2 PIYER 3 - Boy Lonana

Vi vunna kay mbara vi Bu Suunara

¹ Banayanna wanni magaara mbara ta an ɓiirigira hu magaara ndaɗta u dlaɗta jakka an hal a dliɗigi saa magira jivira kolo u haɗta an gagi humugi wanda.

² An hal a gagi humugi kay boy ma suu jok vun Lona suu teteɗna dam jewna, u gaɗta vi Bu Suuna Sa Suɗta u suu vovoɗta vi Lona haɗagi kaɗta.

³ Wagi ki anaba hu buu ma hin mbay daganna ni suu may suu kak iiri kay tasi u min masira kay tasina hin panagi anaba,

⁴ «Nam di ki jew ana nam hin mbaa naɗi su? Ha nam ara ɗowge? Somoyoy halaŋ miɗ kiyo ni dlara hin halaŋŋi tuɗ ni ko u ndaŋgara tin ay jewra na.»

⁵ Maa humusi ki a gagaɗta kay boyna wanni ay jew dayra Lona diya, huulona u ndaŋgara nam lasiya. Ndaŋgara paɗaɗ ay ki ni duk yona hin miniɗ ni u yo namma,

⁶ mbo ma ŋgol ma tli ay kay ndaŋgara nam ɓeŋ ndaŋgara jewra ki ni u namu.

⁷ Huulona u ndaŋgara ka cecemi wanda, Lona hinisi u Boy mam namma, kay hin ɓalakasi ki u kura nam hinisi kay juɓ buu ma kaɓakŋa kay suu cona, baasi kiyo.

⁸ Boy namma wanni humugi maaram kiɗi, banayanna ii Bu Suuna wanni buu ma dewna ni ko basara buppa na, basara buppa ni ko buu ma dewna na may.

⁹ Bu Suuna ka hin va ma nam damma bay li ki ko suu hiŋŋa saara naɗi. Nam li ɗili egegiya nam min a sa ba kiɗi nam min na ɗow ana suuna halaŋ mba jok iiri masira ki zeɗ.

¹⁰ Buu ma vi Bu Suunana hin mbani ko sa ma kulna na, hu buu namma wanni soora mbuɗ suuna ndaana ŋgolo tlesuu kolo huulonna hin yoo ki u kura, ndaŋgara u tlesuu huruɗna hin ŋgal kiyo.

¹¹ Tlena halaŋ hin ɓeŋ ki ni ko ndaɗta na agi hum ki jiviya poy magira hin lini nanage, agi mba poy ɗegee taɓi u Lona.

¹² Juɓugi buu ma vi Lonna, soogi tagiya kay nam hin tok a mbara hu buu ma huulona ɓalak ki wa u kura, tlesuu kolona ɓalak ki u kura.

¹³ Lona di ana nam hin min huulona ma wilina u ndaŋgara wilira, hin li hu li namma ni ɗegeera sak sak ni va ma aygi ka juɓumma.

¹⁴ Kay ndaɗta banayanna a juɓ buu namma wanni soogi tagi kay lak ɗegee ii Lona kay taɓ u nam hu heɓpa.

¹⁵ Lalamba vi Bu Suunara ni ko voɗta suɗuygira na, ni kay ndaɗta wayaygi ma banaygina, Pol, ɓiirigi boy namma u yal ma Lona ɦammana.

¹⁶ Hu magaara nam ɓiiriɗta ɓak kay boy namma hu magaara ndaɗta halaŋŋi, boy ma hum loɓma kaa, suu ka wiɗina u suu ka eŋgina ka dam u voɗombi ko asi di hu magaara vi Lonara daŋga na, ni asi lini dlara ba tasi ki kay tasi tokka.

¹⁷ Agi banayanna cecemi agi hum ki wa gologi tagi jiviya, a agi mba hin tagi a viɗ ki u cora vi suunaraɗi, ba voɗ magira ɗegeera kiɗi.

¹⁸ Wulugi koloo, tuɗ fok u oora u wira vi Bu Suuna mayna, Sa Suɗta Yesu Kristu. Cecemi ŋgolla ni mamba lay ha fok din din. Amin.