2 SAMUEL 18 - Boy Lonana

Cira ci suu duu suu vi Absalomma kira

¹ David tok suu ay u namma eg tasi hin tinisi suu ŋgolo suu fokosina kay suuna buɓ buɓ may, kis kis may.

² David hin ɦal voɗta maŋ suuna a tuɗta, ɓorowosi irisi ki duk hindi. Ҥal maŋ Joab, tli nus ma ki ɓorowi duk hindi maa dew, ɦal maŋ Abisay ma goŋ Seruyana, wayaŋ Joabma, tli nus ma ki ɓorowi duk hindi ma hin dewna ɦam ki maŋ Itay ma Gatna. Mulna di suuna ana, «An tanda min a kal ki u agi lay.»

³ Suuna di ana, «Aŋ ka kal kiɗi. Lini gasi daŋ may aygi liŋ wa ni, sa hin ka saa kaygiɗi. Lini nus suu dukuygina miɗ ki lay ni sa hin ka saa kaygiɗi, cecem wanda ni kay suu 10,000 ko aygi nana. A jivira ɗaŋŋi aŋ hal yal ma njunumi ay hu ɦoŋzina dayna.»

⁴ Mulna dasi ana, «An hin li dlara hurugi furiyuɗta.» Mulna col fun grekŋa na tok hu li ma suuna sel ay ki u tasi kis kis may, buɓ buɓ mayna.

⁵ Mulna gaɗ Joab, Abisay, u Itay ana, «U ŋgara agi ŋgaanda lagi u goo zoŋŋa Absalom na lam lam.» Suuna halaŋ hum vun mulna a gaɗ suu ŋgolo suu fokosina kay Absalom.

⁶ Suuna sel ki duk bubura, tuɗ ŋgaf suu Israelna, duuna hin li duk gura Efrayimba.

⁷ Hu li namma ni suu sunda vi David ci suu Israelna kiyo. Suuna viɗ ki hu buu namma cocoo, 20.000.

⁸ Duuna nja kom ha ki kay yam mbassa halaŋ. Hu buu namma ni suuna miɗ ki duk gura coco, su cira casi u ŋgewnara.

Joab ci Absalom kiyo

⁹ Absalom ndi ki duk suu sun suu vi Davidna kafasi kamu. Koro Makka mamma kal kaŋga u gogor ko gu ma ŋgol ma ɗufi ɦayna. Yam Absalom hak kolo hum guna. Nam hin viriw duk ɦoŋ ndaŋgara u huulona hu li ma koro Makka ma umma jak ki hu li ma daŋŋa.

¹⁰ Sana dew wam wi ni, hin mbay di Joab ana, «An wi Absalom ki haki kolo hum ŋgusna.»

¹¹ Joab di sa ma jokom dlarana ana, «Aŋ wam ay ko ndaɗta naɗi su? May aŋ hin waɗam cam ha ka ki hu li namma gawɗi ni amege? An hin ɦaŋ gin gursu sikle doogo u ɗikŋa mayɗi su?»

¹² Sana di Joab ana, «Lini an kaw gin gursu sikle ma buɓ namma kon lay ni an hin ka tin kon eg goŋ mulnanaɗi. Kay ana ami hum gaɗta mulna gaɗaŋga ki ni u humumiya, Abisay may, Itay may ana, lagi jiviya ka sa ŋgen kom eg goozoŋŋa, Absalombi.

¹³ Wanda lay ni lini an lam ginni dla cora eg iiri mamba ni, mulna va jak kambi, aŋ taŋga lay ni hin li ka ki ni coli keŋe.»

¹⁴ Joab di ana, «An hin ka juɓ fokoŋ ko wanda naɗi.» Nam yow ɓagiina kom hindi, ɓalam kay mugul Absalom ma gin iiri tu duk hum ŋgusnana.

¹⁵ Gor zoŋŋina doogo olo suu tuɗ fok Joabma ŋguy ki kay Absalom, waɗam, cam kiyo.

¹⁶ Joab bu tokolomma. Asi suuna hin seŋ dikka dik u suu Israelna kay ana Joab vi ya suuna kaŋgaa.

¹⁷ Asi tli Absalom hin gam ha ki duk gura hu zul ŋgolla. Asi hin mol gogoyra kam ŋgolla na ɓiw. Suu Israelna halaŋ gegelay liŋŋi tin irim hu mbutluɓ mamma.

¹⁸ Doli ɗini Absalom hu li ma nam iiri tuna mol gogoyra hu ɦuɗugumba vi mulnara ni namu, kay nam ɓak tam ana, «Goron ma yan sen dagan kaɗi.» Nam yi sem kay gogoy ndaɗta. Asi yaɗ karam gak ana gogoyra us Absalomba.

David hum dla maɗ Absalom

¹⁹ Ahimaas ma goŋ Sadokŋa di ana, «Ҥan voɗta an liŋ di boy ma jivina maŋ mulna ana Yawe kaam ɓak mamma, taɗam ay ki ko suu babali mamsina.»

²⁰ Joab dam ana, «Aŋ hin ka li a sa ma di boy ma jivi hu buu ma wannaɗi. Aŋ hin di boy namma ni hu buu ma daŋi, may karam gaw ni aŋ ka di boy ma jiviɗi kay ana ni maɗ goŋ mulnana.»

²¹ Joab di sa ma Kusna ana, «Tuɗ jok dlara aŋ waɗta maŋ mulna.» Sa ma Kusna goɓ kaŋga fok Joab, hin gi tam liŋŋa.

²² Ahimaas ma goŋ Sadokŋa di Joab olo ana, «Boy kaɗi, ɦan voɗta an tanda liŋ kay cee sa ma Kusna.» Joab di ana, «Ka jivi a aŋ taŋga goronna liŋgi, boy ma jivi ma aŋ a fi va ay fun kaɗi may nige?»

²³ «Boy kaɗi. Ҥan voɗta, an hin liŋa.» Nam dam ana, «Liŋa.» Ahimaas tli voɗta fun lum ma Yurdannara u liŋŋa jak kay sa ma Kusna.

²⁴ David kak ki duk ɦoŋ vun grek ma mbana. Sa ma dleɓpa tuɗ poy kay yam zira vun grekŋara eg gulumunnara. Nam tli irim koloo ni wi sana liŋ ay kay tam dew.

²⁵ Sa ma dleɓpa yi ay kolo u delem eŋga a jok mulnara. Mulna di ana, «Nam liŋ ay ni kay tam dew ni boy ma jivina ay ka a damba.» Sa namma ka ɦuɗ tam ay gaw gaw may.

²⁶ Sa ma dleɓpa wi sa daŋŋa liŋ aya. Nam yi ha kolo u delem eŋga maŋ sa vun grekŋana ana, «Gola sana ka liŋ ay kay tam dew.» Mulna di ana «Sa namma lay ni mbay ni u boy ma jivina.»

²⁷ Sa ma dleɓpa di ana, «An wi liŋ ma vi sa ma mbay jewna. Ni liŋ ma vi Ahimaas ma goŋ Sadokŋa.» Mulna di ana, «Ni sa ma jivina. Nam mbay ni u boy ma jivi ɦayna.»

²⁸ Ahimaas yi ay kolo u delem eŋga di mulna ana, «Dlara ka tuɗ jiviya.» Nam goɓ kaŋga u vogom duk ndaŋgara fok mulna di ana, «Gi deɓpa maŋ Yawe, Looŋŋa, ma ɦal suu min tasi gin a duu u malanna mulnana.»

²⁹ Mulna di ana, «Goozoŋŋa, Absalom, ka ki jiviɗi su?» Ahimaas di ana, «An wi ana asi ka njogoɗ tasi coco hu li ma Joab sun saaŋ ma sunda ayna, may ni kay me kala an wiɗi.»

³⁰ Mulna di ana, «Ҥuɗ taŋ ha kiyo, col ha ki tana na.» Nam ɦuɗ tam ha ki hin kak ha ki tana.

³¹ Sa ma Kusna hin mba ɗaŋ. Sa ma Kusna di ana, «Ko malanna mulna hum boy ma jivina haa, Yawe kaɓakŋa karam taɗaŋ ay ki ko suu babali maŋsina halaŋ halaŋ.»

³² Mulna di sa ma Kusna ana, «Na ni goozoŋŋa, Absalom, ka jivi wan su?» Sa ma Kusna hoŋ dira ana, «Ko suu babali suu vi malanna, mulna, suu min mbaaŋ ay kaŋŋa wi dlaŋ goozoŋ nammara ni asiya.»