2 MULINA 6 - Boy Lonana

Njeɗ ma viɗ ki hin famma

¹ Suu jok vun Lona di Elize ana, «Li ma ami lak fokoŋ hurum wanna goo saɓaki.

² Hinimi ami tuɗ fun mbo lum ma Yurdanna, gegelay ni ka mbal ay kom dew dew a mba min li ma aygi lak huna kiyo.» Elize hoŋosi dira ana, «Tuɗugiya.»

³ Sa maa dukusi dew ni di ana, «An ceneŋu, mariyaɗ ni tuɗ ay u suu sun maŋsina may.» Nam hoŋ dira ana, «Haa, an day haa.»

⁴ Nam tuɗ u asiya. Asi mba tew fun lum ma Yurdanna gijaŋ ka guna.

⁵ Hu li ma sa maa dew ka guna ay na ni, njeɗna peŋ ndi ki duk mbona. Nam sawalla kolo ana, «Yakkay, sa ŋgol manna, an cen njeɗ namma ay ni ceniya.»

⁶ Sa ma vi Lonna joɓ ana, «Nam ndi ni ara na ɗowge?» Nam takam li ma nam peŋ ha huna. Elize kus guna gikim ha hu li namma. Njeɗna gijaŋŋa lus ay ki kolo ni na gaw.

⁷ Elize dam ana, «Taɗam ha ki kolo egeŋ koŋŋa.» Sana maɗ kom ha na ni, tlam gaw.

Elize vi suu duu suu Sirina

⁸ Mul ma Sirina duu u suu Israelna. Hu li ma nam ka li tokka ko tam u suu ŋgolo mamsina di ana, «Vin wanni an tuɗ vi kaŋ manna hu li ma wannana.»

⁹ Sa ma jok vun Lona sun ay mba di mul ma Israelna ki ana, «Gol taŋ jiviya, jak hu li ma wannaɗi, kay mul ma Sirina ka ki buuri hu li namma.»

¹⁰ Mul ma Israelna sun suu asgaana nda gol li ma sa ma jok vun Lona di kamma ni fi ni, asi ki hu daŋ may. Dla ndaɗta li ko ndaɗta nara yaɗ bolowo.

¹¹ Mul ma Sirina hurum ɓeŋ ki cocoo. Nam yi suu mam suu ŋgolona egem dasi ana, «Sa ma ka dukuygi ma njun u suu Israelnana, agi ka gangina um kiɗi su?»

¹² Sa maa dukusi dew ni dam ana, «Ҥawaa, sa ŋgol manna, ni Elize, sa ma jok vun Lona ma ka duk suu Israelnana. Nam ndaki a gi u dlara aŋ ɓakaɗ ay kalafi hu liiŋ ma buunara ki maŋ mul ma Israelna.»

¹³ Nam di ana, «Tuɗ golongina aya, nam ka ni arage?» Asi dam ana, «Nam ka ni hu Dotan.»

¹⁴ Mulna sun kulumina u pus pusna, sun suu duuna ŋgol cocoo. Asi mbay njeŋge, ŋguy yam ɦoŋzina ki na cutl.

¹⁵ Sa sunda vi sa ma jok vun Lonna kal ay ki bunsu maɗii na feɗet. Nam wi suuna ŋguy yam ɦoŋzina ki na cutl u kulumina u pus pusna. Nam di Elize ana, «Ҥii, sa ŋgol manna, ay hin lay tay karammi nanage?»

¹⁶ Nam hoŋom dira ana, «Li ndaaɗi. Suu ka u ayna ni bolow su suu usi wannana.»

¹⁷ Elize cen Lona di ana, «Yawe, malam irim ki nam wi gige.» Yawe malam irim ki, sa sunda vi Elize wiya ni yam ɦinira ki ŋguffi u kulumina u pus pus ma kura, ki ŋguy kay Elize na cutl.

¹⁸ Suu duu suu Sirina mbay ga eg Elize. Nam cen Yawe ana, «Dug ii suu bolow ca asina kiyo.» Yawe dugusi irisi ki ko ndal Elize dira na may.

¹⁹ Elize dasi ana, «Kogi ni ka voɗ ndaɗtaɗi, ni ka ɦoŋzi nammaɗi, tuɗugi ay un an tuɗ takagi sa ma agi halam namma.» Nam tuɗusi ha ki hu ɦoŋzi ma Samarina.

²⁰ Hu li ma asi tew ki vo Samari may ni, Elize di ana, «Yawe mal ii suu asina ki asi wi gige.» Yawe malasi irisi ki, asi wiya ni asi ki ni duk gayra hu ɦoŋzi ma Samarina.

²¹ Mul ma Israelna wasi na ni di Elize ana, «Bunu, an ndak a casi ki su?»

²² Elize hoŋom dira ana, «Casi kiɗi, tew tew ni aŋ ka ndak a ci suu may suu asgaa maŋsina, yowosi ay daŋgayna fun duunana kiɗi. Suu ca asina aŋ ɦasi tina, ɦasi yona asi ciya, hinisi asi hoŋ vo eg mul masina.»

²³ Mul ma Israelna ɦasi ti ma ŋgolna, asi tiya, ɦasi cina asi ci may. Ŋgoo dagan nam hinisiya. Asi hoŋ vo eg sa ŋgol masina. Suu may suu Siri suu ɦurum mbassa Israella hinni sa ka tin sem ay kay mbassa vi suu Israelna oloɗi.

Mayra ŋgolla ndi hu Samari

²⁴ Hu cokira daŋga dew ni Ben-Hadad, mul ma Sirina, yow suu mam suu duuna tuɗ ŋguf yam zi ma Samarina ki na cutl.

²⁵ Vo hu ɦoŋzina ni may ŋgolla. Suu duuna ka hin va a kal ha hu zina voɗi lay, yam korra dewra gus ni gursu dok-kalavandi. Nus gugukka dew ni gus gursu vadl.

²⁶ Buu maa dew ni mul ma Israelna poy kolo kay yam gulumunna, cara yam ay kolo eŋga ana, «Sa ŋgol manna, mul manna, mbay njununu.»

²⁷ Nam daɗ ana, «Lini Yawe mba ka a njunukgi ni, an tanda hin njunukŋi u mege? Va ma hin ŋgay kolo ka oloɗi, wa kaɗi lay, sum veŋ kaɗi lay.»

²⁸ Mulna hin joɓoɗ hu olo ana, «Ndak minni mege?» Ndaɗ hoŋ dira ana, «Cara wanna dan ana, ɦal gorokŋa ay komoyna ki karami. Vini wanni ay hin komoy manna tu may.

²⁹ Ami hin zalami goronna kiyo, komomina ki may. Vinda wanni an daɗ ana ɦal gorokŋa ay komoyna kiyo. Ndaɗ hin ŋgay goroɗna ki ni na gaw.»

³⁰ Hu li ma mulna hum boy namma na ni, nam haa baraw mamma kiyo, a nam ki kolo kay gulumunnara ni suuna halaŋ wi ki ana nam cuk baraw bolna egemu.

³¹ Nam di ana, «Cemi ni yam Elize ma goŋ Safatna yam hin kolo kam wa ni, ko Lona lan dlara daŋ ki egenu.»

Elize di ana mayra hin daɓ kiyo

³² Elize ay kaki vo taraŋ varamu. Suu ŋgolo mamsina laki egem may. Hu li ma mulna sun saam ma sunda ay egemma, bay sa ma vun sunda mba egem tu may ni, nam di suu ŋgolo mam suu egemma ana, «Gologiya, goŋ sa ma ci maɗna sun sana ay egen ana tuɗ kaan yan kiyo. Hu li ma nam mbawa ni agi dugugi vunna ɦek kogi ha ki huwa. Na may sem sa ŋgol mamma ka tuɗ ay um dagan may.»

³³ Vunum bay ndi kaŋga tu may ni, sa ma vun sunda mba egem dam ana, «Wihaw ndaɗta mbaarayra kay ni Yawe. Ay a hin tin saaray kammi kay me ologe?»