2 MULINA 9 - Boy Lonana

Fuu Jehu a mul ma Israelna

¹ Fali taa dew ni Elize yi goo zoŋ maa duk suu jok vun Lona dew ni dam ana, «Min taŋu, tli goo kob ma mbulna koŋ tani, tuɗ hu Ramot ta Galaadta.

² Tew hu wa ni aŋ tuɗ joɓ kay Jehu, ma goŋ Josafatna, goŋ Nimsina. Aŋ kal ha umu, colom ay ki kolo duk gorsemma. Aŋ mbaaram ay ki hu zira daŋga keŋ ŋgaya.

³ Aŋ tli kob ma mbul namma, voom mbulna kam di ana, Gola, Yawe di ana, an fuuruŋ u mbulna wanni a mulna kay suu Israelna. Aŋ hin mal vunna na gaw ni, pii ay ni na gaw, vi yaŋgi.»

⁴ Goo zoŋ ma jok vun Lona namma gi tam tuɗ hu Ramot ta Galaadta.

⁵ Nam tuɗ tew hu may ni fi sa ma ŋgol asgaana kaki na paŋ may. Nam joɓ ana, «An min a daŋ boy dew, sa ŋgolna.» Jehu dam ana, «Sa ma dukumi ma aŋ min a ɓak u namma ni gege?» Nam hoŋom dira ana, «Ni maŋ aŋu, sa ŋgolna.»

⁶ Jehu col ay kolo tuɗ kal ki hu zira goo zoŋ ma jok vun Lona voom mbulna kam dam ana, «Yawe, Lona vi suu Israelna, di ana u fuu ndaɗta an kakaŋ a mulna kay suu vi Yawe suu Israelna.

⁷ Aŋ hin ci suu vi Akab sa ŋgol maŋŋana kiyo. An hin sa sukul suu man suu sunda suu jok vun Lona u busu suu sun suu vi Yawena halaŋ, ma Jezabel voom ki kaŋgana kiyo.

⁸ Suu vi Akabma halaŋ hin ba kiyo. An hin ci njufii suu vi Akabma ki bel bel. Mborɓiina u gor vuɗta suu ka hu mbassa Israella halaŋ.

⁹ An hin li suu vi Akabma ni ko ndal an li suu vi Jeroboam ma goŋ Nebatna na may. Ko ndal an li suu vi Basa ma goŋ Ahiyana na may.

¹⁰ Lini Jezabel ni diginina hin komoɗ ni duk sene ma vi Jizreelna, sa ka tosoɗ kaŋgaɗi.» Nam mal vunna ay ki na ni, pii ni na gaw.

¹¹ Jehu kal ay ki hoŋ eg suu ŋgolo suu vi sa ŋgol mammana. Asi joɓom ana, «Dla ndaɗta na ni jivi ko su? Sa namma mbay egeŋ na ni kay mege?» Nam hoŋosi dira ana, «Agi lay ni agi wi sa namma u sun mambaɗi su?»

¹² Asi dam ana, «Aŋ ka ni boyna. Gami u dla ndaɗta ay kiyo.» Nam dasi ana, «Gola ni dlara nam danda ayra, ana gola Yawe di ana fuura an fuuruŋ u mbulna wanda, aŋŋi a mul ma vi suu Israelna.»

¹³ Na gaw ni, suu ŋgolo suu asgaana fok barawi masisina boɗosi kaŋga vun goŋga kal ay kira, kak Jehu ka kolo kasiya gijaŋ sawalla ha kolo ana, «Gaŋ deɓe, mulna Jehu.»

Jehu ci Joram, mul ma Israelna, kiyo

¹⁴ Jehu ma goŋ Josafatna, goŋ Nimsina, vi vunum kay mulna Joram a lam hawra, ni hu li ma suu Israelna ka duu kay mbassa Ramot ta Galaadta u Hazael, mul ma Sirinara, may.

¹⁵ Mulna Joram hoŋ ay ki mba cil mbilim ma nam dag ay fun duunana ki hu Jizreel tana may. Hu li ma asi ka duu u Hazaelna, Jehu di ana, «Cemi ni agi mbuɗ ki unwa, na ni agi ka hin sa ma hu ɦoŋzina tani a kal ki tuɗ di boy namma ha ki hu Jizreelɗi.»

¹⁶ Jehu ful hu pus pus mam ma kulumina a tuɗ hu Jizreella. Ni Joram ha ga buuri u tuguɗiira hu may. Ahaziya, mul ma Yudana, tuɗ ha a heelemba may.

¹⁷ Suu may suu juɓ yam zina laki kolo kay zi fiyekka wi Jehu tuɗ ay u suuna um na ni di ana, «An wi suuna ay ko ndal suu duuna na.» Joram di ana, «Vi sa ma kulum dew ni, tuɗ ŋgafasiya, joɓosi ana asi tuɗ na ni ɦawa ko su?»

¹⁸ Sa ma kulumma tuɗ ŋgafasi ŋgaf ni di ana, «Mulna di ay ana agi tuɗ na ni ɦawa ko su?» Jehu hoŋom dira ana, «Va ma ndoloŋ dukŋa ni mege? Heɓpa, hoŋ aya, tuɗ ay unu.» Sa ma juɓ yam zina kolo kay gulumunnana ka di suuna ana, «Sa ma kulumma tew kiwa, ka hoŋ ay oloɗi lay.»

¹⁹ Mulna sun sa ma daŋŋa u kulumma a mbara. Nam tew egesi may ni joɓ ana, «Mulna di ay anaba, agi tuɗ na ni ɦawa ko su?»

²⁰ Sa ma juɓ yam zina di ana, «Nam tew ki egesiwa, may ka min a hoŋ ayɗi. Vana gol ko ndal Jehu ma goŋ Nimsina na, kay nam li dlara ko ndal suu puluɗiina na.»

²¹ Joram di ana, «Ganagi kulumina.» Asi ganam kulumina may. Joram, mul ma Israelna, u Ahaziya, mul ma Yudana, cuk ay ki u pus pus masi ma kulumina mba ŋgaf vok Jehu. Nam ka ni hu sene ma vi Nabot ma Jizreelna may.

Miɗ ma Joram miɗna

²² Hu li ma Joram wi Jehu may ni, nam joɓom ana, «Aŋ tuɗ na ni ɦawa ko su, Jehu?» Nam hoŋom dira ana, «Ҥawaa ni ana mege? Aŋ wi ana suŋ Jezabel cemi ka li dlara kumuna joɓ loogi suu ɦawana gak tuɗi su?»

²³ Joram hoŋ dagan a piira may, sawalla ha kolo ma Ahaziya ana, «Ahaziya gol taŋ jiviya ni dlara gonokka.»

²⁴ Jehu paɗ mbuuru mamba na gam munda ha kay payam na ni mbuurura jak ha ki ii hiniŋŋa, coom mukulum kiyo. Nam ndi kaŋga hu pus pus mamma ni na husuk gaw.

²⁵ Jehu di saam ma funumma Bidkar ana, «Tlam maɗam tani gam ha ki duk sene ma vi Nabot ma Jizreelna. Humuŋ mba gaŋ kay dlara Yawe daɗ ay ki fok jew maŋ bum mulna Akabba, ni hu buu ma aygi ka u nam hu pus pusna a tinimba ana,

²⁶ An, Yawe, wi dla ndaɗta ki halaŋ hu li ma aŋ ci Nabot u goryom kina. An, Yawe, suu tan ana an hin kaaŋ ɓakŋa kaŋ kay dla ndaɗta ni hu sene namma na gay may.» Jehu hin di ana, «Tli maɗ Joram gam ha ki hu sene namma, ko ndal Yawe di ay ki fok jewra na.»

Miɗ ma Ahaziya, mul ma Yudana, miɗna

²⁷ Hu li ma Ahaziya wi dla ndaɗta na ni, nam pii tin irim ha Bet-Gan na, Jehu cuɗum um gak gak. Jehu di suu umma ana asi ci Ahaziya ki may. Asi tuɗ cam ha ki ni hu li ma nam ka jaŋ pus pus mamma kay tam tin irim ha hu Gur na, ka day eg Ibleambi. Ahaziya liŋ gak gak tuɗ miɗ ha ki ni hu Megido.

²⁸ Suu ŋgolo mamsina mbaaram maɗam ay u pus pus mamma hu Yerusalem. Asi mba pam hu li ma yam ana Ҥoŋzi Davidnana.

²⁹ Ahaziya mbuɗ ay a mul ma Yudana ni hu li ma Joram goŋ Akabma basaɗ ki hu mulla doogo yam dewna.

Miɗ ma Jezabel miɗna

³⁰ Jezabel hum dlara li ayra ki halaŋ halaŋ. Ndaɗ ndal iriɗ ki may, ndal yaɗ ki may. Hu li ma Jehu ay hu Jizreel hoŋ ay vona ni, ndaɗ col ay vo golom ay ii zira.

³¹ Hu li ma nam jak vun grek ma kay ɦoŋzi ŋgolnana may ni, ndaɗ oo uɗ ay kolo dam ana, «Ni heɓpa daŋ su, ma hurum suluk ma ci mul mamma kina?»

³² Jehu poŋ yam kolo gol ha ii zira na ni di ana, «Sa ma min a njun unna ni gege? Ni gege?» Suu ɦuɗusi ki paɗi suu li sunda vi mulna mba u hindi gis tasi ay egemu.

³³ Nam dasi ana, «Zuɗugira ay ki kaŋgaa.» Asi zuɗuɗ ay kaŋgaa. Ndaɗ ndi ay kaŋga busuɗuɗ ha ki pay gulumunna na dolɗoŋ. Jehu jak ha kolo kay maɗaɗ u kulumina u pus pusna halaŋ.

³⁴ Nam tuɗ kal voo, ti may, ci may, hin di ana, «Tuɗ pagi cara ki baay ndaɗta ha ki vagi ga na pii, kay ndaɗ ni goŋ mulnara.»

³⁵ Asi tuɗ ha a paɗta ni, tuɗ fi ni sok yamba may, gayaɗ may, u duk koɗ may, cuki kaŋga ni tle asina doy hol.

³⁶ Asi hoŋ ay mba di Jehu. Nam hin dasi ana, «Li ki ni boy ma Yawe dam ay ki fun saam ma sunda, Eli ma Tisbena ana, diginina hin kom tliw Jezabel ki hu sene ma Jizreelnana.

³⁷ Maɗ Jezabel hin mbuɗ ni a zirgit ma cim huu sene ma Jizreelna. Sa ka ndak a di ana wanni Jezabel na oloɗi.»