2 MULINA 4 - Boy Lonana

Dlara mbuɗ mbuɗta laɗ u mbulnara

¹ Cara dew duk boyogi suu vi suu jok vun Lonana mba cen Elize di ana, «Saaŋ ma sunda njufun ki ni miɗiya. Aŋ wi lay ana saaŋ ma sunda ay li ndaa Yawe cocoo. Sa ma bal mamma kamma mba a yowon gor njufii man suu mbana a tuɗ mbuɗusi ki a mborɓii mamsina.»

² Elize hin joɓoɗ ana, «Ndak min a an hin lakŋi ana mege? Dan ay gige. Va ma ha kok vona ni mege?» Ndaɗ hoŋom dira ana, «Caaŋga sunda va ha ka koɗ vo dewɗi. Va ma ha na ni huu mbul ma hisna hin ha hu guura ni na ndeŋ daŋ.»

³ Nam daɗ ana, «Tuɗ cen gegelina ha vi ndarayak suu zina suu ŋguy kakŋa. Cenem ha bolow cocoo.

⁴ Ŋgoo dagan ndak kal kalafi u goryoku, dugugi vunna ha kagiya, ɗee mbulna hu gegeli suu ndak taarasi hana. Gegel ma oy kina ndak tlam ki keŋe keŋe.»

⁵ Ndaɗ col ay mba duk vunna kaɗ u goryoɗu, asi ɦaɗ gegelina aya, ndaɗ ɗee mbulna hu may.

⁶ Hu li ma gegelina daɓ ki oyra may ni, ndaɗ di goryoɗ ana, «Ҥangi gegel ma daŋ ay zak.» Nam daɗ ana, «Gegel ka oloɗi.» Mbulna seŋ ɓaɗta ni na gaw.

⁷ Ndaɗ hoŋ ay mba di sa ma vi Lona. Nam hin daɗ ana, «Tuɗ gus mbulna ki gus gus ni, warak bal ma kakŋa kiyo. U gursura hin kokka ndak u goryok hin ti vunugi u ndaɗ may.»

Elize hu ɦoŋzi ma Sunemma

⁸ Fali taa dew ni Elize ka jak hu ɦoŋzi ma Sunemma. Cara ɦizira ka hu dew ni, tlam um ana nam tuɗ ti vo varaɗu. Hin fokka tew tew ni hu li ma Elize jak na ni, kak ti varaɗu.

⁹ Cara hin di njufuɗ ana, «An wi ana sa ma mba vo varay tew tew namma ni sa ma teteɗ ma vi Lonna.

¹⁰ Miniy goo zi ta kolo kay dudurna na min, ay hin tin layna hu may, tinim ses hu dew may, tinim pindilla ha hu may. Nam hin mba varay wa ni, hin koɗ tam huwa.»

¹¹ Fali taa dew ni Elize mba varasiya. Nam tuɗ koɗ tam u zira kolo kay ndaraɗta ndaɗta, buu huwa.

¹² Nam di saam ma lam sunda, Gehazi, ana, «Yan cara Sunemba ndaɗta ay gige.» Gehazi tuɗ yaɗ aya. Ndaɗ mbay, col fun goŋga.

¹³ Elize di saam ma sunda ana, «Tuɗ daɗ ana, ndak tak dlara jivira ki egemi cocoo, an hin lakŋi me mayge? An hin njaɗak dlak ki ni maŋ mulna u sa ma ŋgol asgaana su?» Ndaɗ hoŋom dira ana, «An ka kaki u heɓpa duk suu mansina.»

¹⁴ Elize joɓ tam u Gehazi ana, «Ay hin lay ni me kaɗge?» Gehazi hoŋ dira ana, «Ҥa haa ndaɗ ni goo ka koɗɗi. Njufuɗ ki mbuɗi ni ŋgol lay.»

¹⁵ Elize hin di ana, «Yaɗ aya.» Nam yaɗu. Ndaɗ mba col fun goŋga.

¹⁶ Elize daɗ ana, «Daa ko ndal wanda na ni ndak vi goona ki u tlawaku.» Ndaɗ dam ana, «Ҥawaa, sa ŋgol manna, di dlara kaboyna maŋ caaŋga sunda naɗi.»

¹⁷ Cara hin vi wiina, tew kay seɗ ko ndaɗta na ni, ndaɗ hin vuɗ go njufna ko ndal Elize daɗta na may.

Goŋ cara Sunemba miɗ kiyo

¹⁸ Goona wul kiyo. Fali taa dew ni nam tuɗ ŋgoo u bum a gol suu feɗ wana.

¹⁹ Nam di bum ana, «Yanu, yan canu.» Bum di saam ma sunda ana, «Tli gogoona, tuɗum ha vo maŋ sumu.»

²⁰ Sa ma sunda tlam tani, mbaam ay maŋ sumu. Goona kaki ɓal sum gak gak tew faaliya, hin dug irimmi na gaw.

²¹ Ndaɗ ɗiŋ kolo hu zira kay ndaraɗta kolora, gam ha kay lay ma vi sa ma vi Lonna, dugum vunna ha kam, kal ay ki ni na gaw.

²² Ndaɗ yi njufuɗ dam ana, «An ceneŋu sunun sa ay duk suu sunda dew, van kor ay dew may. An tuɗ vi sa ma vi Lonna hin hoŋ ay cemcem.»

²³ Nam joɓoɗ ana, «Ndak min a tuɗ varam cemi ni kay mege? Ka buu ma tilna a dayraɗi may, ka buu ma koɗ taraɗi may nige.» Ndaɗ hoŋom dira ana, «Li ndaaɗi, boy kaɗi.»

²⁴ Ndaɗ gan korra, di saaɗ ma sunda ana, «Tuɗun haa, aŋ col dukgi lay ta ta an daŋ tuwa.»

²⁵ Ndaɗ tuɗa, tuɗ eg sa ma vi Lonna kolo kay ɦinira Karmella. Hu li ma sa vi Lonna waɗ ay na day may ni, nam di saam ma sunda, Gehazi, ana, «Gola, caayra Sunemba tuɗ ay cowna.

²⁶ Liŋ ŋgafaɗ vogoɗ haa, joɓoɗ ana ndak mba na ni ɦawaa ko su? Ndak ki ɦawa su? Njufuk ka ɦawa su? Gogoona ka ɦawa su?» Ndaɗ hoŋom dira ana, «Ami halaŋ ka ɦawaa.»

²⁷ Tew eg ɦinira tok eg sa ma vi Lonna may ni, ndaɗ vam sem koɗ na ndiŋ ndiŋ. Gehazi ɦuɗ tam ay a dikiɗ kira. Sa ma vi Lonna di ana, «Hiniɗu kay ndaɗ ka ni hu yoora. Yawe ŋgayan dlaaɗ ndaɗta ki irinu, dan boy namma ka ki jewɗi.»

²⁸ Ndaɗ dam ana, «An joɓ goo ko sa ŋgol manna su? An daŋ ka ana kalan hu dlara yooraɗi naɗi su?»

²⁹ Elize di Gehazi ana, «Njun gandi maŋŋa huruŋu. Tlan tokolo manda koŋ, tuɗa, lini aŋ ŋgaf sa voɗwa ni gam deɓbi. Lini sa gaŋ deɓe ni, aŋ humbi. Aŋ tuɗ gaŋ tokolo manda kay vok goona.»

³⁰ Su goona hin di ana, «U sem Yawe ma ka iiri din dinna, u seŋ aŋ taŋga, an ka hiniŋ ka kiɗi.» Elize col kolo tuɗ uɗ may.

³¹ Gehazi kal ha ki fokosi jewe. Nam gi tokolora kay vok goona na ni, va li ka na ndeɗi. Gehazi hoŋ ay mba ŋgaf Elize hin dam ana, «Goona dliɗ kaɗi.»

Elize col goŋ cara Sunemba ki kolo iiriya

³² Elize mba tew voo, fi goona ki ni miɗi daŋ may gi kay lay mamma.

³³ Elize kal ha kalafi, duk vunna kamu, gijaŋ cen Yawe.

³⁴ Ŋgoo dagan nam hin buu kay goona, tin vunum funum may, irim kay irim may, kom kay kom may, hin buuri kam na si, mbalata goona hin gi ay kura.

³⁵ Elize cuk ki kaŋga hu goŋga, tuɗ kolo u sem hu goŋga na cow cow. Hoŋ ɗiŋ kolo buu kay goona olo. Gogoona ercew yam na kiɗisiya, hin mal irim kiyo.

³⁶ Elize yi Gehazi ay dam ana, «Yi cara Sunemba haa.» Nam yaɗu. Ndaɗ hin mbay eg Elize. Nam daɗ ana, «Tli gorokŋa haa.»

³⁷ Ndaɗ mbay gi taɗ ga u sem, goɓomu, hin tli goroɗna, kal ki may.

Elize mbuɗ dlem ma galaana ki jiviya

³⁸ Elize hoŋ ay hu Gilgal hu wanni mayra ka ci hu cocoo. Suu jok vun Lona ka moli fokom may. Nam di saam ma li sunda ana, «Mbus huu gidir ma ŋgolna ki, zal dlemma ay maŋ suu jok vun Lona.»

³⁹ Sa maa dukusi dew ni tuɗ hu senena duɗ dlemma aya. Nam fi gugutlu ma ŋgoo bagina. Hu li namma nam duɗ kusi gukkara ay kom hu baraw mamma na ɦayaŋ, mba gaɗ kuŋgu duk dlemma kay sa ka wi ana ndaɗ cooraɗi.

⁴⁰ Asi ɓorow dlemma ha ki maŋ suuna wanni. Hu li ma asi juk dlem namma na ni, sawalla ha kolo ana, «Sa ma vi Lonna, maɗna ka hu gidirna.» Asi ka ndak a tambi.

⁴¹ Sa ma vi Lonna di ana, «Ҥangi fuɗta aya.» Nam cuk fuɗta kuŋgu hu gidirna di ana, «Ɓorowom ha ki maŋ suuna asi tiya.» Va ma co hin ka duk oloɗi.

Elize ɦal tina maŋ suu kisna

⁴² Hu coki ndaɗta sana dew col ay hu Baal-Salisa mbaa funa ay maŋ sa vi Lonana na dok-mba', kus yam wa ma neeyna ay kam hu mbumbuna may. Elize di ana, «Ɓorowom ha ki maŋ suuna, asi tamu.»

⁴³ Saam ma sunda hoŋ dira ana, «Fu ma ew wanna hin ɓorow maŋ suu kisna ni nanage?» Nam dam ana, «Ɓorowosina haa. Asi ti ɗow. Yawe di ana, asi hin tiya, hoɓa, um hin hin ki kosi lay.»

⁴⁴ Sa ma sunda ɓorowom ii suuna ni na gaw. Asi tiya, um hin ki ko ndal Yawe dira na may.