2 MULINA 12 - Boy Lonana

Joas, mul ma Yudana

¹ Joas kak a mulna ni basaɗammi kiɗisiya.

² Joas fi mulla ni hu li ma Jehu basaɗ ki hu mulla kiɗisiyana may. Nam li basara hu mulla ni dok-fiɗi hu Yerusalem. Sem sum ana Sibiya, ta goora Bersebara.

³ Joas hu iiri mamba halaŋŋi nam li ni dlara jivi ii Yawera. Kay ana Yoyada, mul ma li ɓivunna, haɗammi namu.

⁴ Na lay ni li ma mbuy kolo ma asi goɓ loogi suu ɦawana bulum ka kiɗi. Suuna ka tuɗ fok u ɓivun ma lam kolo kay li mbuyna u ŋgalla ŋgal mbilta tu gak gak may.

Joas min Ziŋ Lonara kiyo

⁵ Joas di muli suu li ɓivunna ana, «Gursu ma suuna ɦam ay hu Ziŋ Yawera halaŋ, gursu ma suuna taaram hu kaana wanna, taara kay sana dew ɦal u ndak mambara, gursu ma sana ɦam ay u furi mamba hu Ziŋ Yawerana,

⁶ ma muli suu li ɓivunna ka yowom ki kay tasina, gegelay ni wi ii mamma. May ni asi min ii Ziŋ Lonara, li ma ka ki ɓalaki zeɗ zeɗ wanna kiyo.»

⁷ May tuɗ tew hu basara dok-mba' yam hindira hu li ma Joas kak a mulnana ni muli suu li ɓivunna min ii Ziŋ Yawera ndaɗta ka tuɗi gak.

⁸ Mulna Joas yi Yoyada ha egem u suu li ɓivun suu daŋŋa halaŋ joɓosi ana, «Agi ka min Ziŋ Lonara li ma ɓalak kinaɗi ni kay me daŋ ologe? Cemi ni agi ka vi gursuna ko suu agi wasina oloɗi, hinimmi a min Ziŋ Lonara.»

⁹ Suu muli suu li ɓivunna vi vunusi ana asi yow gursuna ki oloɗi, hinimmi a min Ziŋ Lonara.

¹⁰ Mul ma li ɓivunna Yoyada tli zandukka cuk gursuna tiniɗ keŋ otel bik njufu, co zul li ma cuk gursuna kaɗ kolo may. Hu li ma asi cuk ha kalafi hu Ziŋ Yawera wa ni, mul ma li ɓivun ma ka juɓ u zandukkana cuk gursu namma hu halaŋ.

¹¹ Hu li ma asi wi wa ana gursuna mbuɗ hu zandukka ŋgolo ni, sa ma ɓii magaara vi mulnana u mul ŋgol ma li ɓivunna tuɗ kolo hu Ziŋ Yawera yow gursuna ndumum kiyo.

¹² Hu li ma asi ndum gursuna ki wa ni ɦam ko sa ŋgol ma min zina u suu ŋgolo suu ka hu Ziŋ Yawerana. Asi yow gursu namma gus gu ma min yam zira may, warak suu ka li sunda hu Ziŋ Yawerana may.

¹³ Warak suu minda, suu ceɗ ɦinira, hin a gus mbalna u ɦinira ceɗi jivi a min Ziŋ Yawera li ma ki ɓalakina may kay sun mayra ka li a bas kay a min Ziŋ Lonara halaŋ halaŋ.

¹⁴ Na may gursu ma taaram ay hu Ziŋ Yawera namma, sa ka yoo doono u nambi, ka yoo ŋgal uɗɗi lay, ka yoo goo ŋgal ma yam busu u nambi lay, tlesuu li sunda hu Ziŋ Yawera yoo lor lay, doono lay ka u nambi.

¹⁵ Asi ɦal gursu namma ni maŋ suu ka min zinana. Asi bas gursu namma ni a min Ziŋ Yawera.

¹⁶ Sa ka joɓ u gursu namma ko suu ɦasina kosina ana asi li ni ana megeraɗi. Kay asi li sun masira ni u gasira u huu ma dewna.

¹⁷ Gursu ma li ɓivun ma dlaɓ dukka u gursu ma li ɓivun ma bulum cora kina namma ca ni ka duk gursu ma min Ziŋ Lonaraɗi. Namma ki ni maŋ muli suu li ɓivunna.

Mulla vi Joassa daɓmi ko wanda na

¹⁸ Hu coki ndaɗta ni Hazael, mul ma Sirina, mba ndug zi ma Gatna, dikisi kiyo. Hazael min tam a tuɗ duu ɦoŋzi ma Yerusalemma may.

¹⁹ Na gaw ni mulna Joas yow tlesuu teteɗ suu Josafat u Joram u Ahaziya somoyom asina hinisi ka hu Ziŋ Yawerana u tlegeyem suu nam tinisi hu Ziŋ Lonara u tambana lay, u lor mayra ka duk begera hu Ziŋ Yawera bel u suu hu ziŋ mulnana lay sunusi ha maŋ Hazael, mul ma Sirina. Nam hin duu ma mba duu u Yerusalemma ni na gaw.

²⁰ U dlara Joas laɗta, dlara nam laɗta halaŋ ka ɓiiri hu magaara Sunda vi Muli suu Yudana.

²¹ Suu ŋgolo mam suu asgaarina vi vunusi kamu, asi tuɗ ci Joas ha ki hu Bet-Millo hu li ma nam min a tuɗ Sillana.

²² Suu ŋgolo asina ni Yozabad ma goŋ Simeatna u Yehozabad ma goŋ Komerna, suu ŋgolo mam suu sunda cam ki ni asiya. Asi pammi u somoyom hu Ҥoŋziŋ Davidna. Goromma Amasiyas hin varak a mulna balamamu.