2 MULINA 16 - Boy Lonana

Ahaz, mul ma Yudana

¹ Hu basara doogo yam kiɗisiyara vi Pekah ma goŋ Remaliyana a mul ma Israelna ni Ahaz ma goŋ Yotamma kak a mul ma Yudana may.

² Ahaz kak mulla na ni basaɗam ki ni dok-mba'. Nam ti mulla hu Yerusalemmi basara doogo yam karkiya. Nam li dlara ɗegeera ka ii Yawe, Loomma, ko bum ŋgolo David lira naɗi.

³ Nam li ni dlara vi muli suu Israelnara, gi gooromma ki duk kura lay, ko ndal njaf suu co suu Yawe dikisi ki fok suu Israelna jewna lira na.

⁴ Nam li ɓivunna u ŋgalla ŋgal mbitla his jivira kay li ma mbuy kolona, kay mbura, u ŋgusugi suu ŋgolona lay.

⁵ Kay ndaɗta Ressin, mul ma Sirina, u Pekah ma goŋ Remaliyana, mul ma Israelna, mbay ndug zi ma Yerusalemma duu u asiya. Asi ŋguy yam Ahaz ki cutl may ni gijaŋ duuna ka gawɗi.

⁶ Hu coki ndaɗta ni Ressin, mul ma Sirina, ɦal ɦoŋzi ma Elana ki maŋ suu Edomma. Hu li ma asi dik suu Yudana ha kina, suu Edomma hoŋ ay mba cuk ki ni hu ɦoŋzi namma ta ta cemi.

⁷ Ahaz cuk suu vun sunda ha eg Teglat Falasar, mul ma Asirina, dam ana, «Anni gooroŋŋa ni saaŋ ma sunda, tuɗ ay mbay buɗun ki ko mul ma Sirina u mul ma Israelna suu ka duu u anna.»

⁸ Ahaz tli doonora u lorra ka hu Ziŋ Yawera u suu ka hu ziŋ mulnana ɦasi ha ki maŋ mul ma Asirina.

⁹ Mul ma Asirina humum boy mamma mbay duu Damas tli ɦoŋzi ma Damasna kiyo, dik suu huna ha ki ta ta Kir, ci mulna Ressin ki may.

¹⁰ Mulna Ahaz tuɗ hu Damas kay a ŋgaf vok Teglat Falasar, mul ma Asirina. Nam wi otel dew hu Damasna. Mulna Ahaz sun ay eg mul ma li ɓivunna, Uriya, a lam otel ko namma na may.

¹¹ Mul ma li ɓivunna min otel ko ndal haɗta col ay hu Damas ndaɗta na may. Ko ndal mulna Ahaz damba na. Li dla ndaɗta li ni jew mulna hu li ma nam ha hu Damas bay mba tuna wanna.

¹² Hu li ma nam hoŋ ayna, mulna wi otel na ni, ɦuɗ tam ay eg li ma ŋgal ɓivunna ɗiŋ kolo huwa.

¹³ Nam ŋgal ɓivun mamma u tlesuu nam ɦasina, vo sum veŋŋa kay otel, yam busu tlesuu nam ŋgaɗasi a li ɓivunnana kayam may, a li ɓivun ma mbaa heɓpa.

¹⁴ Otel ma mini u kawi ma tlawna ma li ay tini fok Yawena vun ziŋ Lonarana nam tlam kiyo, hin li ma duk ɦoŋga u otel ma wilina ki ɦawaa, mba tinim ki keŋ ii mbayaw keŋ otel ma wilina na.

¹⁵ Nam di mul ma li ɓivunna, Uriya, ana, «Aŋ ŋgal ɓivun ma maɗiina u ma fiɗigina, ɓivunna u ɦalla mulna ɦaɗ ayra, ɓivun ma ŋgalam ki ŋgalina u sum veŋŋa ma suuna ɦam ay halaŋŋa, aŋ voommi kay otel ma ŋgolna. Aŋ vo busu ma suuna mba li ɓivunnana halaŋŋi kamu. Otel ma mini u kawi ma tlawnana an hin wam dlam tuwa.»

¹⁶ Mul ma li ɓivunna, Uriya, li tlena halaŋŋi ko mulna Ahaz damba na may.

¹⁷ Mulna Ahaz hawaɗ va ma mini hu li ma mbus zozoɗtana kiyo. Nam tli tassa ŋgol ma vo mbona hurumma ki kaŋgaa ma ay tini kolo kay mbutlugi kawinana, mba tinim ki kay ɦinira njaari kaŋgara.

¹⁸ Kay a gol ii mul ma Sirina ni nam to li ma kurufu mini ma uɗ ha kalafi hu Ziŋ Yawera hu buu ma vi Lonna kiyo, hin li ma mulna kal ha huna ki ii bunsu na may.

¹⁹ Dlara Ahaz laɗta halaŋ ka ɓiiri kaŋga hu magaara Sunda vi Muli suu Yudanara.

²⁰ Ahaz buu kaŋga eg somoyomu. Asi pammi eg somoyom hu li ma yam ana Ҥoŋzi Davidna. Goromma Ezekiyas varak balamam a mulna.