2 MULINA 25 - Boy Lonana

Nabukodonosor ndug ɦoŋzi ma Yerusalem

¹ Hu basara dleeŋera a Sedesiyas ki hu mullara, hu til ma doogona buuna doogo hu til namma ni, mul ma Babilonna mbay u suu mam suu duuna, mba ndug ɦoŋzi ma Yerusalemma, ŋguf ki kam na cutl, min tasi ki ni a mun duunara gaw. Min ziisi vi mbutluɓma ŋguyum ki kay yam zina halaŋ.

² Ҥoŋzina ka doo kay tam gak gak tew ki hu basara doogo yam dew ta Sedesiyas kaki a mulnara.

³ May ŋgolla ndi hu ɦoŋzina cocoo. Va ma ti ka oloɗi tew hu til ma fiɗina buuna dleeŋe.

⁴ Asi co ii gulumunna. Suu asgaarina halaŋ pii kiyo, cuk ki hu vun ma duk hoŋ gulumunnana duk njeŋgera hu sene ma vi mulnana na. Suu Kaldena ŋguf kay gulumunna cutl na may asi cuk kiyo. Asi tli voɗta tuɗ ɦudugumba Yurdanda na.

⁵ Suu duu suu Kaldena cuɗ u mulna ta ta tuɗ vam ay ki ni hu fulla Yerikora tana. Suu asgaari mamsina halaŋ tli voɗta daŋga, noyom ki vay damu.

⁶ Suu Kaldena vi mulna Kemmi tuɗum kolo hu Ribla eg mul ma Babilonna. Suu Babilonna kaɓakŋa kay mulna Sedesiyas ni hu li namma.

⁷ Asi ŋgaɗ goryoŋ Sedesiyasna ki kaŋga irimmi na gok gok. Ŋgoo dagan Nabukodonosor hin co ii Sedesiyas ki jak may. Njunum u galina mba tuɗum vo hu Babilon.

Tlira tli Yerusalem kira, Yow suuna tuɗusi hu mbassa daŋŋa a mbara

⁸ Hu basara doogo yam dleeŋe ta Nabukodonosor kaki a mul ma Babilonnara, hu til ma vadlna, buuna kiɗisiya ni Nebuzaradan kal hu Yerusalem. Nammi sa ma ŋgol suu asgaana, sa ŋgol ma vi mul ma Babilonna.

⁹ Nam ŋgal Ziŋ Yawera kiyo, ŋgal ziŋ mulnana ki may, ŋgal zi ma Yerusalemma ki halaŋ halaŋ, to zi ma vi suu ŋgolonana ki bel bel.

¹⁰ Suu duu suu ha u sa ma ŋgol suu asgaanana hawaɗ gulumun ma mini kay ɦoŋzi ma Yerusalemma ki kaŋgaa.

¹¹ Nebuzaradan ma ŋgol suu asgaana yow u suu hin vo Yerusalemma u suu viɗ ay ki suu taɓ ki gin u suu Babilonna u suu may suu hu ɦoŋzina suu maa vo dew dewna halaŋ, tuɗusi ki Babilon.

¹² Sa ŋgol ma fok suu asgaana hin suu ɦawa suu ka hu Yerusalem nde kay a asi li sene gugutluna, horok senena ka may.

¹³ Suu Kaldena kus mbal ma duk hu Ziŋ Yawera ma mini u kawi ma tlawna kiyo u tassa ma ŋgol ma bus zozoɗta ma yoori u kawi ma tlawna tini kurufu huu taraŋga hu Ziŋ Lonara. Asi toom ki lay. Asi yow kawi ma tlawna halaŋ, tuɗum ki hu Babilon.

¹⁴ Asi yow tasina, pelna, u gi kukuɓma, kobii suu ci yonna u tlesuu li sunda suu yoori u kawi ma tlawna halaŋ suu ka li ɓivunna u asina.

¹⁵ Sa ma ŋgol suu asgaana yow ganunna u tlesuu yam busuna suu yori u doonora u lorrana lay.

¹⁶ Kay mbal ma duk mbana u tassa ŋgol ma dew ma go yo ma mbus zozoɗta u semma suu Salomon minisi ka hu Ziŋ Yawera u kawi ma tlawna sa ndak ka a ŋgaasi nekesiɗi.

¹⁷ Mbal namma ma dewna fiyekemmi meter dleeŋe, yamba kolora ay ki kuluɓi u jum kawi ma tlawna wuluɗ kolo ni meter dew u nus, keŋeɗ ki ŋguy ndalla ko ndal vuɗ grenadinna na. Halaŋŋi u kawi ma tlawna. Mbal ma duk mba namma ay ni na, u bayna ni na lay.

¹⁸ Sa ma ŋgol asgaana vi Seraya, mul ŋgol ma li ɓivunna, u Sefaniya ma funumma, yow suu juɓ u lina hu hindi may.

¹⁹ Nam vi sa ŋgol ma fok suu asgaanana may, yow suu vadl suu may suu li sunda vi mulnana may. Asi ka ni hu ɦoŋzina huwa. Nam vi sa ŋgol ma ɓii dlara kaŋgana, sa ma ŋgol asgaana ma ka yow suuna fun sundana, duk suu asina suuna ka hu ɦoŋzi ŋgolna hu ni dok-karkiya.

²⁰ Nebuzaradan ma ŋgol asgaa suu Kaldena yowosi daŋgayna halaŋ, mbaarasi ay ki fok mul ma Babilonna hu Ribla.

²¹ Mul ma Babilonna casi poŋga, hin casi ki maɗna hu Ribla tana hu mbassa vi Hamatta. Suu Yudana mbuɗ ha ki eg mbas masira day ni ko ndaɗta na.

Gedaliya, sa ŋgol ma hu mbassa Yudarana, asi cam kiyo

²² U suu may suu hin ka vo hu mbassa Yudara, Nabukodonosor, mul ma Babilonna, tin ka fokosi a mul ma hu zinana ni Gedaliya ma goŋ Ahikamma, a goŋ ŋgolo ma vi Safanna.

²³ Hu li ma suu ŋgolo suu asgaarina u asgaari suu gori suu Yudana hum ana mul ma Babilonna tin Gedaliya ka a mulnawa ni, asi mba fam hu Mispa tana u suu masi suu duuna usiya. Ni Ismael ma goŋ Netaniyana, Yohanan ma goŋ Karena, Seraya ma goŋ Tanehumetna ma ay Netofana u Yazaniya ma goŋ Makana.

²⁴ Gedaliya hin dasi suu masisina ana, «Lagi ndaa ko suu Babilonnaɗi, mbay cukugi vo hu mbassa tani. Humugi u gaɗta vi mul ma Babilonna ni agi hin fi jivira.»

²⁵ May, hu til ma kiɗisiyana ni Ismael ma goŋ Netaniyana goŋ ŋgolo Elisama ma ay hu deera mullana, mbay u suuna um doogo, mba ci Gedaliya kiyo, ci suu Yudana u suu Kalde suu ka cuki dukusina ki lay.

²⁶ Suuna halaŋ suu ŋgolona u kemba u suu ŋgol asgaarina cuk tasi voɗ a tuɗ Egipte ko ndaa suu Kaldena ni na gaw.

Mul ma Babilonna wi hahaw Joakin

²⁷ Li basara na dok-hindi yam kiɗisiya hu li ma vi mulna Joakin ha ki daŋgayna hu Babilonna ni Evil-Merodak varak a mul ma Babilonna. Hu buuna dok-mba' yam kiɗisiya hu til ma doogo yam mbana hu basa ndaɗta ni nam wi hahaw Joakin, gam ay ki hu daŋgayna.

²⁸ Nam njaɗammi u jivira, ɦam lina ni ŋgol su ndarayam muli suu daŋŋa halaŋ suu ka u nam hu Babilonna.

²⁹ Nam di Joakin ana ka nam cuk baraw ma daŋgayna tam oloɗi. Nam hin ti tiimma ni kay tabulla ko tam u mul ma Babilonna dew.

³⁰ Kay ndaɗta hu buuna halaŋ ta ta hu miɗ mamma ni Joakin fi tlesuu jivi suu ŋgom tamma ko mul ma Babilonna halaŋ.