2 MULINA 7 - Boy Lonana

¹ Elize hoŋ dira ana, «Humugi boy ma vi Yawena haa. Yawe di ana, vini ko ndal wanda na, vun grek ma Samarina ni suuna hin gus fuɗta kelewna doogo yam mba' ni gursu dew ɦawaa, ɗowba kelew fuɗ jeɗeŋga dok-mba' u suk ma Samarina.»

² Sa ma mulna tuɗ jik tam u namma di sa jok vun Lona ana, «Lini Yawe co ay ni huulona na gaw lay ni, dlara aŋ njaɗaɗ wanda ndak a li su?» Elize hin dam ana, «Jiviya aŋ hin wi dla ndaɗta u iriŋu may ni, aŋ ka hin ŋgen tle asina funuŋgi.»

Kaŋ ma vi suu duu suu Sirina hin ki ɦawaa

³ Suu may suu tuguɗii busuna na fiɗi ha ki cuki doŋ kaana tok eg vun grek ma ŋgol ma kal vo Samarina. Asi njaɗ duk tasi ana, «Aygi lakaygi tani ɦawa na ca a juɓ miɗna ni kay mege?

⁴ Lini aygi min a cukŋi vo hu ɦoŋzina aygi hin laɓ ki lay, kay ana va ma ti ha ka hu ɦoŋzina oloɗi. Lini aygi lakaygi ni tani ni aygi hin laɓmi na lay. Mariyaɗ ni tuɗuygi hu kaŋ ma vi suu Sirina. Lini asi hiniygi iiri wa ni taygi donwa, li asi caygi kiyo ni aygi hin miɗ may.»

⁵ Fiɗigira wanni asi yow a tuɗ ga hu kaŋ ma vi suu Sirina. Asi mba fun kaŋŋa na tokŋi ka wi sa na dewɗi lay.

⁶ Kay hu kaŋ ma vi suu Sirina Yawe mba soora ŋgolla huwa. Sem kulumi suu duuna, pus pusna u gudik suuna soo na ɦur, saɓak cocoo. Suu Sirina ɓak tasi ana, «Mul ma Israelna warak muli suu Hitna u suu Egiptena, yowosi suu duu masisina ay a mba duuruygira wa.»

⁷ Njeŋgera mba may ni, asi yow piira a suɗ tasira. Asi noy kaŋ masina ka ni na duk, mbutluɓ masina, kulumina u korra lay.

⁸ Suu tuguɗii busuna suu fiɗina mba tew fun kaŋŋa na tok, asi sel hu mbutluɓ maa dew ni ti lay, ci lay. Ŋgoo dagan asi yow gursura u lorra, u barawina, tuɗ ŋgayasi ha kiyo. Asi hoŋ ay cuk hu mbutluɓ ma daŋŋa, yow tlena kosi zeɗ zeɗ a tuɗ ŋgayasi kira olo.

Suu ŋguy yam Samarina ka oloɗi. Mayra ka oloɗi lay

⁹ Suu tumina njaɗ duk tasi ana, «Ҥawaa, aygi li na ni ka jiviɗi. Buu ma karamma ni buu ma di boy ma ayra huna, lini aygi di ka kiɗi, hin lina fo kiwa ni, aygi ka ndak a puruɗ ki ko gaɗtaɗi. Tuɗuygi seleygi hu ɦoŋzina daygi suu vi mulnana kiyo.»

¹⁰ Asi mba yi sa ma juɓ vun grek ma kay ɦoŋzinana. Asi dam ana, «Ami ay ni hu kaŋ ma vi suu Sirina ni sa ha ka hu dewɗi. Del sa war ka gurniɗi lay. Tlesuu hin ha huna ni kulumina, korra u mbutluɓ masina. Asi hinim tam ka gaw gaw lay.»

¹¹ Sa ma juɓ vun grekŋa yi ha voo, jok boy namma ha maŋ suu vi mulnana.

¹² Mulna col kolo njeŋge di suu ŋgolo mam suu sunda ana, «An min neegi ki kay dlara suu Sirina laɗ wandara. Asi wi ki ana aygi mayra ka caygi cocoo. Asi hin kaŋŋa ki tuɗ ŋgay tasi ha ki ni duk bubura ni ana, suu ay ŋguyusina hin cuk ay ki bunsuwa. Aygi hin yowosi ni iiriya, hin cukuygi hu ɦoŋziisina may.»

¹³ Sa ma duk suu ŋgolo mamsina dew hin di ana, «Yowoygi kulumi suu vadl suu ka iiri tuna, asina hin fi maɗna wa ni kay sem suu Israel suu belna, sunuygi suuna u kulumi asina. Asi tuɗ gol u dla ndaɗta ay ki jiviya.»

¹⁴ Asi yow pus pusna mba' u kulumi masisina sun suuna a tuɗ cuɗ sem suu duu suu Sirina, dasi ana, «Tuɗugi gologi ay tuwa.»

¹⁵ Asi cuɗusi sesi ta ta tew ay ki fun mbo lum ma Yurdanna. Asi wi ana tlege suu vi suu duu suu Sirina ha ki cuki voɗ cocoo. Tlena ha ki cukira voɗ ni na ca ca. Barawina u tlesuu daŋ suu asi gikisi ka ki kay liŋŋana. Suu sunusi hana hoŋ ay cuɗ boy namma maŋ mulna.

¹⁶ Suu Israelna cuk ay ki tuɗ ɦurum kaŋ ma vi suu duu suu Sirina. Fuɗta gus hu buu namma ni kelewna doogo ni sili dew, ko sa ma jok vun Lona dira na, fuɗ jeɗeŋga ni kelew dok-mba' may.

¹⁷ Mulna sun saam ma nam tuɗ jik tam u namma ana nam tuɗ gol suuna, col vun grekŋa, may suuna tayam ki kaŋga vun grekŋa nam miɗ ki ko ndal sa ma jok vun Lona dira na.

¹⁸ Hu li ma sa ma jok vun Lona ɓak mulna di ana, «Vini maɗii wanni fuɗ jeɗeŋga kelewna dok-mba' yam fiɗi ni gursu dewna, ɗowba fuɗta daŋga kelew doogo yam mba' ni suŋgu dew u suk ma Samarina.»

¹⁹ Sa ma mulna jik tam kolo u namma cam wayra ana, «Lini Yawe co ay ni huulona lay ni dla ndaɗta ndak a li vini su?» Elize hoŋom dira ana, «Aŋ hin wi dla ndaɗta ki u iriŋu, may aŋ ka ŋgen va funuŋgi kama.»

²⁰ Dla ndaɗta hin lammi ko ndal ndaɗta na may. Suu Israelna tay sa ma mulna jik tam u namma ki ga vun grekŋa, nam miɗ kiyo.