ana, «Mulna ɓaɗaygi ay ki ko suu babali maygisina. Nam buɗuygi ay ki ko suu Filistinna. Cecem wanda nam pii ki hu mbassa a suɗ ki ko Absalomba.

¹¹ Absalom may ni aygi suu fuurum a nam li a mul mayginana, nam miɗ ha ki fun duuna. Agi juɓ cemi ni me a hoŋ mulna ayra ge?»

¹² Mulna David u saa mamba may ɗaŋŋi sun di suu li ɓivunna Sadok u Abiyatar ana, «Ɓakagi suu basi suu hu Yudana. Agi dasi ana, ni kay me agi hin ki suu daganna a hoŋ mulna ay vo varamba ni ge, na ɗaŋŋi dlara suu Israelna daɗta halaŋ tew ki eg mulna vo varambi su?

¹³ Agi ni gorsenna. Agi ni sokon u tliwinu. Ni kay me agi hin ki suu daganna a hoŋ mulna ayra ni ge?

¹⁴ Agi hin di Amasa ana, aŋ ka ni sokon u tliwinɗi su? Ko Lona li dlara wanda ura hiŋga oloɗi, lini aŋ varak Joab ka a ŋgolla vi asgaa manna a fafaɗtaɗi.»

¹⁵ David hoŋ saara vi suu vi Yudanara ki ko dlaŋ sa dewnara na. Asi sun di mulna ana, «Hoŋ aya, aŋ u suu maŋ suu sunda halaŋ.»

David suɗ Simey kiyo

¹⁶ Mulna hoŋ ay ɗaŋŋi hin tew ki fun lumma Yurdanna. Yuda mba ki hu Gilgal a ŋgaf fok mulna a ɗiŋ mulna ki hu lumma Yurdanna.

¹⁷ Simey ma goŋ Gera ma hu njafna vi Benjaminna hu Bahurimma ɓaɗ tam a hoŋ u suu vi Yudana a ŋgaf vok mulna David.

¹⁸ Suu vi Benjaminna ay um buɓ u Siba ma mbaɓuna hu ziŋ Solna u goryom suu doogo yam vadlna u suu mam suu sun suu dok-bana may. Asi ni suu ɓaɗ tasi a sel kaŋga hu lumma Yurdanna fok mulnana.

¹⁹ Hu li ma lumba ka ɗiŋ tlesuu vi mulnana kina, li u dlara nam hurum hin vaɗta. Simey ma goŋ Gerana gi tam kaŋgaa u sem mulna hu li ma nam ka ɗiŋ lumma Yurdanna kina.

²⁰ Di mulna ana, «Ko malanna ŋgaan co ndaɗta kanɗi. Tin humuŋ kay cora saaŋ ma sunda laɗ hu buu ma malanna mulna col ay ki hu Yerusalemma. Ko mulna vi boy namma hurumbi.

²¹ Kay saaŋ ma sunda wi ana, an li suluku. May karam an mba ki fok jew suu vi Yosefna a hoŋ ŋgaf vok malanna, mulnara.»

²² Abisay ma goŋ Seruyana kal duk hin di ana, «Ni dlara gasira hin ka ci Simey kiɗi kaɗta su, na ɗaŋŋi nam gi vunna kay sa Lona fuurummana ni ge?»

²³ David di ana, «Va ma duk ɦoŋon u agina ni mege, goryoŋ Seruyana a agi lagi dlara karam egen ko ndal sa ma kaboyna eg suunana na ni ge? Na ni aygi ndak a ci sana ki karam duk suu Israelna su? An ka ni gasi mul ma Israelnaɗi su?»

²⁴ Mulna di Simey ana, «Aŋ ka miɗɗi.» Mulna hin suu tam ki fokomu.

David taɓ dukusi u Mefiboset

²⁵ Mefiboset ma goŋ Solna hoŋ a ŋgaf mulna. Nam gol tam ha ka ki jivi kay sembi lay, kay njeera funumbaɗi lay. Nam mbus barawi mamsina ka kiɗi, col ay hu buu ma mulna tuɗ kina day ta ta hu buu ma nam hoŋ ay u tamba va lam kaɗina.

²⁶ Doli ɗini hu li ma nam tew ha ki hu Yerusalem a ŋgaf vok mulnana, mulna dam ana, «Aŋ tuɗ ka u anɗi ni kay mege, Mefiboset?»

²⁷ Nam di ana, «Malanna mulna, saan ma sunda ganan yanu kay saaŋ ma sunda ɓak tam ana, an tuɗ ɗag tlena kay goo kor manna, ful kam a tuɗ u mulna, kay ana saaŋ ma sunda ki daliya.

²⁸ Nam kaboyna ha kay saaŋ ma sunda eg malanna mulna. Na may malanna mulna ni ko sa sunda huulona vi Lona na. Li dlara iriŋ jivira ɗaŋ.

²⁹ Gasi daŋ may ko malanna, mulna, suu hu ziŋ bunna ni suu a ci ki ciina, hu li namma aŋ hin gi saaŋ ma sunda ki duk suu ti kay tabulla u aŋŋa. Na ni voɗta ka kan olo su? Va ma an hin joɓom ko mulnana ni mege?»

³⁰ Mulna dam ana, «Ɓakŋi boy me fiyekka na ologe? An ɓak ana, aŋ u Siba agi hin ɓorowogi ndaŋgara duk tagiya.»

³¹ Mefiboset di mulna ana, «Nam ka tli ŋgol lina ni namu, hu li ma malanna, mulna, hoŋŋi vo varam va lam kaɗina.»

David warak Barzilay

³² Barzilay ma Galaadna hoŋ ay hu Rogelim. Nam ɗiŋ lumma ki ko tam u mulna. Nam hin hinim ka fun lumma Yurdanna.

³³ Barzilay ki maa cocoo, basaɗam ki dok-kalavandi. Nam ni sa ma njun u mulna hu li ma nam ŋgay tam ha ki hu Mahanaimma, kay ana Barzilay ni sa ŋgolna.

³⁴ Mulna di Barzilay ana, «Aŋ jak u anu, an hin njun uŋ ha egen hu Yerusalem.»

³⁵ Brazilay di mulna ana, «Basaɗan ta kak iirira hin ni ga a an tuɗ u mulna Yerusalemmi ge?

³⁶ Basaɗan ki karammi dok-kalavandi. Na ni an ndak a ɓorow ii dlara jivira ki ura cora su? Na ni saaŋ ma sunda ndak a wi jivi tlesuu nam tasina u suu nam casina su? Na ni an ndak a hum del gorzoŋŋina u gorɓii suu gi soolla su? Ni kay me a saaŋ ma sunda hin li a nekka kay malanna mulna ologe?

³⁷ Va ma jivina ni ana lini saaŋ ma sunda ndak a ɗiŋ lumma Yurdanna ki u mulna. Ni kay me mulna ɦan warak namma ki na ɗaŋge?

³⁸ Ҥal voɗta maŋ saaŋ ma sunda hoŋ dagani, a an tuɗ miɗ ha hu ɦoŋzi manna eg us bun u sunu. Gola, saaŋ ma sunda, Kimham, wanna. Ko nam jak ko tam u malanna mulna hin lam dlara hurum miniɗta egemu.»

³⁹ Mulna di ana, «Ko Kimham jak u anu, an hin lam dlara huruŋ miniɗta egemu, dlara aŋ min a joɓoɗ egenda an hin laŋga.»

⁴⁰ Suuna halaŋ ɗiŋ lum ma Yurdanna kiyo. Mulna ɗiŋ ki lay. Mulna hin mboɗ Barzillay hurum hin paɗ vunum ki kamu. Nam hin hoŋ ki vo varamu.

Honira duk ɦoŋ suu vi Yudana u suu Israelna

⁴¹ Mulna jak tin irim ha Gilgal na Kimham jak u namu. Suu vi Yudana halaŋ nus suu Israelna may, ɗiŋ mulna kiyo.

⁴² Asi tew ha ki eg mulna may ni suu Israelna ɓak mulna ana, «Ni kay me, gorsemina, suu vi Yudana tok tasi ay a ɗiŋ lum ma Yurdanna ki maŋ mulna u suu mamsina may, suu vi Davidna ka egem ca may ni ge?»

⁴³ Suu vi Yudana halaŋ hoŋ di suu Israelna ana, «Ni kay ana mulna somora u ami tok. Agi ɓeŋ hurugi ki kay boy namma ni kay mege? Ami ti va ma col ay ko mulnana ki su? Asi hinimi va maa ka su?»

⁴⁴ Suu Israelna hoŋ di suu vi Yudana ana, «Ami voɗta kami eg mulna suuŋ na doogo, kay David lay. Ni kay me agi ɦami ŋgara ka na ndeɗi ge? Ami ka ni suu ɓak ki jew ana ami hin hoŋ mulna aya naɗi su?» Na may boy ma suu vi Yudana damma eŋ su ma vi suu Israelna.