2 SAMUEL 14 - Boy Lonana

¹ Joab ma goŋ Seruyana hum ana mulna hurum haɗ kay Absalom.

² Nam sun hal cara mbeleŋŋa ɦayra ay hu Tekoa ɗaŋŋi hin daɗ ana, «Mbuɗ tak ki ko ndak li ni hahaw na, cuk baraw ma doona egeku, li mbul ma hisna egekgi, li ko cara li doo sa miɗ ki day dayna.

³ Ndak hin tuɗ fi mulna ɗaŋŋi ɓakam ko ndal wanda na.» Joab hin ɓakaɗ dlara ndaɗ hin daɗta.

⁴ Cara Tekoara ɓak mulna ɗaŋ. Ndaɗ gi taɗ kaŋga vokoɗ kay ndaŋgara, goɓ kaŋga hin di ana, «Mbay njununu, mul manna.»

⁵ Mulna daɗ ana, «Va lakŋa ni mege?» Ndaɗ dam ana, «Ҥii an ki donoo. Njufun miɗ kiyo.

⁶ Caaŋga sunda goryoɗ koɗ mba'. Asi u dlasira mbara li yara duk tasi ki bagiya. Sa ka a hoosi kiɗi. Maa dukusi dew ni waɗ wayamma, cam kiyo.

⁷ Na ɗaŋŋi njaf suuna halaŋ yow duuna u caaŋga sunda. Asi di ana, duuruygi wayaygina. Aygi hin cam ki kay iirira vi wayamma ta nam caɗ kira. Aygi hin bulum sa ma a yow gin jonana ki ni na gaw. Asi hin tew murus kura hin gin konda kiyo, ka hin njaf njufun ma yam sem kay ndaŋgaraɗi.»

⁸ Mulna di cara ana, «Tuɗ voo. An hin ɦal voɗta ha kay dlaakka.»

⁹ Cara Tekoara di mulna ana, «Cora ni kanu, malanna mulna, kay suu varanna lay. Mulna u mul mamba dla ka kasiɗi.»

¹⁰ Mulna di ana, «Sa ma hin ɓakak dla ndaɗtana ndak hin mbaaram aya, nam hin ka dog vunum a panak oloɗi.»

¹¹ Ndaɗ di ana, «Ko mulna yi sem Yawe, Looŋŋa, huwa kay a sa sasugulna ɦuɗ kom fok a kiriɓ suuna hin can goronna kiɗi.» Nam di ana, «U iirira vi Yawera tlimiɗ yam gorokŋa na dew lay ni hin ka viɗ ki kay ndaŋgaraɗi.»

¹² Cara di ana, «Ҥal voɗta maŋ caaŋga sunda ndaɗ di vunuɗ maŋ malaɗna, mulna na dew.» Nam di ana, «Ɓaka.»

¹³ Cara di ana, «Ni kay me aŋ li dlara ko ndaɗta nara ka u huu suu vi Lonanaɗi ɗaŋge? U dlara mulna li daɗta ni nam vi tam hu dlara kay nam hoŋ sa ma nam dikim kina ay kaɗi.

¹⁴ Gasi aygi hin miɗ ko ndal yo ma vooy kaŋga kay ndaŋgarana na, sa hin ka hoŋom gora koloɗina na, na may Lona hurum ka min dla ndaɗtaɗi. Nam tin saaram ki ana sa ma dikim kina li ha ki egem di ki na dayɗi.

¹⁵ Cecem wanda ɗaŋŋi lini an mbay ni a di malanna mulna dlara an li daɗ ayra ni kay ana suuna mbuɗun ki ndaana. Caaŋga sunda ɓak taɗ ana, tuɗuygi ɓak mulna. Kala mulna hin li dlara mbaɓu mamba hin dambara kala.

¹⁶ Lini mulna vi kam a ɓaɗ mbaɓu mamba ay ki ko sa ma min a bulumun ki hu jona vi Lona ki ko tammi u goronna na.

¹⁷ Caaŋga sunda ɓak taɗ ana, na ni boy ma vi malanna ndak njun un a heɓen hurun su? Kay ana malanna mulna ni ko sa sunda huulona vi Lona na. Nam hum dla cora ura jivira lay. Ko Yawe, Looŋŋa, li u aŋu.»

¹⁸ Mulna hoŋ di cara ana, «Lini an joɓoku ni ndak ŋgayan va konɗi.» Cara di ana, «Ko malanna mulna ɓak ɗow.»

¹⁹ Mulna di ana, «Joab takak voɗta u kom hu dla ndaɗta halaŋŋi nam su?» Cara hoŋom dira ana, «U iiri maŋga malanna, mulna, sa hin ka tuɗ kay bik njuf lay kay bik gulu lay u dlara malanna mulna daɗta. Gasi, ni saaŋ ma sunda, Joab, ɦan voɗta ni namu. Nam tak dlara maŋ caaŋga sunda ndaɗta ni nam lay.

²⁰ Saaŋ ma sunda Joab li dla ndaɗta ni kay a hoŋ ii dlara ayra may malanna yal coco, yalna ko sa sunda huulona vi Lona na. Nam wi dlara li kay ndaŋgarara halaŋ.»

²¹ Mulna di Joab ana, «Liya. Dlara iriɗ gi wa. Tuɗa, hoŋ gogoona Absalom aya.»

²² Joab gi tam kaŋga u vogom kay ndaŋgara goɓ kaŋga gi deɓ mulna. Joab di ana, «An saaŋ ma sunda. An wi karam ana an fi dlara jivira egeŋ wa, malanna mulna kay ana mulna li ni dlara saaŋ ma sunda dambara.»

²³ Joab gi tam hu voɗta hin tuɗ Gesur. Nam hin hoŋ Absalom ay Yerusalem.

²⁴ Mulna di ana, «Ko nam tuɗ ha ki varamu, ko nam mba tak tam irinɗi.» Absalom tuɗ ha ki varam hin tak tam ka ii mulnaɗi.

David taɓ dukusi u Absalom

²⁵ Duk suu Israelna halaŋŋi sa jiv ko Absalom na kaɗi lay, sa suuna golom ko nam na kaɗi, col ha kaŋga kay sem day faɗ ha ki kay yam na ni ŋgul ka egembi.

²⁶ Nam wel yammi hu basara tew tew hu li ma tlimiɗ yam mbuɗ kam nekka ɦayna. Hu li ma nam wel yam kina asi tlam nek tlimiɗ yamu, kelew mba' u nus, ni u nek mulna.

²⁷ Absalom vuɗ gor njufiina hindi, vuɗ go tamara dew yaɗ ana Tamar. Ca ndaɗta jivi cocoo.

²⁸ Absalom kak hu Yerusalem basara mba' bay tak tam ii mulna.

²⁹ Absalom sun kay Joab halam ay a sunum vo vi mulna, may nam min ka mbay varambi. Nam sun sa vun sunda a mbara, may nam ka mbaɗi.

³⁰ Nam di suu mam suu sunda ɗaŋŋi ana, «Agi gologi sene ma vi Joabma, tok eg ziin wanna, ma wana hurumma, tuɗugi gam kura kiyo.» Suu sunda vi Absalom gi kura ki eg sene namma ɗaŋ.

³¹ Na ɗaŋŋi Joab tuɗ fi Absalom vo varam hin dam ana, «Ni kay me suu maŋ suu sunda gan kura ki eg sene manna nige?»

³² Absalom di Joab ana, «Ni kay ana an sun ha halaŋ ana aŋ mbay an a sunuŋ di mulna ana an hoŋ ay ki hu Gesur ni kay mege? Mariyaɗ ni an kak gin ha hu tuwa. Cecem wanda an hin fi voɗta a tak tan ki ii mulna, lini dla co ka egenu ni nam can kiyo.»

³³ Joab tuɗ eg mulna vam u dlara lira kiyo. Mulna yi Absalom aya. Nam mbay egem hin goɓ kaŋga vogom duk ndaŋgara fok mulna. Na ɗaŋŋi mulna mboɗ Absalom hurumu.