2 MULINA 24 - Boy Lonana

¹ Nabukodonosor tli mbassa Yudara ki ni hu li ma nam kaki a mulnana. Joakim hoŋ yam kaŋga umu, may tew hu basara hindira may ni nam hoŋ col yara u namu.

² Yawe sun suu ɦurumba ay kay Joakim. Suu Babilonna, suu Arameemma, suu Moabma u suu Amonna, asi mba ɦurum mulla Yudara ki ko ndal boy ma Yawe dam ay ki fok jew fun saam ma jokom vunumma na.

³ Dla ndaɗta li na ni kay Yawe min a ndaɗ li na ni nam daŋ may. Nam min a bulum mbassa Yudara ki fokomu. Ni kay dla cora Manase laɗta u dlara nam laɗta halaŋ.

⁴ Olo ni kay busu suu li va kaɗi ma asi voom ki kaŋga ɦawa bay uɗna. Dla co ndaɗta oy ki hu Yerusalem. Yawe ka min zi ma Yerusalem namma oloɗi, ka min a heɓ hurum eg zi nammaɗi.

⁵ U dlara vi Joakim u sunda nam laɗta halaŋ ka ɓiiri hu magaara Sunda vi Muli suu Yudanara.

⁶ Joakim buu kaŋga eg somoyom wa. Goromma Joakin varak balamam a mulna.

⁷ Mul ma Egiptena ka kal ay ki kiɗik oloɗi kay mul ma Babilonna ɦurum tlesuu vi mul ma Egiptena ki ni bel bel. Col ay fun mbo lum ma Egiptena day ta ta tew ha ki fun mbo lum ma Efratna.

Joakin, mul ma Yudana. Yowra yowosi ki mbaɓura jewra

⁸ Joakin kak a mulna ni basaɗam tew ki ni doogo yam kalavandi. Nam ti mulla hu Yerusalemmi tilna hindi. Sem sum ana Nehusta, ndaɗ ni goŋ Elnatan ma Yerusalemma.

⁹ Nam li dlara ka ii Yawe jiviɗira ni ko ndal bum lira na dege dege may.

¹⁰ Hu coki ndaɗta ni suu sun suu vi Nabukodonosor, mul ma Babilonna, yow kolo duuna eg ɦoŋzi ma Yerusalemma, mba ndug zina ni na gaw.

¹¹ Mulna Nabukodonosor u tamba mba u suu mamsina suu ndug ɦoŋzi ma Yerusalemma lay.

¹² Joakin, mul ma Yudana, kal ay ki fok mul ma Babilonna. Namu u sumu, suu sun mamsina u asgaa mam suu ŋgolona halaŋ, nam mulna yowosi daŋgayna. Ni hu li ma Nabukodonosor li basara ki hu mulla kalavandina.

¹³ Ko ndal Yawe di ay ki jewra na, nam yow begera hu Zira vi Yawera ki halaŋ halaŋ u begera vo hu ziŋ mulnara lay. Nam to tlesuu yoori u lorra suu Salomon, mul ma Israelna, minisi ka hu Ziŋ Yawerana ki bel bel.

¹⁴ Nam yow tlesuu hu Yerusalemma ki halaŋ, yow mulina u suu ɦizina halaŋ, yow suuna ni va ma buɓ buɓ doogo, yow suu yoo kawina ki halaŋ u suu min pus pusna. Hin ka ni suu gori suu vo hu mbas ndaɗtana ɦawaa.

¹⁵ Nam tuɗ Joakin ha ki hu Babilon u su mulna lay. Nam tuɗuɗ ha ki Babilon. Boyogi suu vi mulnana u asgaa mam suu ŋgolona, muli suu hu mbas ndaɗtana bel, nam yowosi ha hu Yerusalem tuɗusi ha ki hu Babilon.

¹⁶ Suu ɦizina halaŋ li va ma buɓ buɓ kiɗisiya, suu yoo kawina u suu caffa halaŋŋi buɓ dew may. Suu asgaa suu saɓak cocona halaŋ mul ma Babilonna tuɗusi ha ki hu Babilon.

¹⁷ Mul ma Babilonna tin mul ma daŋŋa ka ki balam Joakin. Nam varak ka ni Mataniya ma bu mba Joakinna. Nam hin jokom sem ki ana Sedesiyas.

Sedesiyas, mul ma Yudana

¹⁸ Sedesiyas kak a mulna na ni basaɗam tew ki ni dok-mba' yam dew. Nam ti mulla hu Yerusalemmi basara doogo yam dew. Sem sum ana Hamulal. Ndaɗ ni goŋ Irmiya ma Libnana.

¹⁹ Nam li dlara ka ii Yawe jiviɗira ni ko ndal Joakim lira na dege dege olo.

²⁰ Yawe u hurum ma ɓeŋ ki namma mbaa yoora kay ɦoŋzi ma Yerusalemma u mbassa Yudara halaŋ, dikisi ha ki egem na day. Sedesiyas mbuɗ yara u mul ma Babilonna.