2 SAMUEL 10 - Boy Lonana

Suu David sunusina mbuɗ ki zolona

¹ Ŋgoo dagan dla ndaɗta ni mul ma vi goryoŋ Amonna miɗ kiyo, goromma Hanum hin varak a mulna balamamu.

² David di ɗaŋŋi ana, «An hin li dlara u ɗegeera eg Hanum ma goŋ Nabasna ŋgol coco ko bum laɗ egenda na may.» David sun ha egem fun suu mam suu sunda u gaɗ mamba so huuna kay dlaŋ bumba. Asi suu sunda vi Davidna tew ha ki hu mbassa vi goryoŋ Amonda.

³ Muli suu vi goryoŋ Amonna di Hanum malasina ana, «Na ni aŋ saa kaŋ ana David sun suuna ay egeŋŋi kay a sooŋ uŋ kay dlaŋ buŋga su? Ni ka a gol ni hukka hu ɦoŋzinara a cuk suuna ay ni kay a tlam kira David sun suu mam suu sunda ay ka egeŋŋi naɗi su?»

⁴ Hanum yow suu sun suu vi Davidna welesi njeresi ki keŋ dew, harasi baraw masina ki duk ta ta tew ki kay usiya hin cukusiya.

⁵ Asi di boy namma maŋ David. Nam sun sa ma daŋŋa ŋgafasi ay voɗo kay ana suu asina mbuɗ ki zolo ɦay. Mulna jokosi vunna ay ana, «Kakagi ha hu Yeriko ta ta njeregi si ki tuwa. Na ɗaŋŋi agi hin hoŋ ay ɦawa na.»

Duuna u suu Amonna u suu Aramena

⁶ Goryoŋ Amonna wi ana asi mbuɗ tasi ki cora ii David wa ni, asi sun yow suu Siri suu hu Bet-Rehobma ay usiya. Suu Siri suu hu Sobana lay gorzoŋŋi suu duuna 20.000 ay vi mul ma Maakana suuna buɓ, suu vi Tobna suuna 12.000.

⁷ David hum boy namma hin sun Joab u asgaagi suu malayaŋ duuna.

⁸ Goryoŋ Amonna sel ki njaa tasi ki a duuna fun grekŋa. Suu Siri suu Sobana u suu Rehobna u suu Tobna, suu Maakana ki ni kay tasi hu liisi may.

⁹ Joab wi ki kam ana nam hin li duuna u suu ŋgoromma lay, suu fokomma lay. Nam man suuna duk suu duu suu Israelna hin njaarasi kay cee tasi na diwliŋ fok suu Sirina.

¹⁰ Nam hin ɦal suu duu suu usi hinna maŋ wayamma Abisay. Nam hin njaarasi kay cee tasi na diwliŋ fok goryoŋ Amonna.

¹¹ Nam di ana, «Lini suu Sirina saɓakasi su kanu ni aŋ mbay njununu. Lini goryoŋ Amonna saɓakasi su kaŋu ni an hin tuɗ ha njunuŋ may.

¹² Li saɓaki, tagi saɓa kay ki maŋ suu maysina, maŋ ɦoŋzi ma vi Looynana. Yawe li dlara hurum vaɗta.»

¹³ Na ɗaŋŋi Joab u suu mamsina tuɗ a duu u suu Sirina. Suu asina yow liŋŋa komu.

¹⁴ Hu li ma goryoŋ Amonna wi suu Sirina yow liŋŋa na ni, asi may ni yow liŋŋa ko Abisay hoŋi vo hu ɦoŋzina gaw. Joab hoŋ ay fun duu ma u goryoŋ Amonna hin tuɗ ki Yerusalem.

¹⁵ Suu Sirina wi ana suu Israelna casi wa. Asi tok tasi halaŋ.

¹⁶ Hadadezer cuk suu vun sunda yow suu Sirina njaarasi a duuna ki ŋgoo lum ma ŋgolna. Suu asina tew ki hu Halam. Kobak ma ŋgol asgaa ma vi Hadadezerna tuɗ fokosiya.

¹⁷ Asi di boy namma maŋ David. Nam tok suu Israelna halaŋ, ɗiŋ lum ma Yurdanna tew ha ki hu Helam. Suu Sirina njaa tasi ki na diwliŋ fok David duurumu.

¹⁸ May suu Sirina yow liŋŋa fok suu Israelna. David ci suu Sirina kulumi masi suu u puspusnana kis kis kiɗisiya, suu duu suu fuli kay kulumina buɓ buɓ dok-fiɗi. Nam waɗ Kobak ma ŋgol asgaa ma Sirina. Nam miɗ hu li namma ni na gaw.

¹⁹ Muli suu li sunda vi Hadadezerna halaŋ wi ana suu Israelna su kasi wa. Ni asi heɓ duk ɦoŋosi u suu Israelna, hin lasi sunda. Suu Sirina mbuɗ ki ndaana a mbay njun goryoŋ Amonna.