2 MULINA 23 - Boy Lonana

Josiyas mbuɗ Galamba u Lonara wili gadla

¹ Mulna sun kay suu ŋgolo suu Yudana u suu Yerusalemma ana asi halaŋ tok ay egemu.

² Ŋgoo dagan nam tuɗ kolo hu Ziŋ Yawera u suu Yudana um halaŋ u suu cuki Yerusalemma lay. Muli suu li ɓivunna, suu jok vun Lona u suuna halaŋ suu ŋgolona u kemba. Nam ndumusi boy ma hu magaara gaɗta kay galamba vaɗ u Lonara ta faɗ ay hu Ziŋ Yawera ki fokosi halaŋ.

³ Mulna col ki kolo u sem eg mbal ma coli duk hu Ziŋ Lonarana, nam mbuɗ Galamba ki wili daŋgadla u Yawe. Gegelay ni mba li ki ɗegee fok Yawe a hum u gaɗ mamba u hurum halaŋ u saa mamba halaŋ, hum u haɗ mamba may u dlara ɓiirira halaŋ, li uɗ may. Hum u dlara ɓiiri hu magaara galam ndaɗtara halaŋ. Suu tokina halaŋ vi haɗ ndaɗta kasi halaŋ a li uɗta may.

Vira vi suu Yudana jok ki zeɗ

⁴ Mulna ɦal voɗta maŋ mul ŋgol ma li ɓivunna, Hilkiya, u muli suu li ɓivun suu daŋŋa u suu juɓ vun Ziŋ Yawera ana asi yow tlesuu cuki kalafi hu Ziŋ Yawerana ay kiyo, tlesuu asi minisi a goɓ Baalna halaŋ u suu maŋ Aserana u tlesuu kolo huulonna, tuɗ ŋgalasi ha ki doŋ kaa ma Yerusalemma, duk ɦudugumba Sedron ma asi pamma, toorosi butusi cukum ha ki hu lokka Betel.

⁵ Josiyas dik suu jok vun Lona suu kaboyna suu muli suu Yudana tinisi a li ɓivunna, ŋgal tlesuu his jivina kolo kay li mbuyna ki halaŋ. Nam dikisi kay asi li ɓivunna ni maŋ Baal, maŋ faɗta, maŋ tilna, maŋ gi ciciwra u gi vel ma kolona.

⁶ Nam tli gu ma ceɗi teteɗna ma vi Aserna ma asi colom kalafi hu Ziŋ Yawerana ay ki bunsuwa, tuɗum ha ki doŋ kaana Yerusalem. Asi ŋgalam ha ki hu ɦuɗugumba Sedron ndaɗta, cukum butum ha ki hu zul ŋgolla suuna kaɗ bella.

⁷ Nam hawaɗ ziŋ gawlaŋii suu teteɗta ki may, liiɗ ma ay kalafi hu Ziŋ Yawerana, ta boyogina cil baraw ma vi loosi ma yam ana Asterana ay hura.

⁸ Josiyas tok muli suu li ɓivun suu Yudana suu ay hu Geba, ta ta hu Ber-Seba, suu ŋgolo suu hu ɦoŋzi ma Yudana halaŋ, nam ɓalak li may ma teteɗ ma asi li ɓivunna kolo huna ki bel bel. Hu Yerusalem asi hawaɗ li ma ŋgal ɓivunna ma mini kolo fun vun grek ma kay ɦoŋzinana ki lay u ma ka fun vun ma vi Josuwena, sa ŋgol ma hu ɦoŋzinana bik gulu hu vun ma kal ha vona na.

⁹ Na may muli suu li ɓivun suu ay li ɓivunna kay li ma mbuy kolona, nam hinisi ka a li ɓivunna hu Yerusalem maŋ Yaweɗi, na may asi ndak a ti fu ma bay kuffa dukumma ko muli suu li ɓivun suu daŋŋa na may.

¹⁰ Nam mbuɗ li ma yam ana Tofetna ki njenjera. Li namma ay ni hu ɦuɗugumba vi goryoŋ Hinnommara kay ana kaa sa ŋgal gorom ma njuf ɗowba gorom ta tama ki duk kura a tokol fuli ma yam ana Molekŋa oloɗi.

¹¹ Nam yow foto kulumi suu muli suu Yudana cukusi kalafi a goɓ faɗtana ay kiyo. Kulumi asina ay cuki ni keŋ vun ma kal ha kalafi hu Ziŋ Yawera na tok keŋ zi mayra sa ŋgol ma huɗum ki paɗina Natan-Melek li sunda hura. Josiyas ŋgal pus pus ma kulumi ma minim maŋ fuli faɗtana kiyo.

¹² Nam hawaɗ otel ta muli suu Yudana miniɗ kolo kay yam zira vi Akazza kiyo u otel ta Manase miniɗ kurufu huu taraŋga eg Ziŋ Yawera mbara nam hawaɗasi ki lay. Nam toosi ki kaŋga hu li namma ni na guluk guluk gaw, cukusi kamayasi ha ki hu ɦuɗugumba Sedronda.

¹³ Josiyas hawaɗ li ma mulna Salomon minim ha kolo kay ɦinira Conora ii dali vok tam u Yerusalem na gay. Li ma teteɗ namma minimmi, loogina gi ciciwra kolo huulonara, maŋ Astart, lo tamara ta cora vi suu Sidonna, maŋ Kemok, lo ma co ma vi suu Moabma u Milkomma, lo ma co ma vi suu Amonna.

¹⁴ Josiyas to ɦini mayra mini kolo kay taɗta ki kaŋgaa, ka gu ma pi ma Aserna ki may, li ma teteɗ namma nam cuk sok suu miɗina ha ki huwa.

Suu Israelna jok viisira ki zeɗ may

¹⁵ Josiyas hawaɗ li ma teteɗ ma hu Betelna ki may. Li ma mbuy kolo ma Jeroboam ma goŋ Nebatna minim ka cuk suu Israelna halaŋ kaŋga hu corana. Nam hawaɗ otel nɗaɗta ki u li ma mbuy kolona halaŋ. Nam ŋgal li ma mbuy kolo namma kiyo, ŋgal gu ma Aserna ma pi huna ki lay.

¹⁶ Nam hoŋ ay gol irim na ni wi ussa pi kolo kay ɦinira, nam sun suuna ana yow sok suu pi hu zul ndaɗta ay ki, tuɗ ŋgalam ha ki kay otel tana. Nam mbuɗ li namma ki njenjera. Ko sa ma jok vun Lona dira na may.

¹⁷ Nam di ana, «Va ma an wam ha mbuy kolo wanna ni me ologe?» Suu hu ɦoŋzi nammana hoŋom dira ana, «Ni sa ma jok vun Lona ma col ay hu Yuda ma mba di dlara aŋ laɗ wandara kina ni usumu.»

¹⁸ Josiyas hin di suuna ana, «Hinigi us ndaɗta, sa ŋgen kom eg sok sa nammaɗi.» Nam ɗok sok sa namma ni ko sok suu jok vun Lona suu ay hu Samarina na lay.

¹⁹ Josiyas hawaɗ zigini suu mini hu li ma mbuy kolona suu ka hu ɦoŋzi ma Samarina ki halaŋ halaŋ, zigini suu muli suu Israelna ɓalak huu Yawe ki u asina, nam li u asi ni ko ndal nam li ay hu Betella na dege dege may.

²⁰ Kay otel masi nɗaɗta nam ŋgaɗ muli suu li ɓivunna huna ki kayami, ŋgal sok suu warna ki hu may, hin hoŋ ay ki vo Yerusalem.

Suu Yudana li luu ma vun til ma Pakŋa

²¹ Mulna Josiyas ɦal voɗta maŋ suuna halaŋ ana asi li luu ma vun til Pakŋa, a ŋga Yawe, Loosina, ko boy ma ɓiiri hu Magaara Galamba wanna na.

²² Tin ay hu lina vi suu kaɓakŋa day ni sa bay luu vun til Pak ko ndaɗta na tuwa. Hu lina vi muli suu Israelna halaŋ lay u muli suu Yudana lay, sa li ka naɗi.

²³ Asi li luu ma vun til Pak namma hu Yerusalemmi hu li ma mulna Josiyas li basara ki hu mulla doogo yam kalavandina.

Boy ma daɓ dagan kay dla mulla vi Josiyassa

²⁴ Josiyas a li u vun magaara mul ma li ɓivunna, Hilkiya, faɗ ay kalafi hu Ziŋ Yawera ni nam dik suu hu mbassa Yudara u suu hu Yerusalem suu joɓ fulina u suu joɓ ŋgus suu zulina kiyo. Nam to fuli u tlesuu teteɗ suu may suu vi suu ka wi Lonaɗina ki lay.

²⁵ Muli suu jewemma halaŋ ma hoŋ irim ay eg Yawe u hurum halaŋ, u saɓakam halaŋ, u ŋgusum halaŋ, ko ndal nam na kaɗi. Muli suu li ki u gaɗta vi Moizza ko ndaɗta na ka dewɗi, ka ŋgorom dagan lay ni mul ma li ko nam na kaɗi.

²⁶ Vam na lay ni hu Yawe ka heɓ kay mulla Yudara kay dla cora Manase laɗ eg Yaweraɗi.

²⁷ Yawe dam ki ana, «Mbassa Yudara an hin ɦuɗuk ha ki egen day ko ndal an ɦuɗ mbassa Israella ha ki dayra na may. Ҥoŋzi ma Yerusalem ma an manamma an hin hinim kiyo, zi may ma an di kam ana sen hin yi huwana.»

²⁸ U dlara Josiyas laɗta, sunda nam laɗta halaŋ ka ɓiiri kaŋga hu magaara Sunda vi Muli suu Yudanara.

²⁹ Hu iiri mamba Faraw Neko, mul ma Egiptena, col ay a taɓ u mul ma Asirina a njun kamba mba fun lum ma Efratna, Josiyas ka min a hinisi a jakgi. Asi wam may ni, cam ki hu Megido ni na gaw.

³⁰ Suu sun mamsina wam nam miɗ ki may ni, asi tlam ay hu pus pusna ay Megido, mbaaram ki Yerusalem. Asi mba pam hu zul mamba. Suu hu mbas ndaɗtana hin tli goromma Joasaz fokosi balamam a mulna.

Joasaz, mul ma Yudana

³¹ Joasaz kak a mulna ni basaɗam ki ni dok-mba' yam hindi. Nam ti mulla hu Yerusalemmi tilna hindi. Sem sum ana Hamutal, ni goŋ Hirmiya ma Libnana.

³² Nam li dlara ka ii Yawe jiviɗira ni ko ndal somoyom lira na may.

³³ Faraw Neko vam ha ki daŋgayna hu Ribla hu mbassa vi Hamatta, dorom ki kay mulla. Faraw Neko tin taara kay suu Yudana, ɦul gursura nekeɗ ii kelew buɓ buɓ hindi, lorra nekeɗ ii kelew dok-hindi may.

³⁴ Nam kak Eliyakim ma goŋ Josiyasna a mulna kay balam bum Josiyas, jokom sem ki ana Joakim. Joasaz nam gam ha ki daŋgayna may, tuɗum ha ki hu Egipte. Nam miɗ ha ki ni huwa.

³⁵ Joakim taa gursura u lorra ha maŋ Faraw Neko a fi gursura Faraw joɓoɗ ayra ni nam tin taara kay suuna u eŋga. Gegelay nam tinim taa mamba kammi u ndak mamba kay a ɦaɗ ha ki maŋ Faraw Nekora.

Joakim, mul ma Yudana

³⁶ Joakim kak a mulna na ni basaɗam ki ni dok-mba' yam vadl. Nam ti mulla hu Yerusalemmi basara doogo yam dew. Sem sum ana Zebudda. Ni goŋ Pedaya ma Rumma.

³⁷ Nam li dlara ka ii Yawe jiviɗira ni ko ndal somoyom lira na dege dege.