2 SAMUEL 17 - Boy Lonana

Husay min gaɗta vi Ahitofella kaɗi

¹ Ahitofel di Absalom ana, «Hinin an man suu duuna 12,000 tuɗ cuɗ u David duk njeŋgera wanda gaw.

² An hin tew ha ki egemmi hu li ma nam saɓakam ka oloɗina. An hin mbuɗum ki ndaana. Suu mamsina halaŋ hin liŋa. An hin vi mulna hu li ma nam hin kay tam dewna.

³ Ko ndaɗta na ni, an hin hoŋ suuna ay egeŋ halaŋ. A vi sa ma aŋ halamma ni jivira suuna hoŋ ay halaŋga. Suuna halaŋ hin kak u heɓpa.»

⁴ Dla ndaɗta jivi ii Absalom u suu basi suu Israelna halaŋ.

⁵ Absalom di ana, «Yi Husay ma Arkŋa ay ɗaŋ a ami hum dlara nam tamba min gin a daɗta may.»

⁶ Husay tuɗ eg Absalom. Absalom dam ana, «Gola, ni dlara Ahitofel daɗta. Aygi ndak li dlara nam daɗta su? Li ka naɗi ni aŋ ɓak u taŋga.»

⁷ Husay hoŋ di Absalom ana, «Gaɗta Ahitofel ɦaɗ cecem wanda ka jiviɗi may da.»

⁸ Husay di olo ana, «Aŋ taŋga wi buŋ u suu mamsina. Asi ni suu saɓakŋa. Asi yara ni ko ndal ŋguu ma viɗ goromma ki duk buburana. Buŋŋi sa duuna. Nam kak njeŋge ko tam u suunaɗi.

⁹ Gola, cecemmi nam ka ki ŋgay hu zul taa ɗowba ka ki hu li ma daŋŋi. Doli ɗini hu li ma nam gijaŋŋa a ci suuna ay duk suu mamsina wa ni, sa hin humma hin di ana, suu tuɗ kay cee Absalomma viɗ ki cocoo.

¹⁰ Na ɗaŋŋi lini sa ma hurum ɦiŋ ko ndal dlona nana ka lay ni hin mbuɗ ki ndaana kay ana suu Israelna wi ana buŋŋi sa saɓakŋa, suu umma ni suu ɦiŋŋa.

¹¹ Gola, ni gaɗta an ɦaŋga, ko suu Israelna halaŋ tok tasi egeŋu, suu hu Danna u suu hu Bersebana, u bolowosi ko ndal ŋgetl ma fun lummana na, aŋ taŋga tuɗ fokosi a duuna.

¹² Aygi hin famu li ni nam ka ni aragelay. Aygi hin moloygi taygi kam ko ndal mbaɗagira gi kay ndaŋgara na. Kam nam lay kay suu umma lay, sa hin ka hin dewɗi.

¹³ Lini nam kal hu ɦoŋzi maari a tok tasira ni, suu Israelna halaŋ hin yow zewna mbaam ay maŋ ɦoŋzi namma. Aygi hin taɗam u wa ta ta hu lum ma ɓaɗ ɦayna li ni gogoy ka hurum na dewɗi lay.»

¹⁴ Absalom u suu Israelna halaŋ di ana, «Gaɗta vi Husay ma Arkŋa jivi su gaɗta vi Ahitofella.» Gasi daŋ may, Yawe vi kam a bulum gaɗta vi Ahitofel ta jivi sura a mba dla cora ay kay Absalom.

David ɗiŋ lumma Yurdanna kiyo

¹⁵ Husay di suu li ɓivunna Sadok u Abiyatar ana, «Gola ni dlara Ahitofel gaɗ Absalom u suu basi suu Israelna u ndaɗta. Gola ni dlara an ɦal gaɗta u ndaɗta.

¹⁶ Cecem wanda ɗaŋŋi gagi vun sunda zak, dagi David. Agi dam ana, aŋ col duk njeŋgera duk bubura hu fullaraɗi, a jivira ni aŋ jak ay kiyo, li ka naɗi ni asi u suu umma halaŋ ni ko ndal va ma mulna gam funum yam dewna na.»

¹⁷ Jonatan u Ahimaas col ki hu Ein-Rogel. Cara sunda ndak a tuɗ dasiya. Asi tasira ndak a tuɗ di mulna David kay ana asi ka ndak a tak tasi ki u kalla kal hu ɦoŋzinaraɗi.

¹⁸ Na may goozoŋ maa dew wasi hin di Absalom. Jonatan u Ahimas tuɗ u dlasira jakka zak gaw ni, tew ha ki hu ziŋ sa ma Bahurimma. Nam gi goloŋga hu taraŋ mamba. Asi sel kaŋga huruɗu.

¹⁹ Cara yow barawna boɗom ki fun goloŋga. Ndaɗ hin waa ii wana ki hurumu. Sa hin wi ka na ndeɗi.

²⁰ Suu sunda vi Absalom sel ha vo vi ca ndaɗta hu zira hin di ana, «Ahimaas u Jonatanni arage?» Cara dasi ana, «Asi ɗiŋ lumma ki wa.» Asi halla, fi sa kaɗi. Asi hin hoŋ hu Yerusalem.

²¹ Ŋgoo dagan asi tuɗ ki may ni suu hiŋŋa ɗiŋ ay ki kolo hu goloŋga hin tuɗ di mulna David. Asi di David ana, «Gagi tagi hu voɗta, ɗiŋigi lumma ki zak kay ana gola ni gaɗta Ahitofel ɦaɗ kagira.»

²² David gi tam voɗ u suu ay u namma asi hin ɗiŋ lumma Yurdanna kiyo. Maɗiira fo ki na ni asi halaŋ ɗiŋ lumma Yurdanna ki wa, sa hin ka ki dewɗi.

²³ Hu li ma Ahitofel wi ana sa ka li u gaɗ mambaɗi ni, nam ɗag tlena kay kor mamba, gi tam tuɗ vo varam hu ɦoŋzi mamma. Nam ɦal gaɗta maŋ suu varamma may ni, hin cuk delem ki zewna. Ŋgoo miɗ mamma asi tosom hu zulla vi bumba.

David ki hu Mahanaim

²⁴ David tew ki hu Mahanaim hu li ma Absalom ɗiŋ lumma Yurdanna kina, nam u suu Israelna um halaŋ.

²⁵ Fok suu asgaana Absalom tin Amasa balam Joab. Doli ɗini Amasa ni goŋ sa ma yam ana Yita ma Israelna, ma ɗum Abigal ta goŋ Nahas wayaŋ Seruyara su Joab.

²⁶ Suu Israelna u Absalom min kaŋ masina hu mbassa Galaadta.

²⁷ Hu li ma David tew ha ki hu Mahanaim may ni, Sobi ma goŋ Nahasna, ay hu Rabba duk goryoŋ Amonna, Makir ma goŋ Amiyelna ay hu Lo-Debar, Barzilay ma Galaadna ay hu Rogelim,

²⁸ yow tlesuu buuna mbaasi aya, tlimiɗ tlesuu cilina, ŋgoɗogi suu ti tlena, u wa blena, u fuɗta u ii wa ma hawina, lit gaɗaŋŋa u lit leremba,

²⁹ mbul yumma, mbul mbiira, tliw timigiina u mbutlugina asi yowosi ay a tina maŋ David u suu ay u namma kay asi ɓak tasi ana, «Suuna wi hawra ko mayra ɦay, ko loɓma u laara hu fulla.»