2 MULINA 3 - Boy Lonana

Joram mul ma Israelna

¹ Joram ma goŋ Akabma mbuɗ a mulna kay suu Israelna hu Samari ni hu li ma Josafat, mul ma Yudana, li basara ki hu mulla ni doogo yam kalavandi may. Joram ti mulla ni basara doogo yam mba'.

² Nam li dlara ka ii Yawe jiviɗira, ka saɓaki ko gi bum u sum lira naɗi, kay nam to ɦinira ceɗi teteɗta ta bum minisi maŋ Baalla kiyo.

³ Na may ni nam njun tam eg dla cora Jeroboam ma goŋ Nebatna laɗta, cuk suu Israelna hu dla cora halaŋ. Nam fuɗ tam ka ki ko dla co ndaɗtaɗi.

Suu duuna tuɗ a duu u mbassa Moabba

⁴ Misa, mul ma Moabma, ni sa ma yoorina. Hu basara dew ni nam ɦal taara maŋ suu Israelna, gor timigii suu njufiina buɓ buɓ kis, gamlagina buɓ buɓ kis may, u tlimiɗisira cil barawna hu may maŋ mul ma Israelna.

⁵ May hu li ma Akab miɗ kina ni, mul ma Moabma mbuɗ yara ki u mul ma Israelna.

⁶ Mulna Joram kal ay ki hu Samari kay a tuɗ gol suu duu suu Israelna ki halaŋ halaŋ.

⁷ Nam hin gi vun sunda eg Josafat, mul ma Yudana, dam ana, «Mul ma Moabma mbuɗ ki yara u anu, aŋ min a mbay taɓ u an a ay duurina su?» Nam hoŋom dira ay ana, «An tuɗ haa, dlara varanda ni ko ndal maŋga na lay. Suu mansina ni ko suu maŋsina na lay. Kulumi mansina ni ko kulumi maŋsina na lay.»

⁸ Nam hin joɓom ha hu ana, «Ami hin tli ha ni voɗ taarage?» Nam hoŋom dira ana, «Tlagi ay ni ŋgoo bagi hu fulla Edomba na.»

⁹ Mul ma Israelna, mul ma Yudana u mul ma Edomma cuk tasi voɗ ni na gaw. Asi li buuna u tuɗta na kiɗisiya. Yo ma cira daɓ ki kosiya, ma ɦal maŋ kulumina kaɗi lay.

¹⁰ Mul ma Israelna di ana, «Ҥii, Yawe yi muli suu hindi asina ay ki ni a ɦasi ki ni hu duk ko suu Moabma.»

¹¹ Josafat di ana, «Sa ma jok vun Lona ma vi Yawe maa ka tani a ay ndak a joɓoygi Yaweɗi su?» Sa maa dew duk suu sun suu vi mul ma Israelna hin di ana, «Elize ma, goŋ Safatna ma li ay poy u tasi ha sa ma jok vun Lona, Elina, ka dukuygi tani.»

¹² Josafat di ana, «Yawe ka u namu.» Mul ma Israelna u Josafat u mul ma Edomma halaŋ tuɗ ki kaŋga egemu.

¹³ Elize di mul ma Israelna ana, «Va ma taɓan u aŋŋa ni mege? Tuɗ joɓ suu jok vun Lona suu vi buŋŋa u suu vi suŋŋa.» Mul ma Israelna hoŋom dira ana, «Ҥawaa, Yawe yi muli suu hindi cana ay ni a ɦasi ki hu duk ko suu Moabma daŋ may.»

¹⁴ Elize di ana, «U sem Yawe ma ka iiri din dinna ma Saɓakŋa Kom Belna, li ni Josafat, mul ma Yudanaɗi ni, an ka caa yan kay boy maŋŋaɗi. An ka a goloŋ iriŋgi lay.

¹⁵ May cemi wanda ni yangi sa ma bu diŋ maa ay dew.» Hu li ma sana ka bu tlena na ni, ko Yawe mbay kay Elize ni na gaw.

¹⁶ Nam di ana, «Yawe di ay ana, suuna vek goloŋga kaŋga tani bolowra na di di.

¹⁷ Yawe di ana agi ka wi babaa paɗɗi lay, ka wi lo siɗi lay, na may hu li namma tani halaŋ hin oy ki u mbona. Agi ndak a ciya, ɦal maŋ yoori magisina lay, klumina lay bel.

¹⁸ Ni dlara ewra ii Yawe ɦawaa. Nam hin ɦagi mbassa Moabba ki hu duk kogiya.

¹⁹ Agi hin ɓalak ɦoŋzi ma ŋgolo ma saɓakŋa ki halaŋ, ŋgal ɦoŋzi ma ŋgolona ki halaŋ. Agi hin ka ŋgusugi suu tira ki ga bel bel. Agi hin tos goloŋga ci mbona hura ki bel bel. Agi cuk gogoyra ki hu sene ma asi horokomma.»

²⁰ Vin maɗi tew ki hu faɗta ndak a li ɓivunna may ni, mbona col ay ɓaɗta irim ay vo Edom na ɗow. Mbassa halaŋ oy ki u mbona.

²¹ Suu Moabma hum ana mulina yow ay a mba duu u asiya ni, asi tok njufii suu ki ndaki a yow kawi ma duuna kosina ay halaŋ halaŋ u suu basaɗasi jak kina lay. Asi mbay buu ki kaŋga ii haka masira.

²² Maɗiira fo ki fo ni, suu Moabma yow ki koloo. Faɗta day ay ki day ni, asi gol mbona na ni, mbona ki tlawra ko busuna na.

²³ Asi ɓak tasi ana, «Ni busuna gasi daŋ may. Mulina wanni li ka ci tasi co co wa. Asi li ka hoŋ duuna ni duk tasiya. Cemi agi suu Moabma li ni me ologe? Tuɗ ɦurumugi tlena.»

²⁴ Asi ɦuɗ tasi ha eg kaŋ ma vi suu Israelna. Suu Israelna dukusi ci suu Moabma. Asi yow liŋŋa fokosiya. Asi mba cuk vo hu Moab, casi cocoo.

²⁵ Asi hawaɗ ɦoŋzina kiyo. Gegelay ni gik gogoyra komba ha ki duk sene ma asi horokomma, oy huu senena ki u gogoyra. Asi tos goloŋga asi caɗta ki bel bel, ka ŋgusugi suu tira ki kaŋga halaŋ halaŋ. Hin kolo ni gulumun ma vi Kir-Heresna doy hol. Asgaa suu duu u gewrek gewrekka mba ŋguf ɦoŋzi namma ni asiya.

²⁶ Hu li ma mul ma Moabma wi ana nam ka tewɗi ni, nam yow suu li duuna u ŋgewinana um na kis kis kiɗisiya, tuɗ a ndug ziŋ mul ma Edomma. May suu asina hin tew kaɗi lay.

²⁷ Nam vi gorom ma ŋgolna ma hin a varak balamam hu mullana, ŋgaɗam ki kay gulumunna a li ɓivun ma ŋgalam ki ŋgalina. Suuna li yara coco, suu Israelna hoŋ ay ki vo hu mbas masira.