Biblia Todo Logo
Bìoball air-loidhne

- Sanasan -

2 MULINA 13 - Boy Lonana


Joasaz, mul ma Israelna

1 Hu li ma Joas ma goŋ Ahaziyana li basara ki hu mulla dok-mba' yam hindi a mul ma Yudana ni Joasaz, ma goŋ Jehuna, mbuɗ mul ma Israelna may. Nam ti mulla kakŋi Samari li basara hu mulla ni doogo yam kiɗisiya.

2 Nam li dlara ka ii Yawe jiviɗira. Nam li ni suluk ma Jeroboam ma goŋ Nebatna lam cuk suu Israelna ga hu cora halaŋŋa. Nam ka hin co ndaɗta kiɗi.

3 Huu Yawe ɓeŋ ki egesiya. Nam hinisi ki hu duk ko Hazael, mul ma Sirina, tew tew, hinisi ki ko goromma, Ben Hadad, ni na lay.

4 Na may Joasaz cen Yawe heɓem hurumu. Nam humumu kay nam wi hahawra vi suu Israelna, dlara nekka mul ma Sirina tinisira kasira.

5 Yawe ɦal sa ma suɗ suu Israelna kina aya. Suu Israelna hin suɗ ki hu duk ko mul ma Sirina. Asi lak hu mbutluɓ masina ko fok jew dayra na.

6 Na lay ni asi ka hin dla cora Jeroboam cuk suu Israelna ka huruɗta kiɗi. Asi tuɗ fok u co ndaɗta gak gak. Gu ma ceɗi teteɗna ma vi Aserna ka pii kolo hu Samari tu gak gak.

7 Suu duu suu hin ko Joasazna ni suu jaŋ kulumina na dok-vadl, pus pusna ni doogo, suu duu suu semba ni buɓ buɓ doogo may. Kay mul ma Sirina ci suu wanna ki ni halaŋ halaŋ. Nam lasi ki ko ndal gugum ndaŋgara suuna tayaɗ ki kaŋga u sesira ɦawa na.

8 U sunda Joasaz laɗta, u dlara nam laɗta halaŋ ka ɓiiri ga hu magaara Sunda vi Muli suu Israelnara.

9 Joasaz buu ga eg somoyomu. Asi pammi hu Samari. Goromma Joas varak a mulna balamam may.


Joas, mul ma Israelna

10 Hu li ma Joas, mul ma Yudana, li basara ki hu mulla dok-hindi yam kiɗisiyana ni, Joas ma goŋ Joasazna mbuɗ a mul ma Israelna balam bum may, ti mulla hu Samari ni basara doogo yam karkiya.

11 Nam li dlara ka ii Yawe jiviɗira. Nam ka hin suluk ma Jeroboam ma goŋ Nebatna lam cuk suu Israelna hu halaŋŋa kiɗi, tuɗ fok u dla cora na gak gak.

12 U dlara Joas laɗta, dlara nam laɗta halaŋ, duu ma nam duu u Amasiya, mul ma Yudana, halaŋ ka ɓiiri hu magaara Sunda vi Muli suu Israelnara.

13 Joas buu ga eg somoyomu. Jeroboam varak a mulna balamamu. Asi pi Joas ni hu Samari eg muli suu Israelna.


Miɗ ma Elize miɗna

14 Hu li ma Elize vi tuguɗiira ka a col koloɗina, mulna Joas mbay um goɓ ha kaŋga kam na ni tiira, di ana, «Bunu, Bunu, aŋ dew ni su ki kay pus pusna u suu kulumi suu Israelna halaŋ.»

15 Elize dam ana, «Tli gu mbuurura may, yow mbuurura koŋ may.» Joas tli gi mbuuru kom dew may, yow mbuurura kom may.

16 Elize di mul ma Israelna ana, «Tin mbuura hu taŋaɗu.» Nam tiniɗ hu may. Elize tin kom kolo kay ko mulna may.

17 Hin di ana, «Mal ii zira ta ha u maɗiina nara kiyo.» Joas malaɗ ha ki may. Elize hin dam ana, «Mun haa.» Nam hin mun ha may. Elize hin dam ana, «Ni mbuuru mayra su kay suuna ta vi Yawera. Mbuurura su kay suu Sirina, aŋ hin dik suu Sirina hu Afek ta ta daɓasi kiyo.»

18 Elize hin di Joas ana, «Tli mbuura koŋu.» Nam tlaɗ kom may. Elize hin di mul ma Israelna ana, «Waɗ ndaŋgara.» Nam waɗ ndaŋgara yam hindi, hin seŋ tamu.

19 Sa ma vi Lonna hurum ɓeŋ egem hin di ana, «Lini aŋ waɗ ni yaŋ vadl u karkiya ni aŋ hin ci gin suu duu suu Sirina daɓasi ki may. Wanda ni aŋ hin dikisi ni yaŋ hindi ɦawa may.»

20 Elize miɗa. Asi hin pam may. Na may hu gijaŋŋa vi basara wilira gaw ni, suuna yow ay Moab mba cuk hu mbassa Israella ɦurum tlena.

21 Fali taa dew ni asi tuɗ a pi sana, wi suu ɦurum asina ay na ni, asi gi sa ma miɗina ha hu zul Elize ni na zak gaw ni, yow liŋŋa. Sana tuɗ ŋgen ay kaŋga eg sok Elize na ni dliɗ ki, col ay ki kolo u semmi na gaw.


Suu Israelna su kay suu Sirina

22 Hazael, mul ma Sirina, las suu Israelna ta ta hu li ma Joasaz ka hu mullana halaŋ.

23 Na may Yawe hin wi hahaw suu Israelna. Nam takasi oo mamba, mbuɗ irim ay egesiya, ni kay galam mamba nam vaɗ ay u Abraham u Isaak u Yakobpa. Nam ka min a gasi njafasi kiɗi. Kay ndaɗta nam dikisi ha ka ki egem dayɗi.

24 Hu li ma Hazael miɗ kina, goromma Ben-Hadad varak ka kay mulla Sirira ni namu.

25 Joas ma goŋ Joasazna, ɓaɗ ɦoŋzi ma Israel ma Hazael tlam ka kina ki ko gorom Ben-Hadad halaŋ halaŋ. Hu li ma asi li duuna ay u bum Joasazna, Joas dik Ben-Hadad yam na hindi, yow ɦoŋzi ma Israelna ki balamam halaŋ halaŋ.

Bible Moussey © Bible Society of Chad, 2002.

Bible Society of Chad
Lean sinn:



Sanasan