2 MULINA 8 - Boy Lonana

Mul ma Israelna wi hahaw cara Sunemba

¹ Elize di cara nam coloɗ gooroɗ ki kolo iirira ana, «Col kolo ndak u suu maksina halaŋ, tuɗugi ki hu mbassa daŋga kay Yawe gi mayra kay suu Israelna, may ndaɗta a li basara ni kiɗisiya.»

² Cara cola li ko ndal sa ma jok vun Lona daɗta na may. Ndaɗ tuɗ ni u suu maɗsina halaŋ. Tuɗ kak ha ki hu mbassa Filistinda li basara ay ki hu kiɗisiya.

³ Hu basara kiɗisiyara ni ndaɗ hin mbassa Filistinda, hoŋ ay vo hu mbas maɗta. Ndaɗ tuɗ ha a joɓ mulna kay ziiɗna u sene maɗna.

⁴ I fi ni mulna ka njaɗ ko tam u Gehazi, sa ma sunda vi sa jok vun Lona, dam ana, «Cuɗun dlara ŋgolora Elize laɗta ay ki na halaŋ halaŋ gige.»

⁵ Gehazi di mulna kay colla Elize col suu miɗina ki kolo iirira. Hu li namma cara mba funusi ni na tok gaw may ni, cara nam coloɗ goroɗ ki kolo iirira, mbay a joɓ mulna kay sene maɗna u ziiɗna. Gehazi dam ana, «Sa ŋgol manna, mulna, gola ni ca ndaɗta. Ni goroɗ ma nam colom ki kolo iiri namma gaw may.»

⁶ Mulna hin joɓ cara, ndaɗ vam u dla ndaɗta ki jiviya. Mulna gaɗ sa ŋgol ma asgaana fokoɗ di ana, «Tuɗ ɦaɗ tlegeyeɗ ki halaŋ halaŋ, ɦaɗ wa ma asi feɗem hu sene maɗnana lay, col ay hu mbassara ndaɗ tuɗ kira day ta ta cemi.»

Elize u Hazael

⁷ Elize tuɗ hu Damas. Hu li namma Ben-Hadad, mul ma Sirina, ga tuguɗiira may. Asi di mulna ana, «Sa ma vi Lonna mba ki ta ta varaygi tani.»

⁸ Mulna di Hazael ana, «Tli va koŋ nde ni tuɗ eg sa ma vi Lonna, joɓom ana, na ni an hin kal ki bunsu garaɗ ko tuguɗii ndaɗta ko su?»

⁹ Hazael tuɗ eg Elize. Nam yow njaf tlesuu jivi hu mbas masirana kam halaŋ, yow tlena kay jamballa na dok-fiɗi. Nam mbay, mba col fok Elize dam ana, «Goroŋŋa Ben-Hadad, mul ma Sirina, sunun ay egeŋ dan ana, Na ni an hin kal ki bunsu a garaɗ ki ko tuguɗii ndaɗta su?»

¹⁰ Elize di ana, «Tuɗ dam ana nam hin garaɗ kiyo, may a gasira ni Yawe takan ki ana nam hin miɗ kiyo.»

¹¹ Ŋgoo dagan nam ŋgaras irim kam na ŋgaras. Sa ma vi Lonna tiira.

¹² Hazael joɓom ana, «Sa ŋgol manna tii ni kay mege?» Elize hoŋom dira ana, «Kay an wi dla cora aŋ hin laɗ eg suu Israelnara. Aŋ hin ŋgalasi ziisi ma eŋŋa kiyo. Aŋ hin casi gorzoŋi masisina ki u ŋgewna. Aŋ hin njerɓesi goryosi suu gorina kiyo. Aŋ hin wakasi huu boyogosi suu wiina kiyo.»

¹³ Hazael hoŋ dira ana, «Saaŋ ma sunda di namma ni me zeneŋ mayge? Nam ndak a li dlara ko wanda na su?» Elize hoŋom dira ana, «Yawe dan ki ana aŋ hin mbuɗ a mul ma Sirina ni aŋu.»

¹⁴ Hazael hinim ha tani hoŋ ay eg sa ŋgol mamma. Nam joɓom ana, «Elize daŋ ay ana mege?» Nam hoŋom dira ana, «Nam dan ay ana aŋ hin suɗa.»

¹⁵ Vin maɗiira ni nam yow borgona, laɓam u yona, baaram kay mulna, nammi miɗi gaw. Hazael varak balamam a mulna.

Joram, mul ma Yudana

¹⁶ Hu basara vadlla hu li ma Joram ma goŋ Akabma a mulna hu mbassa Israella na ni, Josafat a mul ma Yudana may. Joram ma goŋ Josafat ma mul ma Yudana hin mbuɗ a mulna hu Yuda may.

¹⁷ Hu li ma nam mbuɗ mulna na ni, basaɗam ki ni dok-hindi yam mba'. Nam ti mulla hu Yerusalemmi basara kalavandi may.

¹⁸ Nam tli ni dlara vi muli suu Israelna ko suu vi Akabma lira na, kay nam ɗum goŋ Akabba umu. Nam li dlara ka ii Yawe jiviɗira.

¹⁹ May Yawe ka min a ɓalak mbassa Yudara kiɗi ni kay saam ma sunda David. Kay nam di ki ana nam hin ɦal pindil mayra ka tew kiɗira maŋ David u goryom a fafaɗta.

²⁰ Hu cokira Joram ka hu mullara ni suu Edomma garak ki duk tasi u mulla Yudara, tin mul masina ki kay tasiya.

²¹ Joram tuɗ hu Sair u pus pus mam suu duuna halaŋ. May duk njeŋgera wanni, mulna u sa ŋgol ma ŋgol pus pus ma duuna cuk duk suu duu suu Edomma, asi ŋgufum ki na cutl gaw. Suu duu suu Yudana pii ay mbay ki voo.

²² Col ay hu li namma day ni, suu Edomma hin ki ni kay tasiya ta ta cemi. Suu hu ɦoŋzi ma Libnana garak ki u asi ni hu coki ndaɗta lay.

²³ U dlara Joram laɗta halaŋ ka ɓiiri hu magaara Sunda vi Muli suu Yudanara.

²⁴ Hu li ma nam miɗna, asi pammi hu zulla hu li ma asi yam ana Ҥoŋzi Davidnana. Goromma Ahaziya varak balam a mulna ni namu.

Ahaziya, mul ma Yudana

²⁵ Hu li ma Joram ma goŋ Akabma li basara ki hu mulla doogo yam mba fok suu Israelna ni, Ahaziya ma goŋ Joram, mul ma Yudana, mbuɗ a mul ma fok suu Yudana may.

²⁶ Ahaziya mbuɗ a mulna ni basaɗam tew ki ni dok-mba' yam mba'. Nam ti mulla hu Yerusalemmi basara dew. Sem sum ana Atali ni goŋ Omri, mul ma Israelna.

²⁷ Nam li ni dlara Akab u suu mamsina laɗta. Li dlara ka ii Yawe jiviɗira ko ndal Akab u suu mamsina lira na. Kay nam ay ni somora u deera vi Akabba.

²⁸ Nam tuɗ ko tam u Joram ma goŋ Akabma a duu u Hazael, mul ma Sirina, hu Ramot ta Galaadta, may suu Sirina dag Joram aya.

²⁹ Mulna Joram tuɗ a cil mbilim ma suu Sirina dagam ayna hu Jizreel hu Rama ni hu li ma nam ka duu tam u Hazael, mul ma Sirina, may. Ni Ahaziya ma goŋ Joram, mul ma Yudana, tuɗ kaŋga hu Jizreel a gol Joram ma goŋ Akabma ma asi dagam ayna.