2 MULINA 20 - Boy Lonana

Tuguɗiira u garaɗta Ezekiyas hin garaɗ kira

¹ Hu buu namma ni Ezekiyas vi tuguɗiira hin na tok a miɗna. Sa ma jok vun Lona, Ezayi ma goŋ Amosna, mba egem dam ana, «Yawe di ana di dlara huruŋga ka ki maŋ suu maŋsina gaw, kay aŋ ka suɗɗi.»

² Ezekiyas pereɗ irim u doogona, cen Yawe di ana,

³ «Ҥii, Yawe, wan hahawan na wige, aŋ wi ana an tuɗ fokoŋŋi u ɗegeera u huu ma tini kaŋŋa. An li dlara iriŋ jivira lay.» Ezekiyas tii u simina cocoo.

⁴ Ezayi ni bay kal ki tuwa ay ni vo huu taraŋga tuwa, Yawe hoŋ dam ana,

⁵ «Hoŋ dagan tuɗ di Ezekiyas, mul ma fok suu mansinana, ana, Yawe, Lo ma vi buŋ, Davidna, di ana, an humuŋ cen maŋgawa, waŋ simi maŋŋawa may, jiviya an min garaɗaŋ kiyo, hin buu hindi ni aŋ hin tuɗ kolo hu Ziŋ Yawera.

⁶ An cukuŋ buu fun maŋŋa basa doogo yam vadl. An hin buɗuŋ ki ko suu Asirina u ɦoŋzi ma namma lay ko mul ma Asirina. An hin njun kay ɦoŋzi namma ni kay tanda u saan ma sunda David.»

⁷ Ezayi beɗ komnjoɗi tulumma tiniɗ pay mulna hu li ma tamma na gay ni nam garaɗ ki gaw.

⁸ Ezekiyas di Ezayi ana, «An hin wi ki gasi ana Yawe garaɗan kiwa, hu buu ma hindina ni an tuɗ kolo hu Ziŋ Yawera gawra nige?»

⁹ Ezayi hoŋom dira ana, «Gola Yawe hin takaŋ dla mayra hin tak ki ana Yawe garaɗaŋ ki gasiwara. Ŋgusna hin calaɗ fokoŋ tuɗta vun zina irim na zeɗ zeɗ doogo, aŋ hin ŋgaɓmi nam mbay egeŋura ɗowba hoŋ ha ki daganira su?»

¹⁰ Ezekiyas hoŋ dira ana, «A ŋgusna mbay egen zeɗ zeɗ doogora ni ka loɓbi, may an minni ana nam hoŋ ha ki dagani.»

¹¹ Sa ma jok vun Lona, Ezayi, hin cen Lona. Yawe hoŋ ŋgussa ha ki dagan na zeɗ zeɗ doogo, ma mbay ginna, ni jaŋalara vi Ahaz.

Mul ma Babilonna sun saamma ay mba kakam ki vi Ezekiyas

¹² Hu coki ndaɗta ni Merodak-Baladan ma goŋ Baladan, mul ma Babilonna, sun magaara u tlena ay maŋ Ezekiyas kay nam hum ana Ezekiyas li tuguɗiiyo.

¹³ Ezekiyas furi coco kay suu mulna sunumsina ay egemma. Nam takasi liim ma ŋgayra ki bel bel, gursura lorra, tlesuu his jivina, mbul ma his jivina u liim ma kawi mamsina cuki huna lay, tlegeyem suu ŋgayra halaŋ nam takasi kiyo hin va ka ki na dewɗi u liim ma buuna lay halaŋ, tak tlegeyem suu hu mul mambana ki bel bel.

¹⁴ Sa ma jok vun Lona, Ezayi, mbay eg mulna Ezekiyas joɓom ana, «Suu asina mba daŋ ana mege? Asi col ay ni arage?» Ezekiyas hoŋom dira ana, «Asi col ay ni hu mbassa dayra, ay ni Babilon.»

¹⁵ Ezayi joɓom ana, «Asi wi ay ni me me vo varaŋŋi ge?» Ezekiyas hoŋom dira ana, «Tlesuu vo varanna halaŋ asi wasi kiyo, va ma hin ki bay an takasina kaɗi.»

¹⁶ Ezayi di Ezekiyas ana, «Hum boy ma vi Yawena haa.

¹⁷ Buu ma hin mbaa ni tlesuu vo varaŋŋa halaŋ u tlesuu somoyoŋ taarasi kana bel bel hin tuɗ ki hu Babilon. Va hin ka hin ki na dewɗi. Yawe di na ni namu.

¹⁸ Asi hin yowoŋ goryoŋ suu aŋ vuɗusi u taŋgana, paɗasi huɗusi ki a li sunda maŋ mul ma Babilonna.»

¹⁹ Ezekiyas hin di Ezayi ana, «Boy ma vi Yawe ma aŋ dam wanna ni jiviya.» Nam hin ɓak tam ana, «Hu li ma an ka iiri tuna heɓpa li kaa ni daɓiɗi su?»

²⁰ U sunda Ezekiyas laɗta halaŋ ka ɓiiri hu magaara Sunda vi Muli suu Yudanara. Nam vek li ma vo mbona gi voɗ mbo lumma ay baba mbaaram ki vo Yerusalem. Dlara Ezekiyas laɗta halaŋ ka ɓiiri kaŋga hu magaara yaɗ ana Sunda vi Muli suu Yudanara.

²¹ Nam miɗ miɗni, goromma Manase kak balamam a mul ma Yudana.