2 MULINA 5 - Boy Lonana

Naaman ma tuguɗii busuna garaɗ kiyo

¹ Naamanni sa ma ŋgol asgaa suu duuna vi mul ma Sirina halaŋ. Mul mamma ŋgaam cocoo. Nam minim dlaamba cocoo. Yawe hin suu Sirina su kay suuna halaŋŋi umu. Na may sa ma wi yal duuna coco namma ki ni tumiya.

² Suu Siri suu mbay ɦurum zi ma vi suu Israelna kina, vi go tamara Israella ha usiya, gaɗ fok caŋ Naamanda a goo mbaɓu maɗta laɗ sunda.

³ Ndaɗ di cara varaɗta ana, «Ҥawaa, lini sa ŋgol manna tuɗ eg sa ma jok vun Lona ma ka hu Samarina ni, nam hin suɗum ay ki ko tuguɗii busu ma ka lam wanna.»

⁴ Naaman mba cuɗ boy namma maŋ mul mamma may, dam ana, «Gola ni dlara go tamara col ay hu mbassa vi suu Israelna daɗta.»

⁵ Mul ma Sirina hin di ana, «Aŋ gi taŋ hu voɗta tuɗ ni na gaw. An hin ɓii magaara ha maŋ mul ma Israelna.» Naaman tuɗa, yow doonora kam kelew va ma kis kis hindi, lorra kelew dok-karkiya, baraw ŋgolo ma luuna doogo may.

⁶ Nam tuɗ ɦal magaara mul mamma ɓiiriɗ hara maŋ mul ma Israelna ha ɓiiri huruɗ ana, «Hu li ma magaa ndaɗta faŋwa ni, an sunuŋ saan ma sunda Naaman ha ni ana aŋ suɗunna ay ki ko tuguɗii busuna na suɗge.»

⁷ Hu li ma mulna ndum magaa ndaɗta ndummi, haa baraw mam ma tamma ki di ana, «Anni Lona a ndak ci sana ki ci ni, hoŋ dliɗim layra su? A nam hin sunun sana ay ana suɗum ki ko tuguɗii busuna ni nanage? Agi wi ki ana nam halanni a honira ɦawaɗi su?»

⁸ Hu li ma Elize, sa ma vi Lonna, hum ana mul ma Israelna haa baraw mamma tamma kiyo ni, nam sun ha tuɗ di mulna ana, «Aŋ haa baraw maŋŋa ki ni kay mege? Naaman mbay egen tani, nam hin wi ki ana sa ma jok vun Lona ka vi suu Israelna.»

⁹ Naaman mbay u kulumi mamsina u pus pus mamma, mba col fun ziŋ Elizena.

¹⁰ Elize sun sana ay egem dew dam ana, «Tuɗ tluɓ taŋ kaŋga duk mbo lum ma Yurdanna aŋ aa kiɗisiya, taŋ hin mbuɗ ki jiviya. Aŋ hin mbuɗ ki teteɗ.»

¹¹ Naaman hurum ɓeŋ kiyo, gi tam hin di ana, «An cow ni ana nam hin kal ay ki coli fokonu, hin yi sem Yawe, Loomma, kanu, tin kom kay lin ma tanna may, hin suɗun ki ko tuguɗii busuna ni na.

¹² Mbo lum ma Abana u ma Parparna u ma Damasna ni ka ŋgol su mbo lum ma vi suu Israelnaɗi su? An ka ndak a mbus ha hu na ga garaɗ tan kiɗi su?» Nam hoŋ dagan u hurum ma yara.

¹³ Suu sun mamsina ɦuɗ tasi ay egem njaɗam dam ana, «Bunu, lini sa ma jok vun Lona di ana aŋ li ni dlara sa ka laɗɗira lay ni aŋ ka laɗɗi su? Nam daŋ ɦawa na ana, tluɓ taŋ kaŋgaa aŋ hin garaɗ kiyo, ni aŋ ka liɗi su?»

¹⁴ Naaman tuɗ kaŋga hu lum ma Yurdanna, tluɓ kaŋga duk mbona yam kiɗisiya ko sa ma vi Lonna damba na may, tam mbuɗ ki ni ko ndal ta goo zoŋŋa na. Nam mbuɗ ki teteɗ.

¹⁵ Nam hoŋ ay u suu umma halaŋ eg sa ma vi Lonna. Nam kal ha vo tuɗ col fokom di ana, «Cemi ni an wi ki ana kay yam ndaŋgara halaŋŋi lo ma daŋ kaɗi, ni Lona vi suu Israelna dew daŋ. Cemi ni an ceneŋu, vi tlesuu saaŋ ma sunda min a ɦaŋsina ɦawa wannana.»

¹⁶ Elize hoŋom dira ana, «U sem Yawe ma an ka sunum wanna an ka vaŋ va koŋgi.» Naaman tlam um ana nam viya ni, nam ka minɗi.

¹⁷ Naaman hin di ana, «Aŋ min ka a van va konɗi ni, cemi an ceneŋu hinin an yow ndaŋgara Israella kay koro suu Makkana mba'. An ka min a li ɓivun ma ŋgalam ki ŋgalina u ɓivun ma belna maŋ lo ma daŋ oloɗi. Ni maŋ Yawe Lona vi suu Israelna doy hol.

¹⁸ Na may joɓ vaɗ huuna ki fok jew eg Yawe kay hu li ma mul man ma Sirina tuɗ cen loom ma yam ana Rimmonna ni gi kom ni kelenu, tuɗ daɓ vogom ay ga duk ndaŋgara ni ko tami dew, ko Yawe heɓ hurum ki egen kay boy namma.»

¹⁹ Elize hoŋom dira ana, «Aŋ tuɗ u heɓpa.» Naaman hin tuɗ may. Hu li ma Naaman tuɗ ew daŋi

Cora Gehazi laɗta

²⁰ Gehazi, sa sunda vi Elize, sa ma jok vun Lona, ɓak tam hurum ana, «Sa ŋgol manna min ka a vi va ko Naaman ma Sirinaɗi, u sem Yawe an min liŋ um tuɗ vi va ay kon nde.»

²¹ Gehazi gi tam a cuɗ u Naamanda. Hu li ma Naaman wam ka liŋ ay ŋgorom dagan na ni, nam cuk ay ki kaŋga hu pus pus mamma, ŋgafam ay ni na gaw, hin joɓom ana, «Aŋ liŋ na ni nanage?»

²² Nam hoŋom dira ana, «Ҥawaa, sa ŋgol manna sunun ay ana an daŋ ana, koyogi suu taa col ay kay ɦinira Efrayimba na mba' fan haa, ni suu jok vun Lona may. An ceneŋu aŋ ɦan doono ay ii kelew dok-hindi may, ɦan baraw ay ii cuk mba' may.»

²³ Naaman hoŋ dam ana, «Mariyaɗ ni aŋ yow ni kelew dok-karkiya gaw.» Nam hin dam ana, ɦawaa, nam minni dok-hindi, barawna ii cukka mba' may. Cukusi ay hu mbumbura zeɗ zeɗ mba ɦasi ay maŋ saam ma sunda, ɦasi ha maŋ Gehazi, tinim ha ki voo.

²⁴ Asi mba tew Ofel may ni, Gehazi vasi tlena kosi cukusi vo varammi na gaw. Nam hin tin suu sunda vi Naaman ay ki wanni.

²⁵ Gehazi hoŋ ay eg sa ŋgol mamma. Nam joɓom ana, «Gehazi aŋ ay ni arage?» Nam hoŋom dira ana, «Sa ŋgol manna an ay ka liɗi.»

²⁶ Elize hoŋom dira ana, «Aŋ saa ana hu ŋgus manda an wi sa ma cuk ay ki kaŋga hu pus pusna, ŋgafaŋ ayna kaɗi su? Ni ka li ma vi baraw ma jivina tuɗi, ka li ma vi gursuɗi lay, ka a gus gugutlu tuɗi lay, yoori suu ŋgolona u suu gorinaɗi lay, suu sunda u boyogi suu sundaɗi lay.

²⁷ Kay ndaɗta busu ma vi Naamanna hin jokŋi kaŋu, ha kay njafaŋŋi na halaŋ halaŋ.» Hu li ma Gehazi gi tam hin Elize kana may ni, tam mbuɗ ki haɓpa ko fuɗ barawra na, busuna cukummi na gaw.