2 SAMUEL 13 - Boy Lonana

Amnon u Tamar

¹ Gola ni dlara hin mba ŋgoo daganda. Absalom ma goŋ Davidna wayam taa dew ni jivi coco ɦay yaɗ ana Tamar. Amnon ma goŋ Davidna, hurum tin kaɗu.

² Amnon mbuɗ tam ki tuguɗiira u saara kay wayamba Tamar kay ana ndaɗ buu ka u sa njuf tuɗi. Amnon ana li ni laɗ dla egeɗ wa ni ko li ni dlara mbuɗ mbuɗ irim na.

³ Amnon banamma dew sem ana Yonadab, nammi goŋ Kamma, wayaŋ Davidna. Yonadab ni sa ma wi dlara cocona.

⁴ Nam dam ana, «Goŋ mulnana aŋ mbuɗ ki hahawra maɗii na tew tew ni kay mege? Aŋ ka min a danɗi ni kay mege?» Amnon dam ana, «Tamar ta wayaŋ wayanna Absalomba hurun tinni kaɗu.»

⁵ Yonadab dam ana, «Buu kaŋga kay lay maŋŋa, vi taŋ ki tuguɗiira. Hu li ma buŋ hin mbay a goloŋga wa ni, aŋ hin dam ana, Ҥal voɗta ay maŋ wayanda, Tamar, ndaɗ mbay ɦan tina. Ndaɗ mbay li ti namma ni irinu. Ndaɗ hin tlanna ay ni ndaɗ taɗta, an hin tamu.»

⁶ Amnon buu kaŋga vi tam ki tuguɗiira. Mulna mbay a golomu. Amnon di mulna ana, «Ҥal voɗta ay maŋ wayanda Tamar ndaɗ mbay gan komnjodina kaŋga irin tani na mba', ndaɗ ɦanna ay an hin tamu.»

⁷ David sun kay Tamar daɗ ha vo varaɗ ana, «Tuɗ vo vi wayakŋa Amnon, lam tina.»

⁸ Tamar tuɗ vo vi wayaɗna Amnon. Nam ki kaŋga buuriya. Ndaɗ tli fuɗta koɗta ni ɦuɓuruɗu, gi komnjodina kaŋga irimu, hin zalamu.

⁹ Ndaɗ tli tassana ay koɗ u nam tani hin cukumma kaŋga fokomu, may nam min ka a tambi. Amnon di ana, «Selegi suuna ha ki kiɗik halaŋ halaŋ.» Suu li ay egemma halaŋ sel kiyo.

¹⁰ Amnon di Tamar ana, «Tli tina ay kalafi hu zira mbay ɦanna, an hin tamu.» Tamar tli komnjoɗi ma ndaɗ gamma ay tani, mbay u nam hu zira, ɦam maŋ wayaɗna Amnon.

¹¹ Ndaɗ mbaamma ay a nam tamba. Nam vaɗ hin daɗ ana, «Mbay buu u anu, wayanda.»

¹² Ndaɗ dam ana, «Ҥawaa, wayanna, aŋ ɓeŋen kiɗi, kay ana dlara nara ka li vi suu Israelnaɗi. Aŋ li dlara co ndaɗta naɗi.

¹³ An hin tin yanni ara u zolo manna ɗaŋge? Aŋ may ni hin li duk suu Israelna ni a sa cona. Di mulna ɗaŋŋi nam hin ka dooroŋ a aŋ ɗumundaɗi.»

¹⁴ May nam min ka a humuɗɗi. Nam su kaɗ, ɦeɓeɗ buu u ndaɗu.

¹⁵ Amnon gijaŋ dikiɗ ki u eŋga. Gasi noyra nam noyoɗ kira ki ŋgol su minda nam miniɗta. Amnon daɗ ana, «Col kolo, tuɗa.»

¹⁶ Ndaɗ dam ana, «Ҥawaa, dikka dikinda ni cora ŋgol su mayra aŋ landa egen ki wanda.» May nam ka min a humuɗɗi.

¹⁷ Nam yi gogoo mam ma sunda dam ana, «Dik go tama ndaɗta ki vo varanu, duk vun goŋga ki ŋgoroɗ dagan gaw.»

¹⁸ Ndaɗ cuk barawra fiyekka bikŋa egeɗu kay ana gorɓii suu vi mulna suu bay buu u njufiina tuna baraw masina ni na. Sa sunda vi Amnonna dikiɗ ay ki duk vun goŋga ŋgoroɗ dagan gaw.

¹⁹ Tamar yow buɗna, cukum kay yaɗu, haa baraw maɗ mayra fiyek ta bikŋa kiyo, hew koɗ kay yaɗ, tuɗ u tiina.

²⁰ Wayaɗna Absalom daɗ ana, «Na ni wayakŋa Amnon buu u ndak su? Cecem wanda seŋ taku, wayanda. Nammi wayakŋa. Saa kay boy namma oloɗi.» Tamar hin kak hu ziŋ wayaɗna Absalomba ki noya.

²¹ Mulna David hum boy namma halaŋŋi hurum ɓeŋ ki cocoo.

²² Absalom ka di va maŋ wayamma Amnonɗi kay ana Absalom mbuɗ Amnon ki a saam ma babalira kay ɓeŋga nam ɓeŋem wayamba Tamar kira.

Absalom ci Amnon ki ci ni, pii kiyo

²³ Basara jak ki ŋgoo mba' ni, asi caw tlimiɗ timigii suu vi Absalomma hu Baal-Hasor eg Efrayim na tok. Absalom yi goryoŋ mulnana ay halaŋ.

²⁴ Absalom mbay vo vi mulna dam ana, «An ceneŋu. Ko mulna u suu mam suu sunda tuɗ u saaŋ ma sunda.»

²⁵ Mulna di Absalom ana, «Ҥawaa, goronna, an ceneŋu, tuɗuygi halaŋgi. Ka a ami mbuɗ a caŋ nekkaɗi.» Nam dogom vunumu may nam vi ka kam a tuɗɗi, nam paɗ vunum ki kamu.

²⁶ Absalom di ana, «Ҥal voɗta jimi maŋ wayanna Amnon nam tuɗ u amiya.» Mulna dam ana, «Nam tuɗ uŋŋi kay mege?»

²⁷ Absalom dogom vunumu. Mulna hin Amnon tuɗ um u goryom suu hiŋŋa halaŋ.

²⁸ Absalom ɦal voɗta maŋ mborɓogi mamsina ana, «Gologi jiviya. Hu li ma Amnon hurum oy ki u furira u sum veŋŋa wa, an hin dagi wa ana, waɗagi Amnonni agi hin cam kiyo. Lagi ndaaɗi. An ɦagi voɗta ka ni anɗi su? Soogi ugi takagi saɓak magina kiyo.»

²⁹ Mborɓogi suu vi Absalomma li dlara Absalom ɦasi voɗta kaɗta ki eg Amnon. Goryoŋ mulnana yow ki kolo halaŋ, gegelay ful kay koro Makka mamma, ŋgay tasiya.

³⁰ Boy namma tew ha ki eg David hu li ma asi ka hu voɗta tuna. Absalom ci goryoŋ mulnana ki na halaŋ halaŋ, maa hin ka na dewɗi lay.

³¹ Mulna col kolo haa baraw mamma kiyo, buu ki kaŋga duk ndaŋgara. Suu mam suu li sunda halaŋ coli hu li namma, barawi masisina ki ɦaari may.

³² Yonadab, goŋ Kamma, wayaŋ Davidna gijaŋ ɓakŋa di ana, «Ko malanna di ana asi ci goryoŋ mulna suu zoŋŋina ki halaŋŋaɗi. Ҥawaa, Amnon miɗ ni nam dew. Boy namma ay fun Absalommi day hu li ma nam ɓeŋem wayamba Tamar kina.

³³ Ko malanna mulna saa ana goryoŋ mulnana ki miɗi halaŋŋi naɗi. Ҥawaa, Amnon miɗ ni nam dew.»

³⁴ Absalom pii kiyo. Goozoŋ ma tinim a gol u linana tli irim koloo ni wi suuna bolow coco sel ki kay cerem pay ɦinira.

³⁵ Yonadab di mulna ana, «Gola goryoŋ mulnana ka tuɗ aya. Dlara li ni ko ndal saaŋ ma sunda dira na.»

³⁶ Doli ɗini vunum bay daɓ u ɓak ma ana goryoŋ mulnana ka tuɗ ayana may ni, asi mun ki tiina ni na gaw. Mulna u suu mam suu sunda mun ki tiina u tasira ŋgol coco lay.

³⁷ Absalom pii ki tuɗ ha ki vi Talmay, ma goŋ Amihudna, mul ma Gesurna. Hu li namma David li doo goromma.

³⁸ Absalom may ni pii tuɗ ki hu Gesura kak ha ki hu basara hindi.

Absalom hoŋ ay hu Yerusalem

³⁹ Mulna David seŋ lira li yara eg Absalomba, kay ana asi heɓem hurum ki kay maɗ Amnon.