2 MULINA 18 - Boy Lonana

AY HU DAƁPA VI MULLA ISRAELLA U TA YUDARA Ezekiyas, mul ma Yudana

¹ Hu basara hindira hu li ma Oze ma goŋ Elana kak a mul ma Israelnara ni, Ezekiyas ma goŋ Ahazna, mul ma Yudana, kak a mulna may.

² Nam kak a mulna na ni basaɗam ki ni dok-mba' yam vadl. Nam ti mulla hu Yerusalemmi basara dok-mba' yam dleeŋe may. Sem sum ana Abi, ndaɗ ni goŋ Zakarira.

³ Ezekiyas li dlara jivi coco ii Yawe, ko bum ŋgolo David lira na may.

⁴ Nammi sa ma bulum li ma mbuy kolona kina, to ɦinira ceɗi teteɗta ki may, ka gu ma vi Aserna ma piina ki may, to guy kawi ma Moiz yoorom kana ki may. Kay suu Israelna gi jaŋ ŋgal mbitla his jivira fok guy namma ta ta cemi. Asi yam ana Nehustan.

⁵ Ezekiyas tin saa mamba kay Yawe, Lona vi suu Israelna. Ka ŋgorom dagan ni mul ma li ko nam na ka oloɗi duk muli suu Yudana halaŋ. Suu ay ki fokom jewna lay, sa ma li ko nam na ay kaɗi.

⁶ Nam kak hurum tokira ni kay Yawe na dew, mbuɗ hurum kaɗi. Nam li ni u gaɗta Yawe ɓiiriɗ ka maŋ Moizza na tew tew.

⁷ Yawe ay u namu. Dlara nam laɗta halaŋŋi nam faɗu. Nam mbuɗ yara u mul ma Asirina, min ka a hom yam kaŋga um oloɗi.

⁸ Nam u tamba dik suu Filistina, casi ta ta tew ay ki hu Gaza. Zigini suu fiyekŋa, li ma juɓ u ɦoŋzina, u ɦoŋzi ma saɓak cocona halaŋ nam tlasi kiyo.

Gi humba kay zi ma Samari ma tlam kina

⁹ Hu li ma Ezekiyas li basara ki hu mulla na fiɗi, ni Oze ma goŋ Elana a mul ma Israelna li basara ki hu mulla ni kiɗisiya may. Salmanasar, mul ma Asirina, mba ndug ɦoŋzi ŋgol ma Samarina a duu u asiya, ŋguf yam zina ki u suu duuna na cutl.

¹⁰ Tew hu basara hindira ni suu Asirina tli Samari kiyo ni hu basara karkiya ta Ezekiyas kak a mul ma Yudanara may. Oze, mul ma Israelna, ni hu basaɗamba dleeŋera may.

¹¹ Mul ma Asirina yow suu Israelna, tuɗusi ha ki hu Asiri, tuɗusi hu Hala, ha ki hu Habor, fun mbo lum ma Gozanna, hu ɦoŋzi ma Medina may.

¹² Ni kay ana asi hum vun Yawe, Loosina, kaɗi. Asi ŋgel vun galam mamba nam vaɗ u asira. Tlesuu Moiz, sa ma sun Yawena, ɓiirisina asi humusi kaɗi, li ka usiɗi lay.

Senakerib duu u mulla Yudara u ɦoŋzi ma Yerusalemma

¹³ Hu basara doogo yam fiɗi ta Ezekiyas kak a mul ma Yudana ni Senakerib, mul ma Asirina, mba duu u ɦoŋzi ma ŋgolo ma saɓakŋa ma hu Yudana halaŋ. Nam tli ɦoŋzi namma ki bel bel.

¹⁴ Ezekiyas, mul ma Yudana, sun ha eg mul ma Asirina hu Lakis dam ana, «An li coo, ka aŋ mbay a van viɗi, dlara aŋ min a tininda kanda an ndak a laɗu.» Mul ma Asirina tin taara kay Ezekiyas mul ma Yudana doonora ii kelewna 9000 u lorra ii kelewna 900 may.

¹⁵ Ezekiyas yow begera hu Ziŋ Yawera halaŋ u gursura ka vo hu ziŋ mulnana lay.

¹⁶ Hu coki ndaɗta Ezekiyas u tamba kus vun Ziŋ Lonara kiyo u vun ma nam mul ma Yudana baram ki u lorrana lay. Nam buɗum ki, ɦasi ha ki maŋ mul ma Asirina.

Mul ma Asirina las suu Yerusalemma

¹⁷ Mul ma Asirina ay hu Lakis wanni sun suu ŋgolona ha eg Ezekiyas, mul ma Yudana, sa ma ŋgol asgaa ma ŋgolna u saam ma funumma u suu asgaarina usi ŋgol cocoo. Asi mba cuk ki fun zul mbo ma ŋgol ma asi vekemma hu voɗta tuɗ a mbus tlenara.

¹⁸ Asi yi mulna, sa ŋgol ma ŋgom ziŋ mulnana, Eliyakim, ma goŋ Hilkiyana, Sebma sa ma ɓiira u bigawlana, Yoak ma goŋ Azafna, cuk ay ki egesiya.

¹⁹ Sa ŋgol ma fun mul asgaanana dasi ana, «Tuɗ dagi Ezekiyas ana mul ma ŋgolna, mul ma Asirina, di ana, huruŋ ma tini kanna ni ana mege?

²⁰ Aŋ di ana, Lini di boyna wa na dew ni ndaki a fi saɓakŋa hu li ma duuna. Cemi wanda aŋ tin saa maŋga a duu u anda ni eg mege?

²¹ Aŋ tin saa maŋga kay cerew ma kus ay ki fokoŋ hu Egiptena, cerew namma hin cokŋi duk ko gegelay ma tin saaram kamma. Ko ndal Faraw, mul ma Egiptena na u suu tin hurusi umma halaŋ.

²² Lini agi dan ana, agi tin hurugi ni kay Yawe, Loogina, na ɗaŋŋi ka nam Lo ma Ezekiyas bulumum ay ki kolo kay li mbuynana tokgi su? U otel lay di suu Yudana u suu Yerusalemma ana, agi tuɗ goɓ fok li ma ŋgal ɓivunna ni hu Yerusalem dew naɗi su?

²³ Cemi ni vi vunuŋ u sa ŋgol manna, mul ma Asirina, ni an hin ɦaŋ kulumina na buɓ buɓ mba', aŋ taŋga hin hal suu a ful kasina may.

²⁴ Cemi ni aŋ ndak a dik mborɓii suu na ew daŋ suu vi sa ŋgol mannana ki ni u yal mege? Aŋ ma tin saa maŋga kay Egiptena kay kulumina u pus pus ma kulumina u suu fulusina layna.

²⁵ Sa ŋgol manna mba duurugi na ni, Yawe ɦam voɗta ay ka ni nambi su? Yawe dan ana tuɗ kolo duu u mbas ndaɗta, ɓalakaɗ kiyo.»

²⁶ Eliyakim ma goŋ Hilkiyana, Sebma u Yoak hoŋ dira maŋ sa ŋgol ma fun sa ma ŋgol asgaanana ana, «Mariyaɗ ni ɓak suu sun maŋsina ay u vun Aramena, kay ami hum vun namma ki jiviya, ɓakami u vun Yudanaɗi kay ana suu njari kay gulumunnana halaŋ huma.»

²⁷ Sa ŋgol ma fun sa ma ŋgol asgaa ma Asirina hoŋosi dira ana, «Sa ŋgol manna sunun ay a di boy namma ni maŋ sa ŋgol maŋŋa u taŋga hol su? Ni ka maŋ suu laki kolo kay gulumunna cana layɗi su? Asi ni suu hin a maŋ ki coco, ti soɗosi lay, ci sumurusi layna.»

²⁸ Sa ma fun sa ŋgol ma duuna vi suu Asirina col ki kolo u sem sawalla u vun Yudana di ana, «Humugi boy ma vi mul ŋgolna, mul ma Asirina haa.

²⁹ Mulna di ana, ka hin Ezekiyas a maŋagi kiɗi, kay nam ka ndak a suɗugi ki hu duk konɗi.

³⁰ Ezekiyas dagi ana tin hurugi kay Yawe, nam hin suɗugi kiyo ka hin a an tlagi ɦoŋziiginaɗi ni vagi boy nammaɗi.

³¹ Humugi dlara Ezekiyas daɗtaɗi, humungi ha ni boy ma an dagina ha wanna na ɗow, ni an mul ma Asirina, hinigi dlara so yagi kira tani mbuɗugi ay ni un na ɗow. Ni gegelay ni ndak a ti vuɗ gugutlu mamma, ti vuɗ tulum mamma, ci mbo goloŋ mamba may.

³² Kak njokŋi an hin mba yowogi tuɗugi ki hu mbassa jivi ko ndal magira nara, mbassa wana huruɗ cocora ta sum veŋŋa hura, mbassa funa huruɗ u gugutluna ɦayra. Mbassa mbul conona hura u mbul yumma hu layra, ni agi hin lak iiriya, agi ka miɗ kiɗi. Humugi dlaŋ Ezekiyassaɗi. Nam di ana, Yawe hin buɗuygi kiyo, ni ganyamba ɦawaa.

³³ Loogi suu vi njaf suu ɦawana hin suɗusi mbas masira ki ko mul ma Asirina faɗ su?

³⁴ Loogi suu vi Hamat u Arpadna ni arage? U ma vi Sefarvaim, vi Hena, u Ava ni ara mayge? Asi hin buɗun Samari ki konni buɗ su?

³⁵ Lo ma buɗ mbas mamba ki duk loogi suu hu mbassa zeɗ zeɗ cara kina ni maanage? A Yawe hin ndak a suɗun Yerusalem ki kon mam su?»

³⁶ Suuna halaŋ laki ni ɦawa na en ka dam vaɗi kay mulna dasi ki ana, «Agi ka hoŋom diɗi.»

³⁷ Sa ŋgol ma gol zi ma vi mulnana, Eliyakim ma goŋ Hilkiyana u sa ma ɓii dlara kaŋgana Sebma u bigawlana Yoak ma goŋ Azafna hoŋ ay eg Ezekiyas barawi masisina ki hariya, mba cuɗum boy ma sa ŋgol ma fun sa ma ŋgol asgaa suu Asirina damma.