2 MULINA 15 - Boy Lonana

Azariya, mul ma Yudana

¹ Hu li ma Jeroboam li basara ki hu mulla dok-mba' yam kiɗisiyana a mulna fok suu Israelna ni Azariya ma goŋ Amasiya, mul ma Yudana, mbuɗ mulna may.

² Nam tli mulla ni basaɗam ki na doogo yam karkiya. Nam ti mulla hu Yerusalemmi basara dok-vadl yam mba'. Sem sum ana Yekoliya. Ndaɗ ni goora Yerusalemba.

³ Nam li ni dlara jivi ii Yawera, ni ko ndal bum Amasiya lira na dege dege may.

⁴ Na lay ni li ma mbuy kolona ka bulum kiɗi. Suuna tuɗ fok a li ɓivunna kolo kay li ma mbuyna, ŋgal mbitla his jivira hu tu na gak gak.

⁵ Yawe gi tuguɗiira cora kay mulna Azariya. Nam ka ki ndondona ta ta hu miɗ mamma. Nam kak ki ni hu zira daŋga vay dam dew. Gooromma Yotam mbuɗ vo taraŋ a mul zina, gol suuna hu mbassa halaŋŋi namu.

⁶ U dlara vi Azariyara sunda nam laɗta halaŋ ka ɓiiri hu magaara Sunda vi Muli suu Yudanara.

⁷ Azariya buu kaŋga eg somoyomu. Asi pam eg somoyom hu Ҥoŋzi Davidna. Gooromma Yotam varak mulna balamamu.

Zakari, mul ma Israelna

⁸ Hu basara dok-hindira vi Azariya, mul ma Yudana, ni Zakari ma goŋ Jeroboamma, mul ma Israelna, kak a mulna kay suu Israelna may. Nam kak ay ni hu Samari, ti mulla ni tilna karkiya.

⁹ Nam li dlara ka ii Yawe jiviɗira ko ndal somoyom li ay jewra na olo. Nam ka hin suluk ma Jeroboam ma goŋ Nebatna lam cuk suu Israelna hu cora belna kiɗi.

¹⁰ Salum, ma goŋ Yabesna, vi vunum u suuna kamu. Nam cam ki ni fok suu Israelna na halaŋ, varak balamam a mulna gaw may.

¹¹ Sunda Zakari laɗta halaŋ ka ɓiiri hu Magaara Sunda vi Muli suu Israelnara.

¹² Li ki ni boy ma Yawe dam ay ki fun Jehu ana, «Goryoŋ ta ta tuɗ tew ay ki kay gor ŋgologi suu fiɗina hin kak ki kay dlamba mulla vi suu Israelnara.» Hin li ki ni ko ndaɗta na may.

Salum, mul ma Israelna

¹³ Salum ma goŋ Yabesna mbuɗ mul ma Israelna ni hu li ma Azariya, mul ma Yudana, basaɗ ki hu mulla dok-hindi yam dleeŋe da. Nam ti mulla ni tilna dew hu Samari.

¹⁴ Manahem ma goŋ Gadina col ay hu Tirsa mbay ga hu Samari ci Salum ma goŋ Yabesna kiyo, varak balamam a mulna may.

¹⁵ Sunda Salum laɗta ŋgeŋ ma nam lamma halaŋ ka ɓiiri hu magaara Sunda vi Muli suu Israelnara.

¹⁶ Manahem tuɗ ndug ɦoŋzi ma Tapuana. Nam ci suu hu ɦoŋzi nammana ki halaŋ suu hu mbassa Tirsara bel bel kay ana asi min ka a malam vun grekŋa ki hu li ma nam a kallaɗi, nam wak huu boyogi suu wiina ki bel bel.

Manahem, mul ma Israelna

¹⁷ Hu li ma Azariya, mul ma Yudana, basaɗ ki hu mulla dok-hindi yam dleeŋena ni Manahem ma goŋ Gadina mbuɗ a mul ma Israelna may. Nam ti mulla hu Samari basara doogo.

¹⁸ Nam li dlara ka ii Yawe jiviɗira. Hu iiri mamba halaŋ nam ka hin suluk ma Jeroboam ma goŋ Nebatna lam cuk suu Israelna hu cora halaŋŋa kiɗi.

¹⁹ Pul, mul ma Asirina jak hu mbassa Israella, Manahem ɦam doonora nekeɗ ii kelewna na buɓ buɓ dok-hindi, kay a nam njunum a nam hin kak eŋ hu mul mamba.

²⁰ Manahem fi gursu namma ni u taara nam tiniɗ kay suu Israelnara kay suu ɦizina halaŋ halaŋ, ni kay a ɦal gursu namma maŋ mul ma Asirina. Sa ma garaŋŋa dew ni ɦal sili dok-vadl. Mul ma Asirina hoŋ voo. Nam kak ka hu mbassa Israella gak gakgi.

²¹ U dlara vi Manahem sunda nam laɗta halaŋ ka ɓiiri hu magaara Sunda vi Muli suu Israelnara.

²² Manahem buu kaŋga eg somoyomu. Goromma Pekahiya varak mulna balamamu.

Pekahiya, mul ma Israelna

²³ Hu basara dok-vadlla vi Azariya, mul ma Yudana ni Pekahiya ma goŋ Manahemma kak a mul ma Israelna may. Nam ti mulla hu Samari ni basara mba'.

²⁴ Nam li dlara ka ii Yawe jiviɗira. Nam ka hin suluk ma Jeroboam ma goŋ Nebatna lam cuk suu Israelna hu dla cora bel belna kiɗi.

²⁵ Saam ma funumma Pekah ma goŋ Remaliyana vi vunum u suuna kamu, nam ci Pekahiya u Argabo u Agiya, casi ki ni hu Samari, suuna ay ummi dok-vadl ni suu Galaadna. Nam ci Pekahiya ki ci ni varak balamam a mulna.

²⁶ Sunda Pekahiya laɗta halaŋ ka ɓiiri hu magaara Sunda vi Muli suu Israelnara.

Peka, mul ma Israelna

²⁷ Hu basara dok-vadl yam mba' ta Azariya kaki a mul ma Yudana ni Peka ma goŋ Remaliyana kak a mul ma Israelna may. Nam kak hu Samari ti mulla basara dok-mba'.

²⁸ Nam li dlara ka ii Yawe jiviɗira. Nam ka hin suluk ma Jeroboam ma goŋ Nebatna lam cuk suu Israelna hu cora belna kiɗi.

²⁹ Hu li ma Peka ka hu mullana ni Teglat Falasar, mul ma Asirina, mba tli ɦoŋzi ma Yon, Abel Bet-Maaka, Yanoha, Kedes, Hasor, Galaad, Galile u mbassa vi Neftalira halaŋ. Nam yow suu hu mbas ndaɗtana, tuɗusi ha ki Asirina.

³⁰ Oze ma goŋ Elana vi vunum u suuna kay Peka cam ki ci ni, nam hin varak a mulna balamamu. Ni hu basara dok-mbara vi Yotam ma goŋ Azariyana hu mulla kay suu Yudanara may.

³¹ Dlara Peka laɗta halaŋ u sun mamba ka ɓiiri hu magaara Sunda vi Muli suu Israelnara.

Yotam, mul ma Yudana

³² Hu basara doogora vi Peka ma goŋ Remaliyana a mul ma vi suu Israelna ni Yotam ma goŋ Azariyana kak a mul ma Yudana may.

³³ Hu li ma nam kak mulla na ni, basaɗam tew ki ni dok-mba' yam vadl. Nam ti mulla hu Yerusalemmi basara doogo yam kariya. Sem sum ana Yerusa ni goŋ Sadokka.

³⁴ Nam li ni dlara ii Yawe jivira. Nam li dlara ni ko ndal bum Azariya na dege dege.

³⁵ Na lay ni li ma mbuy kolona ka bulum kiɗi. Suuna tuɗ fok a li ɓivunna ŋgal mbitla his jivira hu li ma buy kolo namma gak gak. Nammi sa ma hoŋ min vun ma ŋgolna vi Ziŋ Yawera kolona.

³⁶ Dlara Yotam laɗta u sunda nam laɗta halaŋ ka ɓiiri hu magaara Sunda vi Muli suu Yudanara.

³⁷ Hu coki ndaɗta ni Yawe gijaŋ sun Ressin, mul ma Sirina, ay kay suu Yudana u Pekah ma goŋ Remaliyana.

³⁸ Yotam buu ga eg somoyomu. Asi tosom eg somoyom hu Ҥoŋzi Davidna. Gooromma Akaz varak balamam a mulna.