2 MULINA 14 - Boy Lonana

Amasiya, mul ma Yudana

¹ Hu basara mbara ta Joas ma goŋ Joasazna kaki a mul ma Israelna ni, Amasiya ma goŋ Joas, mul ma Yudana, varak a mulna may.

² Nam kak mulna na ni basaɗam ki ni dok-mba' yam vadl. Nam ti mulla hu Yerusalemmi basara dok-mba' yam dleeŋe. Sem sum ana Yoadan, ni goora Yerusalemba.

³ Nam li dlara jivi ii Yawera, ka vam ko ndal David na gawɗi. Nam li ni ko ndal bum Joas lira na dege dege may.

⁴ Na lay ni li ma mbuy kolona ka bulum kiɗi. Suuna tuɗ fok a li ɓivunna, ŋgal mbitla his jivira kolo kay li ma mbuyna gak tuwa.

⁵ Hu li ma Amasiya um ŋgaa ki ga hu mulla may ni, nam hin ci suu may suu cam bum kina kiyo.

⁶ May nam ci goryoŋ suu may suu cam bum kina ka kiɗi, ko ndal Yawe di ay ki hu gaɗta vi Moizza na ana, «Sa ka ci buna ki kay dlara vi goorombaɗi, ka ci goona ki kay dlara vi bumbaɗi may. Sana gegelay fi maɗna ni kay dla coomba nam laɗ u tambara.»

⁷ Amasiya ni sa ma ci asgaa suu Edomma hu ɦuɗugum mayra vuvuna. Amasiya ci asgaa suu Edomma fun duuna ni buɓ buɓ doogo. Nam tli ɦoŋzi ma Selana ki may, hin tin sem zi namma ki ana, Yokteel, ta ta cemi sem zi namma ni na.

⁸ Amasiya cuk vun sunda ha eg Joas ma goŋ Joasazna, goŋgola ma vi Jehuna, mul ma Israelna, dam ana, «Mbay duu u anu.»

⁹ Joas, mul ma Israelna, sun ha eg Amasiya, mul ma Yudana, dam ana, «Fali taa dew ni, gu ma siina coli kolo kay ɦinira Libanda. Nam joɓ gu sedrena ana nam ɦam gooromba nam ɗumuɗ maŋ gooromma, may ni vabakŋa jak kay gu ma siina tayam ki kaŋgaa.»

¹⁰ Joas hin di hu olo ana, «Aŋ furi ana, aŋ ci suu Edomma ha kiyo, tok iriŋ ha ni u ŋga taaŋ ndaɗta hol kak ha vo hu ziiŋu. Aŋ min a duu duu ma hin a daɓ ki u aŋ cona ni kay mege? Lini caŋ kiwa u suu duu suu Yudana halaŋŋi aŋ hin li ni nage?»

¹¹ May ni Amasiya ka caa yam kay boy ma damma ay wannaɗi. Joas, mul ma Israelna, yow ha u suu mamsina. Suu mamsina u suu duu suu vi Amasiyana duu tasi hu Bet Semekŋi hu mbassa Yudara.

¹² Asgaa suu Israelna ci asgaa suu Yudana. Asgaa suu Yudana yow piira vo halaŋ halaŋ.

¹³ Joas, mul ma Israelna, vi Amasiya, mul ma Yudana, goŋ Joasna goŋgolo Ahaziyasna daŋgayna. Nam jak hu Yerusalem hawaɗ gulumunna ki kaŋgaa, fiyek li ma nam toom kina li va ma meter kis kis mba' duk ɦoŋ vun gerek ma Efrayimma u vun gerek ma do ay keŋŋa.

¹⁴ Nama yow tlesuu jivi suu ay hu Ziŋ Yawera, lorra gursuna u tlesuu jivi suu ka huna halaŋ halaŋ, u begera ka hu ziŋ mulnara bel bel lay. Nam yow suuna ay balna, mbaarasi ki hu Samari.

¹⁵ U dlara Joas laɗta, sunda u duu ma nam duu u Amasiya, mul ma Yudana, halaŋ ka ɓiiri hu magaara Sunda vi Muli suu Israelnara.

¹⁶ Joas buu ga eg somoyomu. Asi pammi hu Samari eg muli suu Israelna. Gooromma Jeroboam varak balamam a mulna.

¹⁷ Amasiya ma goŋ Joasna, mul ma Yudana, li basara dagan miɗ ma vi Joas ma goŋ Joasaz, mul ma Israelna, ni doogo yam vadl.

¹⁸ U dlara Amasiya laɗta halaŋ ka ɓiiri ga hu magaara Sunda vi Muli suu Yudanara.

¹⁹ Asi vi vunusi kam hu Yerusalem a cam kira. Nam pii tuɗ ki hu Lakis. Asi sun suuna cuɗum um hu Lakis, tuɗ cam ha ki ni hu Lakis.

²⁰ Asi tlam maɗam ay u kulumina, mba pam ki vo Yerusalem eg somoyom hu Ҥoŋzi Davidna.

²¹ Suu hu Yudana halaŋ tok vunusi tli Azariya ma basaɗam ki doogo yam karkiyana kakam fokosi a mulna kay balam bum Amasiya.

²² Nammi sa ma ka balam bum ɓaɗ ɦoŋzi ma Elatna ki, hin hoŋ minim ki kolo balamamma.

Jeroboam ma mbana, mul ma Israelna

²³ Hu li ma Amasiya ma goŋ Joasna li basara ki doogo yam vadl a mul ma Yudana ni, Jeroboam ma goŋ Joasna kak hu Samari a mul ma Israelna may. Nam li basara hu mulla ni dok-fiɗi yam dew.

²⁴ Nam li ni dlara ka ii Yawe jiviɗira. Nam ka hin suluk ma Jeroboam ma goŋ Nebatna lam cuk suu Israelna ga hu belna kiɗi.

²⁵ Nammi sa ma hoŋ ɓaɗ mbassa vi suu Israelna ay ki halaŋŋa, col ay Lebo-Hamat ii mbayaw na ta ta tew ay ki fun mbo lum ma Galakŋa ii daliya. Ni ko ndal sa ma jok vun Lona Joas ma goŋ Amatayna ma Gat Heferna di ay ki fok jewra na, dlara Yawe takamba ay kira.

²⁶ Yawe wi hahawra vi suu Israelnara. Asi ni goo vuɗ kaɗi lay, mbaɓu kaɗi lay, sa ma njun kay suu Israelna kaɗi.

²⁷ Yawe di ka ana nam a bulum sem suu Israelna ki kay ndaŋgara naɗi. Kay ndaɗta nam suɗusi ki u saɓak Jeroboam ma goŋ Joasna.

²⁸ U dlara Jeroboam laɗta, duu ma nam duuna, nam tli Damas u Hamat mbassa vi suu Yudana ay ki maŋ suu Israelna. Dlaamba ka ɓiiri hu magaara Sunda vi Muli suu Israelnara.

²⁹ Jeroboam buu kaŋga eg somoyomu u muli suu Israelna. Gooromma Zakari varak balamam a mul ma Israelna.