2 MULINA 21 - Boy Lonana

Manase, mul ma Yudana

¹ Manase kak a mulna ni basaɗammi doogo yam mba'. Nam ti mulla ta ta basra dok-vadl yam vadl hu Yerusalem. Sem sum ana Hefsi-Ba.

² Nam li dlara ka ii Yawe jiviɗira. Nam li ni u dlara vi njaf suu may suu Yawe dikisisina ki fokosi asi suu Israelnana.

³ Nam hoŋ min li ma kolo mbuyna ma bum Ezekiyas hawaɗam ka kina. Nam min otella maŋ Baal, pi gu ma ceɗi teteɗna ma vi Aserna ko Akab, mul ma Israelna, lira na. Nam goɓ kaŋga fok tlege suu kolo huulona halaŋ, sunusi lay.

⁴ Nam min otella maŋ loogi suu daŋŋa hu Ziŋ Yawera zeɗ zeɗ. Ta Yawe u tamba di ana, «Hu Yerusalem an hin tin senni huwa.»

⁵ Nam min li ma ŋgal ɓivunna maŋ ciciwra u velna u tlege suu kolo huulonna huu taraŋŋa mba' vo hu Ziŋ Lonara lay.

⁶ Nam ŋgal gorom ma vuɗta ki duk kura. Nam li dlara mbuɗta u gi kumuna. Nam tuɗ fun suu joɓpa lay. Nam ɓeŋ huu Yawe ki u suluk ma ka gin a liɗina, li dlara ka irim jiviɗira.

⁷ Fuli suu vi Aserana nam ceɗesi tinisi hu Ziŋ Yawera ta nam di David u goromma Salomon kaɗ ana, «Hu zi ndaɗta u ɦoŋzi ma Yerusalemma halaŋ ma an manam ki duk ɦoŋzi ma vi suu Israelna halaŋ ana an hin tin sen huwa.

⁸ An ka hin suu Israelna a tuɗ ki day eg ndaŋgara an ɦaɗ ka maŋ somoyosira oloɗi. Lini asi li u gaɗ manda an ɓiirisira ay fun saan ma sunda Moiz wandara.»

⁹ Na may asi ka humbi. Manase viɗisi kiwa, zuɗusi a li dla cora. Su ki kay njaf suu ɦawa suu Yawe dikisi ki fok suu Israelnana.

¹⁰ Na may Yawe ɓakasi ay fun saam ma sunda ma jokom vunumma di ana,

¹¹ Mulna Manase li dla mayra cora nam li ki saɓaki ni co su suu Amorna lay. Nam zuɗ suu Yudana a li sulukŋa kay fuli mam suu nam goɓosina.

¹² Kay ndaɗta Yawe, Lo ma vi suu Israelna, di ana, «An min mbaa dlara yoora kay Yerusalem u Yuda halaŋ, dla ndaɗta hin li hum suu humuɗna ni ko ndal lo ma bayra ŋgel humba kira na.

¹³ An hin taɗ zew ma Samarina kolo kay Yerusalem u kawi ma min ziŋ Akabpa u namma. An hin tok Yerusalem ha ki ni ko ndal suuna tok huu tassana kira na, tokom hurum kiyo, hin kuluɓum ki kaŋgaa.

¹⁴ An hin noy u suu man suu hin ndena kiyo. An hin ɦasi ki ko suu babali masisina. Asi hin ki ni a tlesuu ɦurumusi ay ki fun duunana.

¹⁵ Kay ana asi li dlara ka irin jiviɗira, col ay hu buu ma somoyosi cuk ay ki hu mbassa Egiptera day ni asi ka hin dla cora asi landa egenda kiɗi.»

¹⁶ Manase ci suu ɓalak va kaɗina ki cocoo, suluk namma oy ki hu Yerusalem na halaŋ. Suluk ma nam lam eg Yuda halaŋŋa ka ndumbi. Nam li dlara ka ii Yawe jiviɗira cocoo.

¹⁷ U sunda Manase laɗta, dlara nam laɗta halaŋ, dla cora nam laɗta, halaŋ ka ɓiiri kaŋga hu magaara Sunda vi Muli suu Yudanara.

¹⁸ Manase buu kaŋga eg somoyomu asi pammi duk sene mamma ni sene ma vi Uzzana. Goromma Amon varak balamam a mulna.

Amon, mul ma Yudana

¹⁹ Amon kak a mulna ni basaɗam tew ki ni dok-mba' yam mba'. Nam ti mulla hu Yerusalemmi basara mba'. Sem sum ana Mesulemet ni goŋ Harus ma Yotbana.

²⁰ Nam li dlara ka ii Yawe jiviɗira ko ndal bum Manase lira na olo.

²¹ Nam tli ni voɗta bum tlaɗta na tew may, nam sunni fulina suu bum sunusina may, goɓ kaŋga fokosiya.

²² Nam noy Yawe, Lo ma vi somoyomma, kiyo, ka min a tli voɗta vi Yaweraɗi.

²³ Suu sunda vi Amon vi vunusi ki kay mulna. Asi cam ki vo varam taraŋŋi.

²⁴ Na may suu hu zinana ci suu vi vunusi kay mulna cam kina ki halaŋ. Asi hin varakam goromma Josiyas balamam kay mulla.

²⁵ U sunda Amon laɗta, dlara nam laɗta halaŋ ka ɓiiri ga hu magaara Sunda vi Muli suu Yudanara.

²⁶ Asi pammi hu zul mamba hu sene ma vi Uzzana. Goromma Josiyas varak balamam a mulna may.