2 SAMUEL 12 - Boy Lonana

Natan gi u cora vi Davidta kiyo

¹ Yawe sun Natan eg David. Nam tuɗ egem dam ana, «Suuna ka hu ɦoŋzina na mba', maa dew ɦizi may, ma hiŋŋa ɦaw may.

² Ma ɦizina timigiina u mbutlina kom cocoo.

³ Ma ɦawra va ka kom na ndeɗi. Kommi goo timiira nam gusuɗta doy hol. Nam ɦaɗ tina. Ndaɗ wul varammi ko taɗ u goryom dew. Ndaɗ ti ni fu ma nam tamma may, ci ni hu tassa ma nam ci huna may. Ndaɗ buuni egem na tok. Ndaɗ egemmi ko ndal goromba na.

⁴ Koyna mba vi sa ɦizina. Nam hurum vi ka a vi u timigii mamsina ɗowba mbutli mamsina a li koyra maŋ koy ma mba varammaɗi. Nam vi goo timiira vi sa hawnara li koyra maŋ koy ma mba varamma u ndaɗu.»

⁵ David mbuɗ ki yara eg sa namma ŋgol cocoo, di Natan ana, «U iirira vi Yawera ni sa ma li dla ndaɗtana a ci kiyo.

⁶ Timiira nam hin warak ndarayaɗna uɗ fiɗi, kay dlara nam laɗta ni ka wi hahaw saɗi.»

⁷ Natan di David ana, «Sa namma ni aŋu. Na ɗaŋŋi Yawe Lona vi suu Israelna ɓak anaba, anni sa ma fuuruŋ a mul ma Israelnana, anni sa ma suɗuŋ ay ki ko Solna.

⁸ An ɦaŋ zi ma vi malaŋŋana koŋu, an cukuŋ boyogi suu vi malaŋŋana hu duk koŋu. An ɦaŋ ɦoŋzi ma Israelna u ma Yudana, li ni kaɗakaŋu ni an hin ɦaŋ su olo.

⁹ Ni kay me aŋ hin dlara Yawe daɗta ki may hin li dlara Yawe hurum vaɗ kaɗira ni nanage? Aŋ ci Uri ma Hetna ki u ŋgewna. Aŋ vam caamba mbuɗuɗ ki caaŋga. Nam tamba aŋ cam ki u ŋgew ma vi goryoŋ Amonna.

¹⁰ Na ɗaŋŋi ŋgewna hin ka ɦuɗ tam ki hu ziiŋgi kay ana aŋ hinin kiyo, aŋ tli caŋ Uri ma Hetnara, mbuɗuɗ ki a caaŋga.

¹¹ Na ɗaŋŋi Yawe ɓak anaba, gola an hin mbaaŋ dla cora ay kaŋŋi hu ziiŋu. An hin yowoŋ boyogoŋ iriŋ hin ɦasi ki maŋ sa daŋŋa. Nam hin buu u asi iriŋ hu faɗ ndaɗta.

¹² Kay ana aŋ li dlaaŋga ni ŋgaya may an hin li dla ndaɗta ki ni fok suu Israelna halaŋ, ki ii faɗta lay.»

¹³ David di Natan ɗaŋŋi ana, «An li sulukŋa eg Yawe.» Natan di David ana, «Yawe u saa mamba bulumuŋ suluk maŋŋa ki wa. Aŋ hin ka miɗɗi.

¹⁴ Na may kay ana aŋ noy Yawe ki hu dlara cocoo, ɗowba suu babali mamsina, goroŋ ma aŋ vuɗumma hin miɗ kiyo.»

¹⁵ Natan hin tuɗ ki vo varamu. Yawe waɗ goo ma Batseba caŋ Urira vuɗum maŋ Davidna, nam ndi tuguɗiira.

Goŋ Batsebana miɗ kiyo

¹⁶ David hoŋ irim eg Lona kay gogoona. Nam gijaŋ li laara, hu li ma nam hoŋ ay vo varam njeŋgena nam buu ki kaŋga duk ndaŋgara.

¹⁷ Suu basi suu hu ziimma dogom vunum a colom ki kolora may nam ka minɗi, ka vi va ti kosiɗi lay.

¹⁸ Hu buu ma kiɗisiyana, goona miɗ kiyo. Suu sun Davidna ci wayra duk tasi ana ka dam ana, goona miɗ waraɗi. Asi ɓak tasi ɗaŋŋi ana, «Hu li ma goona iiri tuna aygi ɓakam lay ni, nam humuygi vunuygi kaɗi. Cecem wanda ni hin dammi ana me hu li ma goona ki miɗina ni ge? Nam hin li dlara hahawra.»

¹⁹ David wi ana suu mam suu sunda hosok duk tasiya ni nam wi ana goona ki ni miɗiya. David di suu mam suu sunda ɗaŋŋi ana, «Goona miɗ ki wa su?» Asi dam ana, «Nam miɗ ki wa.»

²⁰ Na ɗaŋŋi David hin col ki kolo duk ndaŋgara, mbus tam kiyo, li mbul ma his jivina egemu, cuk barawi suu daŋŋa egemu. Nam hin tuɗ hu zira vi Yawera hin goɓ kaŋgaa. Nam hoŋ ha vo varam may ni joɓosi ana asi ɦam funa nam tiya.

²¹ Suu mam suu sunda dam ana, «Aŋ li na ni mege? Hu li ma goona iiri tuna aŋ li laara lay tii kam lay, Cecem wanda goona miɗ ki lay, aŋ hin col ki kolo may, ti funa may ni nanage?»

²² David di ana, «Hu li ma goona iiri tuna an li laara lay tii lay ni kay an ɓak tan ana, ni ge wi ge? Yawe hin wan hahawan goona hin kak iiri kalage.

²³ May cecem wanda nam miɗ ki wa. An hin li laara ni kay me ologe? Na ni an hin ndak a hoŋom ay su? An hin tuɗ ha ni egem na ɗow, nam hin ka hoŋ ay egenɗi.»

Vuɗta Salomon Vuɗ Kira

²⁴ David heɓ hu Batseba, caamba. Nam hin tuɗ egeɗ buu u ndaɗu. Ndaɗ hin vuɗ goona. David hin tinim sem ana Salomon. Ni ana, Yawe minimu.

²⁵ Sun ha egem dam fun sa jok vun Lona Natan. Nam tinim sem ana Yedidiya ni ana, ma Yawe minimma, ɗowba ni kay Yawe.

David tli ɦoŋzi ma Rabbana

²⁶ Joab gijaŋ Rabba ta vi goryoŋ Amonda duuna hin tli ɦoŋzi ma mulla.

²⁷ Joab sun suu vun sunda eg David. Nam di ana, «An duu u Rabba. An tanda tli ɦoŋzi ma mbona hurumma ki lay.

²⁸ Cecem wanda ɗaŋŋi tok suuna usira hinda mbay njaa ki kay ɦoŋzina tlam kiyo, li ka naɗi ni an hin tlam ki tani nam hin yanni senu.»

²⁹ David tok suuna eg tasi halaŋ tuɗ kay Rabba duuruɗ hin tlaɗu.

³⁰ Nam tli jumba vi mul masinara ki kay yamu, nekeɗ ni ii kelew dok-hindi, ii lorra u gogoyra jivira ceɗira, asi tiniɗ ki kay yam David. Nam yow tlesuu hu ɦoŋzina jonana ŋgol cocoo.

³¹ Suu hu ɦoŋzi nammana nam yowosi, asi tuɗ a li sunda u va ma ŋgaɗ guna u ɓuu kawina, njeɗ kawina. Nam cukusi a ci brikka. Nam li suu hu ɦoŋzi ma vi goryoŋ Amonna ni ko ndaɗta na. David u suu mamsina halaŋ hoŋ ay Yerusalem.