2 SAMUEL 15 - Boy Lonana

Absalom hal voɗta a mbuɗ mulna

¹ Ŋgoo dagan dla ndaɗta Absalom hin gus pupusna u kulumina, suuna dok-vadl liŋ fokom may.

² Absalom col ki kolo maɗii col ni, hin col keŋ voɗta vun grekŋara. Tew tew hu li ma sa ma u dlara ɓakŋa kom min a tuɗ vi mulna a nam gamba iriɗna, Absalom yam hin dam ana, «Aŋ col ay ni hu ɦoŋzi maanage?» Nam di ana, «Saaŋ ma sunda col ay ni hu ɦoŋzi ma vi njaf suu Israelna maa dew.»

³ Na ɗaŋŋi Absalom hin dam ana, «Tuɗa, dlaaŋga jivi ɗegee may sa humuŋ vunuŋ fok mulna kaɗi.»

⁴ Absalom di ana, «A, a an li ginni sa kaɓakŋa hu mbas ndaɗta na ni suu dlara ɓakŋa kosi a gaɗ iriɗna hin mbay ni egen halaŋ halaŋ an hin gasira iriɗ ni anɗi su?»

⁵ Hu li ma sana ɦuɗ tam ha a goɓ kaŋga fokomba, nam maɗ kom ha na ni, vam mboɗom hurumu.

⁶ Absalom li dlara ko ndaɗta na eg suu Israel suu tuɗ vi mulna a gi ii dlaasira halaŋ halaŋ. Absalom vi vun suu Israelna ki um halaŋ.

⁷ Doli ɗini tew basara fiɗira a daɓ kira ni, Absalom di mulna ana, «Ҥan voɗta an tuɗ Hebron a li dlara an vi vunun ki kaɗ u Yawera.

⁸ Kay ana saaŋ ma sunda vi vunum ay hu li ma nam ay hu Gesur hu Sirina. Nam di ana, lini Yawe hoŋon ay hu Yerusalem wa ni, an hin sun Yawe.»

⁹ Mulna dam ana, «Tuɗ u heɓpa.» Nam gi tam hu voɗta ɗaŋŋi hin tuɗ Hebron.

¹⁰ Absalom gi sun suu mamsina ki duk njaf suu Israelna halaŋ dasi ana, «Hu li ma agi hum del tokolom wani agi ndak di ana Absalom mbuɗ ni mul ma Hebronna.»

¹¹ Suu Yerusalemma kis kis mba' tuɗ u Absalom a tinimba. Suu yasina lay ni tuɗ ni dla ka kasiɗi. Asi wi u dla ndaɗta ka na ndeɗi.

¹² Hu li ma Absalom li ɓivunna na ni, nam sun hal Ahitofel ma Gilona, sa ma ɦal gaɗta maŋ Davidna hu ɦoŋzi ma Gilona. Suu di ŋgeŋŋa maŋ Absalomma mbuɗ bolowra, dlaamba mbuɗ ŋgolla na ɗow ɗow may.

David pii ki hu Yerusalem

¹³ Sa ndendeŋŋa mbay di David ana, «Suu Israelna hurusi pereɗ ki u Absalom wa.»

¹⁴ David di suu mam suu sun suu ka u nam Yerusalemma halaŋ ana, «Liŋiygi zak, piiriygiya, kay ana Absalom hin ka hiniygi a keŋ zinaɗi. Tuɗuygi zak zak kaɗi ni nam hin li ay zakŋi faygi duku, laygi dla cora egeygiya, hin ci suu hu ɦoŋzinana ki u ŋgewna.»

¹⁵ Suu li sunda vi mulnana di mulna ana, «Dlara malanna mulna ŋgaɓaɗta li ni taragelay ni suu mam suu li sunda varamma ni hu may.»

¹⁶ Mulna kal ay ki u sem ko tam u suu varamma halaŋ, may mulna hin boyogi suu banayam suu ka doogo a gol u zina.

¹⁷ Mulna kal ay ki ni u sem ko tam u suuna halaŋ. Asi hin col fun zira daɓ daganda.

¹⁸ Suu li sunda varamma mbay egem halaŋ, suu Kretena halaŋ, suu Peletena halaŋ. Suu Gatna halaŋ, suuna kis kis karkiya col ay hu Gat mbay um jak fok mulna.

¹⁹ Mulna di Itay ma Gatna ana, «Aŋ min a tuɗ u ami may ni kay mege? Hoŋ dagan tuɗ kak u mul ma hiŋŋa kay ana aŋŋi koyna, aŋŋi sa mbee ay ki hu mbas maŋgana lay.

²⁰ Aŋ mba ni kaari, karam an hin gaŋ umi na gaw, an tuɗ ni koyra dayra may ɗaŋŋi ge? Hoŋ dagani, yow gorseŋŋa uŋu. Ɗegeera u heɓpa li u agiya.»

²¹ Itay ɓak mulna dam ana, «U iirira vi Yawera, u iirira vi malanna mulnara, li ma malanna mulna tuɗ huna halaŋ, hu li ma maɗna lay, hu li ma kak iirina lay, saaŋ ma sunda hin li ni hu may.»

²² David di Itay ana, «Tuɗa, jaka.» Itay ma Gatna jak u suu mamsina u goryosi suu gorina.

²³ Suu hu mbassana halaŋ tii u simina irisi ŋgolla. Suuna halaŋ hin jaka. Mulna ɗiŋ lum ma Sedron ma ɓaɗ ɦayna. Suuna halaŋ hin jak ki hu voɗta tli hu fullara.

²⁴ Sadok ay huwa. Suu li ɓivunna halaŋ tli Zanduka Galamba vi Lonara kasiya. Abiyatar kal hu li ma ɓivunna ta ta suu sel ay ki hu ɦoŋzinana jak ki halaŋ tuwa.

²⁵ Mulna di Sadok ana, «Hoŋ Zanduk Lonara ha ki hu ɦoŋzina. Li ni Yawe u an jiviya ni nam hin hoŋon aya, hin ɦan voɗta a an waɗ olo, u ziim lay.

²⁶ May lini nam di wa ana, an ka miniŋ boy maŋŋa oloɗi ni jivira ni nam lan dlara hurum vaɗta egenu.»

²⁷ Mulna di mul ma li ɓivunna, Sadok, ana, «Aŋ wi su? Hoŋ u heɓpa hu ɦoŋzina. Goroŋŋa Ahimaas u Jonatan ma goŋ Abiyatarna, goryogi suu mbana u agiya.

²⁸ Gologiya, an hin vi yan nde a jak hu fullara ta ta vunugi mal dan dla tuwa.»

²⁹ Sadok u Abiyatar hin hoŋ Zanduk Lonara ha hu Yerusalem ɗaŋ, asi hin kak ha hu may.

David sun Husay dleɓ Absalom

³⁰ David ɗiŋ ha ni hu li ma mbuy ma ɦinira conora. Nam ɗiŋ ha u tiina. Nam dluɓ yam ki u barawna. Nam tuɗ ni sem siiliya. Suu tuɗ um a tinimma halaŋ dluɓ yasi kiyo. Asi ɗiŋa, ɗiŋ ha u tiina.

³¹ Asi mbay di David ana, «Ahitofel ka duk suu vi vunusi ki u Absalomma.» David di ana, «An ceneŋu, Yawe bulum gaɗta vi Ahitofella kiyo.»

³² David tew ha ki kolo vun lewɗekka hu li ma asi goɓ kaŋga fok Lona huna. Hu li ma Husay ma Arkŋa mbay a ŋgafam huna, baraw mamma fiyekŋa ki hari may, yam ki u ndaŋgara kufuruk may.

³³ David dam ana, «Li ni aŋ jak u an wa ni nekeŋ hin li ni kanu.

³⁴ May lini aŋ hoŋ hu ɦoŋzina wa hin di Absalom wa ana, an hin li ni saaŋ ma laŋ sunda mulna, an li ay jew day ni sa ma li sunda vi buŋŋa, jiviya cecem wanda anni saaŋ ma li sunda. Na ɗaŋŋi aŋ pereɗ ii gaɗta vi Ahitofella ki manu.

³⁵ Na ni suu li ɓivunna gi Sadok u Abiyatar hin ka li ha egeŋ tokgi su? Dlara aŋ humuɗ ay hu ziŋ mulnara halaŋŋi aŋ hin mbaaɗ ay maŋ Sadok u Abiyatar suu li ɓivunnaɗi su?

³⁶ Goryosi suu mbana ha ka egesi tana tok, Ahimaas ma vi Sadokŋa may, Jonatan ma vi Abiyatarna may. Agi hin jokon dlara agi humuɗ ndaɗta ay funusi halaŋ.»

³⁷ Husay ma banaŋ Davidna hoŋ hu ɦoŋzina hu li ma Absalom kal hu Yerusalemma.