2 MULINA 19 - Boy Lonana

Ezekiyas joɓ sa ma jok vun Lona Ezayi

¹ Hu li ma mulna hum boy ma asi cuɗummana ki hummi nam haa barawi mam suu tamma kiyo, cuk baraw bolna egemu, tuɗ kalafi hu Ziŋ Yawera.

² Ŋgoo dagan nam sun sa ŋgol ma gol zi ma vi mulnana Elyakim, sa ma ɓii dlara kaŋgana Sebma, u muli suu li ɓivun suu basi day dayna u barawi bolna cuki tasi bel bel eg sa ma jok vun Lona, Ezayi ma goŋ Amosna,

³ A asi tuɗ dam ana, «Ezekiyas ɓak ay ana buu ma karamma ni buu ma hahawra, gaɗta u zolona, gor kemba tin yasi ay ki u somoyosi a vuɗta ni saɓak ma a vuɗusi kina kaɗi.

⁴ Kala Yawe, Looŋŋa, hum boy ma sa ma ŋgol kaŋ ma vi suu Asirina sunum ay mba dam a ŋgul Lo ma Iirina, hin a gaɗasi kay boy ma Yawe, Looŋŋa, humum wanna, aŋ cenem ha kay u suu hin ka nde wanna.»

⁵ Suu sunda vi mulna Ezekiyas mbay tew eg Ezayi.

⁶ Nam dasi ana, «Agi tuɗ dagi sa ŋgol magina ana, Yawe di ana, aŋ li ndaa ko boy ma aŋ humum nammaɗi, boy ma suu sunda vi mul ma Asirina dam ayna caa yaŋ kay ŋgulla asi ŋgulundaɗi.

⁷ Gola an hin mbuɗum yam ki ko sa ma gurɗiina na, nam hin hoŋ vo hu mbas mamba. An hin cam ha ki u ŋgewna ni hu mbas mamba tok.»

Mul ma Asirina cuk suu daŋŋa ay olo

⁸ Rabsake hoŋ ay ni mba fi mul ma Asirina ka duu u suu Libnana, kay nam hum ana nam hin Lakis ha tani tuɗ a duu u mul ma Libnana.

⁹ Mul ma Asirina hum dla Tirhaka, mul ma Etiyopina, ana nam ka tuɗ ay a duu u namu.

Magaara Senakerib ɓiiriɗ maŋ Ezekiyassa

¹⁰ Nam hin cuk suu vun sunda ha eg Ezekiyas olo dam ana, «Agi tuɗ dagi Ezekiyas, mul ma Yudana, ana, Loŋ ma aŋ maa taŋ um tin huruŋ kamma, ana Yerusalem ka hin ki hu duk ko mul ma Asirinaɗina.

¹¹ Aŋ u taŋga wi dlara muli suu Asirina laɗ eg mbassa daŋga halaŋga u ii taŋga lay. Asi dikisi ziisi ki halaŋ halaŋ. Aŋ taŋga may ni hin suɗ ki tu su?

¹² Loogi suu vi njaf suu daŋŋa suu somoyon dikisi kina hin njun kasi su. Gi Gozan, Haran, Resef, u goryoŋ Eden suu ay hu Telasarna halaŋ.

¹³ Muli suu Hamatna, suu Arpadna, u mul ma hu ɦoŋzi ma Sefarvaimma suu Henana u suu Avana ka ni arage?»

Cenda Ezekiyas cen Lonara

¹⁴ Ezekiyas vi magaara mul ma Asirina sun suuna ay u ndaɗta ndumuɗ ndum ndummi, tuɗ kolo hu Ziŋ Yawera. Ezekiyas buɗ magaa ndaɗta ki fok Yawe.

¹⁵ Gijaŋ cenda fok Yawe di ana, «Yawe, Lona vi suu Israelna, aŋ ma ka kaki kolo kay Serubimma, aŋ dew ni Lona vi muli suu ka kay ndaŋgarna bel bel, kay aŋŋi sa ma li huulona u ndaŋgarana.

¹⁶ Tin humuŋ aya, Yawe, huma, mal iriŋ kiyo, Yawe, gola. Hum boy ma vi Senakerib ma sunum ay a ŋgul Lo ma iirina haa.

¹⁷ Ni na daŋ may, Yawe, muli suu Asirina dik njaf suu daŋŋa ki cocoo u mbas masira lay.

¹⁸ Asi ŋgalasi loogi masisina ki u kura, na may loogi asina ni ka Lonaɗi. Asi ni tlesuu sana lasi u bik komma ɦawaa, ni gugunina u ɦinira, muli suu Asirina ɓalakasi ki ni asina.

¹⁹ May, aŋ Yawe, Loomina, suɗumi ki ko Senakerib, ni mulla kay yam ndaŋgara zeɗ zeɗ halaŋ hin wi ki ana Yawe dew a Lona ni namu.»

Ezayi mba hoŋ dira vi Yawera aya

²⁰ Ezayi ma goŋ Amosna sun ha di Ezekiyas ana, «Gola Yawe Lona vi suu Israelna di ana, Na daŋ may an hum cenda aŋ cenen kay Senakerib, mul ma Asirina wa.

²¹ «Gola ni boy ma Yawe damma kamma. Go tamara Siyonda hin panaŋu, ndaɗ hin san uŋu. Ndaɗ hin kisik yaɗ ay ŋgoroŋ dagani, ndaɗ goora Yerusalemba.

²² Sa ma aŋ ŋgulum panam mayna ni gege? Aŋ oo uŋ kolo u ŋgulla, u golla cora ni eg gege? Ni eg ma Teteɗ ma vi suu Israelna.

²³ Magaa maŋga aŋ ɓiiriɗ ay ndaɗta aŋ ŋgul ni Yawe. Aŋ di ana, Saɓak pus pus man ma kulumina, an ɗuŋ ki kolo kay yam ɦinira, an fi liisi ma ŋgayna hu Libanna halaŋ. Tew tew an ka kaaɗ gu sedre ma kaɗna ay kiyo, ni ma siiy kolo day cocona, an doom umba do dora ay ki halaŋ halaŋ.

²⁴ An vek kaŋgaa, an ci yo ma wili ma kaaday an ka cambina kiyo. An tay tlesuu daŋŋa, soosi ki kaŋga u sen ma tuɗta u zul mbo ma col ay Egiptena halaŋ.

²⁵ Aŋ ka wi ana dla ndaɗta an saa ay ki kaɗ ni jew day naɗi su? Ay hu cokira jak kira day an laɗ aya naɗi su? Cem wan daŋga an min a faɗ vun dla ndaɗta kiyo. ɦoŋzi ma saɓak cocona hin to kiyo u ɦinira jivira moli cara hin njay kiyo.

²⁶ Suu cuki hu zi nammana kosi ka fiyekgi. Asi ki cuki kaŋga ka wi dlara asi laɗta oloɗi. Asi mbuɗ ni ko usu ma hu senenana ɦawa na. Ko usu ma gol ay ŋgolom jivina na, ni ko usu ma day ki kolo kay yam zigininana na. Ni ko wa ma himiina vam ki bay nam cuk yamma na.

²⁷ Hu li ma aŋ kaki kaŋgana, hu li ma aŋ kal ay kina, hu li ma aŋ hoŋ ha kalafina halaŋŋi an wiya. Olo ni hu li ma aŋ guruɗ egen u yara na ni an wiya.

²⁸ Kay ana aŋ guruɗ u yara ni egenu. Ŋga taaŋga tuɗ ta ta kal ha ki kolo humunu. An hin cooŋ ciniŋu gi ɓalaŋŋa huwa, hin cukuŋ njamara funuŋ may. An hin hoŋoŋ dagan hu voɗta aŋ tli ay hura.

²⁹ Aŋ Ezekiyas may ni an ka takaŋ dlara hin lira haa. Cukini wanni suuna hin ti ni mokoo wa blena, daa wanni asi hin ti ni tlesuu day ay kolo kay tasina, may hu basara hindira ni zaaragi tlena, feɗegi sina ay vo lay. Pagi gugutluna, hin tagina vuɗum may.

³⁰ Suu may suu suɗ hu njaf ma vi Yudana, hin mbuɗ ni ko gu ma sariyam kal ay ga duk mbo ŋgolnana na. Gogor kom cuk vuɗta cocoo.

³¹ Kay u suu hin ay hu Yerusalem ndena hin cuk ay kiyo, suu suɗ ay kolo kay ɦinira Siyonda hin cuk ay kiyo. Minda vi Yawera hin li dla ndaɗta.

³² «Yawe njaɗ kay mul ma Asirina ana, Nam ka hin kal hu ɦoŋzi nammaɗi. Nam ka hin mun mbuuru ha huɗi lay. Nam ka ndak a ndugusi u mbariɗi lay. Nam ka ndak a mbu li maa ha koloo a duurusi haɗi lay.

³³ Voɗta nam tlaɗ ha komba hin hoŋ ay ni huruɗ olo. Yawe di ana, ɦoŋzi namma ni nam ka kal huɗi.

³⁴ An hin njun kay ɦoŋzi namma a suɗum kira. Ni kay tanda u saan ma sunda David.»

Suu Asirina tuɗwa miɗ ma Senakerib miɗna

³⁵ Njeŋge ndaɗta ni sa sunda vi Yawe mba hu kaŋ ma vi suu Asirina, ci suu njufiina na 185,000. Maɗii a suuna yow ki kolora ni wi ha kaŋga ni maɗ suu miɗina sak sak.

³⁶ Senakerib, mul ma Asirina, ho ni na gaw, hoŋ hu Ninive li ma nam ay kaki huna.

³⁷ Hu li ma nam a cen hu ziŋ loomma Nisrokka wanni, goryom gi Adrammelek u Saresser mba cam ki pii kosi ki liŋŋa hu mbassa Araratta. Gooromma Azarhadon varak a mulna balamamu.