2 SAMUEL 1 - Boy Lonana

David hum kay maɗ Sol

¹ Ni ŋgoo dagan maɗ ma vi Solna, David hoŋ ay hu li ma nam ci Amalek ha kina. David li buuna hu Siklag mba'.

² Hu buu ma hindina, sana dew col ay hu kaŋŋa mba eg David. Barawi suu egemma ki ɦaariya, yam ki u ndaŋgara na kufuruk may. Hu li ma nam a mbay eg Davidta ni nam gi tam kaŋga duk ndaŋgara, goɓ kaŋgaa.

³ David dam ana, «Aŋ col ay ni arage?» Nam dam ana, «An pii ay ki hu kaŋŋa duk suu Israelna ni piiriya.»

⁴ David dam ana, «Dla ndaɗta li ni ana mege? Njaɗan aya.» Nam di ana, «Suuna njay kiyo, suu daŋŋa miɗ ki bolow coco lay. Sol u goromma Jonatan miɗ ki lay.»

⁵ David di goozoŋ ma jokom boyna kina ana, «Aŋ wi ana Sol u goromma Jonatan ki miɗiya ni u mege?»

⁶ Goozoŋŋa dam ana, «Va tuɗun ha kolo kay ɦinira Gilboara ni me kala. Sol ki pii fun saɓ mamba, puspusna u suu fuli kay kuluminana moli egem na tok.

⁷ Nam pereɗ irim, hin wanu. Nam yanu, an hin dam ana, An wanni.

⁸ Nam dan ana, Aŋŋi gege? An hoŋom dira ana, Anni sa ma Amalekŋa.

⁹ Nam dan ana, Kak egen na tok, aŋ min su? Dogon kiyo kay ana dla cora fan wa, li ni musukun ka hurun tu lay.

¹⁰ An kak hin dogom kiyo kay an wi ana nam hin ka kak iiri hu pukka nam puk wandaɗi. An tli jumba mulla ta ay kay yamba may, walak ma del komma may. An mbaasi ay kaŋga tani maŋ malanna.»

¹¹ David kaw baraw mamma na ni, ɦaaram ki gaw. Suu umma halaŋŋi li na lay.

¹² Asi li doona, tiira, li laara ta ta fiɗigi kay Sol, kay goromma Jonatan, kay suu vi Yawena, kay zi ma Israelna asi suu casi ki u ŋgewnana.

¹³ David di goozoŋ ma jokom boyna kina ana, «Aŋ col ay ni arage?» Nam di ana, «Anni goŋ sa ma ŋgay ma Amalekŋa.»

¹⁴ David dam ana, «Aŋ li ndaa ka a tli koŋ a ci sa ma Yawe fuurummaɗi ni nanage?»

¹⁵ David yi go njuf maa dew duk ndarayamma dam ana, «Ҥuɗ taŋ ha egem cam kiyo.» Nam hin cam kiyo.

¹⁶ David dam ana, «Ko busuɗuŋ li ni kay yaŋu, kay aŋ tin dlara egeŋ u taŋga ana, anni sa dog sa ma Yawe fuurumma kina.»

Yoo tara vi David kay Sol u Jonatan

¹⁷ Na ɗaŋŋi David li yoo ndaɗta kay Sol u goromma Jonatan.

¹⁸ Nam di ana, «A haɗ maŋ goryoŋ Yudana ni Yoora u Gu Mbuurura ki ɓiiri hu Magaara vi sa ma Ɗegeena ni na.

¹⁹ Ŋgara vi Israella ka kolo kay ɦini maɗta. Suu saɓakŋa puk ki kaŋga wa.

²⁰ Ɓakagi boy namma ki hu Gatɗi, jokogi boy namma ha ki hu voɗta Askalondaɗi, ka a gorɓii suu vi suu Filistinna li furiraɗi, ka a gorɓii suu hurusi bay mbuɗtana weɗ kolo u furiraɗi.

²¹ Ҥinira Gilboara mbaɗagi gi kaɗɗi lay, lo si kaɗɗi lay, sene ma mbii li kaɗɗi lay. Ni hu li namma mbari ma vi suu saɓakŋana mbuɗ ki zolona. Mbari ma vi Solna asi lam mbul ka egembi.

²² Ko busu suu casi kina, ko mbul suu saɓakŋa, ko gu mbuuru ta vi Jonatan ta ka ɦoŋ daganɗira, ko ŋgew ma vi Sol ma ka hoŋ sinim sooyɗina.

²³ Sol u Jonatan, suu suuna minisi ɦayna, ka wal ki u asi hu kakka iirira u miɗnaɗi layna, suu feɗ coco su ɓarawna lay saɓak su dlona layna.

²⁴ Gorɓii suu Israelna tiirigi kay Sol ma cukugi baraw ma gus loɓma u tlesuu humba egegina, ma njaɓagi ɦeɗew lorra kelegi kay baraw maginana.

²⁵ Suu saɓakŋa ndi duk duu ma ŋgolna. Jonatan cam ki ni kay ɦini makka.

²⁶ An fi titara coco kaŋu, wayanna, Jonatan. An miniŋ cocoo. Galam maŋga u anda ni furira ŋgolla, jivi su minda vi boyogina.

²⁷ Suu saɓakŋa puk ki kaŋga wa. Ɓagi ma duuna viɗ ki wa.»