2 SAMUEL 11 - Boy Lonana

David u Batseba

¹ Doli ɗini hu hoŋga suu asgaana hoŋ ay hu li ma mulina njaa tasi ki a duunana ni David sun Joab u suu mam suu sunda halaŋ, suu Israelna halaŋ may. Asi kiriɓ goryoŋ Amonna kiyo, min tasi a duuna fok Rabba hu li ma David kaki Yerusalemma.

² Fiɗigira mba may ni, David col ki kolo kay lay mamma. Nam tuɗ poyra kay yam zina vi mulna. Ay kolo kay yam zina day ni nam wi cara ka mbus taɗu. Ca ndaɗta jiv coco ɦay.

³ David sun ha joɓ kay ca ndaɗta. Asi dam ana, «Ni Batseba ta goŋ Eliyamba, caŋ Uri ma Hetnaɗi su?»

⁴ David sun suu vun sunda ha ana asi yaɗ aya. Ndaɗ mbay varam nam buu u ndaɗu. Ndaɗ mbus taɗ ay ki teteɗ u busu ma ndaɗ famma ni cecem tuwa. Ndaɗ hin tuɗ vo varaɗ ɗaŋ.

⁵ Cara vi wiina. Ndaɗ sun ha a di David ana, «An u wiina.»

⁶ David sun ha di Joab ana, «Sunun ay Uri ma Hetna.» Joab hin sun Uri ay maŋ David.

⁷ Uri mbay egem tok. David joɓom ana, Joab ka nanage? Suuna ka nanage? Duuna mayge?

⁸ David di Uri ɗaŋŋi ana, «Tuɗ vo varaŋ mbus seŋ ay ki tuwa.» Uri kal ay ki vo vi mulna u tlesuu mulna ɦamsina ɦawana umu.

⁹ Na may Uri buu kaŋga fun ziŋ mulnana u suu vi malammana halaŋ umu. Nam tuɗ ka hu ziim tambaɗi.

¹⁰ Asi tuɗ di David ana, «Uri tuɗ ka vo varambi.» David di Uri ana, «Aŋ mbay ka ni fun koyraɗi su? Aŋ hin tuɗ ay ka vo varaŋgi ni kay mege?»

¹¹ Uri di David ana, «Zandukka, suu Israelna u Yuda ha ki bagi hu mbutluɓma. Malanna Joab u suu sun suu vi malannana buu ha ki ni bagi hu li ma duuna. An may ɗaŋŋi hin tuɗ vo varan ti may ci may buu u caanda may su? U iiri maŋga u iiri maŋ aŋ taŋgara an ka li dla ndaɗtaɗi.»

¹² David di Uri ana, «Kak kaŋga tani ta ta karami, vin an hin sunuŋ balamaŋu.» Uri hin kak hu Yerusalem buu namma, vin lay.

¹³ David yam ha varamu, nam ci may, ti may ko tasiya. David guruɗum ki u summa. Uri kal ay ki fiɗigi a tuɗ buu kay lay mamma ko tam u suu sun suu vi malammana, may nam tuɗ ka vo varambi.

¹⁴ Vin maɗii wanni David ɓii magaara maŋ Joab, sunuɗ ha ko Uri.

¹⁵ Nam ɓii ha hu magaa ndaɗta ana, «Tin Uri ha hu li ma duuna ki hu saɓak cocona duk dar suu fokŋa. Agi hin ɦuɗugi tagi ay ki ŋgorom dagani. Asi hin gigimu. Nam hin miɗ kiyo.»

Maɗ Uri ma njuf Batsebana

¹⁶ Joab sa ma gol yam ɦoŋzinana tin Uri hu li ma nam wi ana suu dlasi ŋgolona ka huna.

¹⁷ Suu hu ɦoŋzinana sel ki a duu u Joab. Suuna fi maɗna ɦay, duk suu sun suu vi Davidna. Uri ma Hetna miɗ ki lay.

¹⁸ Joab sun ay di David kay dla duu namma.

¹⁹ Nam ɦal voɗta ha maŋ sa ma nam sunumma ni ko wanda na. «Lini aŋ njaɗ dla duuna ki maŋ mulna wa halaŋŋi ni,

²⁰ Lini mulna mbuɗ ki yara hin daŋ wa ana agi ɦuɗ tagi ha eg ɦoŋzina a li duuna amege, agi wi ka ana asi gik ay kolo kay yam gulumunnaɗi su?

²¹ Sa ma ci Abimelek ma goŋ Yerubaalna kina ni gege? Cara gam ɦini ma luɗna ay kammi kolo kay yam gulumunnaɗi su? Nam hin miɗ ki hu Tebes ni naɗi su? Agi ɦuɗ tagi ha eg gulumunna ni kay mege? Aŋ hin dam ana, saaŋ ma sunda Uri ma Hetna miɗ ki lay.»

²² Sa vun sunda tuɗ njaɗ dlara Joab damba ayra ki maŋ David halaŋ.

²³ Sa vun sunda di David ana, «Suu asina saɓak suumiya. Asi sel ha ki ii koma kamina na gay may, ami duu u asi ta ta tew ha ki hu vun grek ma kalla.

²⁴ Suu duuna gik suu maŋsina ay kolo kay gulumunna. Suu vi mulnana fi maɗna ɦay. Saaŋ ma sunda Uri ma Hetna miɗ ki lay.»

²⁵ David di sa vun sunda ana, «Aŋ hin ɓak Joab anaba, Gol dla ndaɗta iriŋ saɓak coɗi. Ŋgewna ci ni ko wanna na, ko hiŋga na lay. So taŋ a duu u ɦoŋzi namma, toom kiyo. Soom um ko wanda na.»

²⁶ Caŋ Urira hum ana njufuɗ Uri miɗiya ni ndaɗ tii kay njufuɗu.

²⁷ Doona daɓ ki may ni David sun kaɗ halaɗ aya. Nam hin vaɗ vo varamu. Ndaɗ mbuɗ ki caamba, hin vuɗum goona. May dlara David laɗta, Yawe hurum vaɗ kaɗi.