2 SAMUEL 16 - Boy Lonana

David u Siba

¹ David jak ki kay lewɗekka na nde ni hu li ma Siba, mbaɓu ma vi Mefibosetna, mbay a ŋgafamba u korra um mba' u tlena kaɗ ɗagiya. Mappana kaɗ kis kis mba', des vuɗ gugutlura sooyra kis may, vuɗ tlesuu hu til nammana kis may, mbumbu sum veŋŋa dew may.

² Mulna di Siba ana, «Va koŋ wanna ni mege?» Siba hoŋ dira ana, «Korra hin njun suu vi mulnana a fulla, mappana u vuɗ tlena ni ti ma vi gorzoŋŋinana, sum veŋŋa ni va ma cira maŋ suu voɗta hu fullara loɓosi kina.»

³ Mulna di ana, «May goŋ malaŋŋana ni arage?» Siba hoŋ di mulna ana, «Jiviya, nam hin ha ki Yerusalem kay nam ɓak tam ana karam suu Israelna min a ɦan mulla vi bunda kiyo.»

⁴ Mulna ɓak Siba ana, «Tlesuu vi Mefibosetna halaŋ ki ni maŋu.» Siba di ana, «An ki kaŋga goɓi wanni. Lan jivira egen na lige, malanna mulna.»

Simey gi vunna maŋ David

⁵ Mulna David tew ki hu Bahurim hu li ma sana dew kal ay kina. Nammi hu deera vi Solla, sem ana Simey. Nammi goŋ Gerana. Hu kalla nam kal ay kira ni nam gi vunna ni na gaw.

⁶ Nam duu David u gogoyra, suuna halaŋ lay. Suu saɓakŋa kay bikimmba njufna lay, bikimma guluna lay.

⁷ Gola ni dlara Simey daɗ hu givun mammara, «Gi taŋu, gi taŋu, sa sunum kaɗi ma ci maɗna.

⁸ Yawe vooŋ busu ma vi suu hu ziŋ Solna kaŋ halaŋ. Nam sa ma aŋ varak mulna balamamma. Yawe ɦal mulla ki ko goroŋŋa Absalom, gola aŋ ki hu hahawra may, kay ana aŋŋi sa busuna.»

⁹ Abisay ma goŋ Seruyana di mulna ana, «Ni kay me di ma mayra camma gi vunna maŋ malanna mulna nige? Hinin an jak kaam yam kiyo.»

¹⁰ Mulna di ana, «Va duk ɦoŋoy u aŋŋa ni mege aŋ goŋ Seruyana? Lini nam gi vunna wa, Yawe hoŋom dira wa ana, tuɗ gi vunna maŋ David, nam hin dam ana, aŋ li dla ndaɗta na ni kay mege?»

¹¹ David di Abisay, di suu mam suu li sunda halaŋ ana, «Lini goron ma kal ay ki egenna min a can kiyo, ni nam ma Benjaminna ma daɓ daganna ni, hinim nam gi vunna, lini Yawe dam ay na.

¹² Kala, Yawe hin wan hahaw manda ay, hin ɦan jivira ay kala, balam givun mamma karamma.»

¹³ David tuɗ ha fok hu voɗta u suu mamsina hu li ma Simey ka tuɗ pay ɦinira may egem tok, tuɗ fok u gira givunna may, duurum u gogoyra may. Nam li gugumma kolo may.

¹⁴ Mulna u suu umma halaŋ mbay ni ki loɓiya. Hu li namma asi hin fi saɓakasiya.

Husay taɓ ki u Absalom

¹⁵ Absalom u suu duu suu Israelna halaŋ mba ki hu Yerusalem. Ahitofel ay um may.

¹⁶ Hu li ma Husay ma Arkŋa ma banaŋ Davidna mbay eg Absalom, Husay di Absalom ana, «Kak a fafaɗta, Mulna, kak a fafaɗta, Mulna.»

¹⁷ Absalom di Husay ana, «Ni ɗegee maŋga aŋ laɗ eg banaŋŋara ɗaŋ su? Aŋ tuɗ ka u banaŋŋaɗi ni kay mege?»

¹⁸ Husay di Absalom ana, «Ҥawaa, sa ma Yawe manam u suuna halaŋ, suu Israelna halaŋ layna, an hin hin tanni mamu, hin kakŋi u namu.

¹⁹ A mbara, sa an hin sunumma ni gege? Ka ni gorommaɗi su? Ko an lay ni li ay li sunda fok buŋu, an hin laŋ sunda ni na lay.»

Absalom u banayaŋ David suu boyogina

²⁰ Absalom di Ahitofel ana, «Njaɗagi duk tagi kay dlara aygi hin laɗta.»

²¹ Ahitofel di Absalom ana, «Tuɗ ha eg banayaŋ buŋ su boyogi suu nam hinisi ha a gol u zinana. Na ni suu Israelna halaŋ hin wi ana aŋ mbuɗ ka hum vun buŋ oloɗi ni, suu uŋŋa halaŋ kosi hin mbuɗ ki saɓakŋa.»

²² Asi min mbutluɓma maŋ Absalom kolo kay yam zira dudurna. Absalom tuɗ eg banayaŋ bum suu boyogina ii suu Israelna halaŋ.

²³ Gaɗta Ahitofel ɦaɗ hu li nammara ni ko boy Lonana na. Gaɗta vi Ahitofella halaŋŋi ko ndaɗta na jivi kay David lay, kay Absalom lay.