2 MULINA 17 - Boy Lonana

Oze, mul ma Israel, ma daɓ daganna

¹ Hu li ma Ahaz, mul ma Yudana, li basara ki hu mulla doogo yam mbana ni, Oze ma goŋ Elana kak a mul ma Israelna may. Nam kak ay ni hu Samari li basara hu mulla ni dleeŋe.

² Nam li ni dlara ka ii Yawe jiviɗira, na may ka saɓaki ko muli suu Israel suu lak ki fokom jewna na gawɗi.

³ Salmanasar, mul ma Asirina, duu u namu, su kamu. Nam mbuɗ ki ga umu, warakam taara hu basara ni mamu.

⁴ Oze vi vunum u suuna kay mul ma Asirina. Nam sun suuna eg mul ma Egiptena hu Sais ka min a ɦal taara maŋ mul ma Asirina oloɗi. Hu li ma Salmanasar hum boy namma ki hummi, nam vi Oze gam daŋgayna.

⁵ Ŋgoo dagan mul ma Asirina col kolo a duu u mbassa Israella. Nam ŋguy yam Samari ki u suu duuna ta ta basara hindi.

⁶ Tew hu basara dleeŋera a Oze kaki hu mullara, mul ma Asirina ndug Samari, yow suu Israelna ha ki mbaɓura hu Asiri. Nam cukusi ha ki hu Hala may, ha ki hu Gozan li ma mbo ma Haborna ɓaɗ ha huna may, hu ɦoŋzi ma Medina may.

Dlara mulla Israella ɓalak ki kaɗta

⁷ Dla ndaɗta li na ni kayra suu Israelna li sulukŋa eg Yawe, Loosina. Nammi sa ma cukusi ay ki hu mbassa Egiptera. Asi hin li ki ni ndaa loogi suu daŋŋa na ɗow.

⁸ Asi li ni u gaɗta vi suu may suu Yawe dikisisina ki fokosina na ɗow, li ni u gaɗta muli suu Israelna tiniɗ kay tasira may.

⁹ Suu Israelna li tlesuu asi ndak ka a lasiɗina eg Yawe, Loosina. Asi min li ma kolo mbuyna ki hu ɦoŋzi masi ma ŋgolona bel bel hu li ma juɓ u ɦoŋzina u liisi ma saɓak cocona halaŋ.

¹⁰ Asi ceɗ ɦinira pi gu ma vi Aserna kolo kay mbura u ŋgusugi suu ɗufi cocona may.

¹¹ Asi li ɓivunna hu liisi ma teteɗ namma halaŋ halaŋ ko ndal suu may suu Yawe dikisi ki hinisi liisina ki wanna na lay. Asi li dla mayra cora ɓalak huu Yawe ki egesira.

¹² Yawe dasi ki ana asi goɓ lo ma daŋgi lay ni asi hin goɓmi fulina na ɗow.

¹³ Yawe ne yam suu Israelna ki coco fun suu jok vun Lona zeɗ zeɗ. Suu Israelna u suu Yudana halaŋ ana, «Humugi u gaɗ manda u gaɗta an dagira ay ki jew maŋ somoyogira, an hin hoŋ dagira magi agi tagira olo, fun suu man suu sununna, suu jok vun Lonana.»

¹⁴ Na may asi humun vunun kaɗi. Asi so yasi ki eŋga ko somoyosi lira na olo, tin hurusi ay ka kay Yawe Loosinaɗi.

¹⁵ Asi noyom gaɗ mamba kiyo, noy galamba nam vaɗ ay u somoyosira ki lay. Gaɗta nam gasi humusi kaɗta, asi zaŋ irisi ni eg dlara uɗ kaɗira. Asi li ni ko njaf suu daŋ suu ŋguyusi wanna na. Doli ɗini Yawe neesi ki ana ka asi li ko suu asina naɗi.

¹⁶ Asi noy gaɗta vi Yawe, Loosinara, ki halaŋ halaŋ. Asi yoo fuli gor mbutlina mba'. Asi pi gu ma vi Aserna fokosiya. Asi goɓ vogosi kaŋga fok tlesuu kolo huulona, asi sunni Baal may.

¹⁷ Asi gi goryosi suu njufiina u suu tamagina ki duk kura, asi joɓ fulina, asi li ni u dlara suu joɓ loogi suu ɦawana dasirara lay. Asi ɦal tasi ki a li dlara ka ii Yawe jiviɗira, ɓalakam hurum ki egesiya.

¹⁸ Yawe hurum ɓeŋ ki ŋgol coco eg suu Israelna. Nam dikisi ha ki na day egemu. Dee suu vi Yudana hinni asi doy hol.

¹⁹ Na may suu Yudana li ka u gaɗta vi Yawe, Loosinaraɗi, lay. Asi li ni u gaɗta suu Israelna tiniɗ kara may.

²⁰ Yawe cuk suu Israelna ki ni bel bel. Nam homosi yasi ki kaŋga u suu daŋŋa. Nam ɦasi ki ko suu ɦurumba. Asi ɦurumusi ki tuɗusi ha ki egem na day.

²¹ Hu li ma Yawe ɓaɗ suu Israelna ay ki ko suu vi Davidna, tinisi Jeroboam ma goŋ Nebatna ki kasi a mulna, Jeroboam tuɗ suu Israelna ha ki eg Yawe na day, cukusi ki kaŋga hu suluk ma cona.

²² Suu Israelna halaŋ li ni dla co mayra Jeroboam laɗta. Asi ka hin co ndaɗta kiɗi,

²³ ta ta mbuɗ a Yawe dikisi ha ki egem day, ko ndal nam di ay ki fok jew fun suu mam suu sunda, suu jok vun Lona suu Israelnara na. Suu Israelna tuɗ ki na day eg mbas masira, ha ki hu Asiri ta ta cemi.

Ura tin ayra vi suu Samarina

²⁴ Mul ma Asirina yow suu Babilonna, suu Kutana, suu Avana suu Hamatna u suu Sefarvaimma nam cukusi ki hu ɦoŋzi ŋgol ma Samarina balam suu Israelna. Asi mba vi ziisi ki hu Samari.

²⁵ Hu li ma asi mba vi jew ziisi ki hu nana gaw ni, asi ni suu ka wi Yaweɗina, ka lam ndaarambi lay. Yawe sunusi dlona ay kasi, mba casi ki cocoo.

²⁶ Asi di mul ma Asirina ana, «Njaf suu aŋ yowosi cukusi ha hu ɦoŋzi ma Samarina wanna ka wi yal ma cen Lo ma hu mbas ndaɗtanaɗi. Lo namma sunusi dlona ay kasiya, gola dlo namma ka casi wanna kay asi ka wi yal ma ŋga Lo ma hu mbas ndaɗtanaɗi.»

²⁷ Mul ma Asirina ɦasi voɗta di ana, «Tayagi mul ma li ɓivun ma ka ki tani dew, hoŋom ha vo hu Samari. Nam tuɗ haɗasi yal ma a ŋga Lo ma hu mbas ndaɗtana.»

²⁸ Mul ma li ɓivun maa dew ma asi tuɗum ha ki tanana hoŋ ay mba cuk hu Betel. Nam haɗasi yal ma li ndaa Yawena.

²⁹ Na ɗaŋŋi njaf suu hu zeɗ zeɗ asina bel ni, gegelay ni u loomma komu komu. Asi tinim hu zigini suu mini hu li ma mbuy kolona, ma suu Samarina minim ka zeɗ zeɗna. Gegelay hu ɦoŋzi ma nam ka huna li ni ko ndaɗta na.

³⁰ Suu Babilonna min loosina ni Sukot-Benot, suu Kutana loosina ni Nergal. Suu Hamatna loosina ni Asima.

³¹ Suu Avana loosina ni Nibaz u Tartak. Suu Safarvaimma tuɗ fok u ŋgalla ŋgal goryosi ki maŋ loosina Adramelek u Anamelek may.

³² Asi li ndaa Yawe ha hu gak may, dukusi ni muli suu li ɓivunna hu li ma mbuy kolona kaa. Asi ka li ɓivunna ay u sesi kolo kay li ma mbuyna.

³³ Hu li ma asi ka li ndaa Yawena lay ni, asi tuɗ fok a sun loogi masi suu ɦawana gak may, ko asi ay li vo hu mbas masira jewra na.

³⁴ Cemi gakŋi asi li ni ko jewra na. Asi ka li ndaa Yaweɗi. Asi ka li ko gaɗta dira naɗi. Li ni ko asi minda na, ka ko gaɗta dira naɗi lay, ka ko dlara Yawe ɓiiriɗ ka maŋ goryoŋ Yakob ma nam jokom sem ki ana Israelna naɗi lay.

³⁵ Doli ɗini Yawe vi Galamba u asi dasi ana, «Agi lagi ndaa lo ma daŋgi, goɓogi kaŋga fok loogi suu ɦawanaɗi, agi sunusiɗi, agi ka lasi ɓivunnaɗi lay.

³⁶ Yawe u tamba cukugi ay ki hu mbassa Egiptera ni namu. U saɓak mam ma ŋgol cocona u kona koori kagi kolo na koo, ni agi mba lammi ndaaramu. Agi mba goɓ kaŋga ni fokomu. Agi mba lam ɓivunna ni mamu.

³⁷ Dlara nam min ana agi laɗura, gaɗ mamba u nera nam ɓiiriɗ ka ga hu magaara magira. Agi mba goloɗ jivi a li uɗ hu buuna halaŋ may. Agi ka lagi ndaa loogi suu ɦawanaɗi.

³⁸ Humugi maa ki kay galamba an vaɗ u agiraɗi. Agi ka lagi ndaa lo ma daŋgi.

³⁹ Yawe, Loogina, agi hin lammi ndaaram na hol. Nammi sa ma hin suɗugi ki ko suu babali magisinana.»

⁴⁰ Na may ni asi hum boy namma kaɗi, tuɗ fokŋi u dlaasira jewra na ɗow ɗow.

⁴¹ Ko ndaɗta na njaf suu zeɗ zeɗ asina li ndaa Yawe ha may, tokol fuli masisina ha hu gak may. Ni ko somoyosi li ay jewra na. Asi cemi ni li ni na lay.