2 PIYER 1 - Boy Lonana

Gi deɓpa

¹ Ni Simon Piyer sa ma sunda ma vovoɗta vi Yesu Kristu. Maŋ suu may suu fi vira dlaɗ ŋgol ko ami na mayra u ɗegeera vi Lona u Sa Suɗta Yesu Kristu.

² Ko agi fi oora u heɓpa coco kay wira agi wi Lona u Bu Suuna mayna Yesura.

Yira u manda vi Lona

³ Saɓak ma kolona vi Bu Suuna ɦaygi tlesuu ŋgomoygi hu iiri maygira halaŋ egem nam Lona, kay nam takaygi sa ma yaygi aygi mba taɓ u nam hu ŋgol mamba u jivi mambana.

⁴ Nam ɦaygi vi vun mamma dlam ŋgol ma jivina kay a fi va nam vi vunum kamma ni ay hin puruɗ ki ko ŋgiziɗta bagira hu duliyara wanda a kal hu jivira vi Lona.

⁵ Ni kay ndaɗta soogi ugi a viigira mbuɗ eŋ hu poyra jivira, poy magira jivira a wi yal dlara.

⁶ Soogi ugi a cuk kay wiigira doo tara, cuk kay doo tara ɗilira, cuk kay ɗilira taɓpa taɓ u Lonara.

⁷ Cuk kay taɓpa taɓ u Lonara minda min gorseginara, cuk kay minda min gorseginara, minda.

⁸ Ni agi ndak li u tlesuu asina hurugiya, lini tlesuu asina ka hurugi ŋgolo ni asi hin mbuɗugi saɓaki, zulugi u wira eg Lona Bu Suuna Yesu Kristu.

⁹ Lini sana ka u tle asina hurumbi nam u wira gedeŋga hurum ko sa ma dugina na, humum maa ki kay mbuɗ mamba nam mbuɗ ay ki teteɗ kay coomba jewra.

¹⁰ Kay ndaɗta gorsenna soogi tagi eŋ a taɓ u yi mayra Lona yagira u manda nam managira, lini agi li ko ndaɗta na ni agi hin ka a cuk kaŋga hu coraɗi.

¹¹ Ni agi hin a fi voɗta a cuk hu mul mayra ka daɓ kiɗira vi Bu Suuna, Sa Suɗta Yesu Kristu.

¹² Ni kay ndaɗta an gagi humugi kay tle asina an wi kan ana agi wi tle asina ki wa da lay, ni agi kakagi eŋ kay gasi mayra agi faɗ ay ndaɗta.

¹³ An wi kan gasi day day ana an lay ka hu iiri ndaɗta tuwa, an gagi humugi kay boy namma.

¹⁴ An wi kan ana an hin tok a hin tliw ma miɗi namma kiyo, ko Bu Suuna Yesu Kristu takanda na.

¹⁵ An halni yal may ma gagi humugi kay tle asina ka ŋgoo dagan miɗ manna.

Suu wi ŋgolla vi Kristura

¹⁶ Ami ɓakagi ni ka kay dla mayra njun njunda u yamba a agi mba wi mbara u saɓakŋa vi Bu Suuna Yesu Kristu ɦawa naɗi, ami wi ŋgol mamba u irimiya.

¹⁷ Hu li ma nam fi geleɗta u ŋgolla vi Lona Buna ni ami ka hu li ma ami wi ŋgol mamba humumi della di ay kolo huulona ana, «Ni goron ma an minimma, an tin furi manda halaŋŋi kamu.»

¹⁸ Ami hum della di ay kolo huulona u humumiya, ni ami ay ko tami kay ɦinira teteɗta.

¹⁹ Ami wi gasi boy ma suu jok vun Lona damma, agi wi ki jiviya. Nammi ko lamba weleɗ duk ndufunda na gak gak lina fo kiyo, u ciciwra maɗiira ɓoroŋ lina hurugiya.

²⁰ Agi wagi u boyna wanni ki jiviya, boy ma suu jok vun Lona dam hu magaara, sa ndak a gam um ki kay tambi.

²¹ Boy ma suu jok vun Lona damma halaŋŋi ka u minda vi sana kay tambi, ni Musuk Lonara njun usiya kay ndaɗta asi ɓak kay Lona ni na.