2 MULINA 11 - Boy Lonana

Ataliya tli mulla Yerusalemba kiyo

¹ Hu li ma Ataliya, su Ahaziya, wi ana gooroɗna miɗ kiwa ni, ndaɗ hal ana ndaɗ gi njaf goryoŋ mulnana ki halaŋ.

² Yoseba ta goŋ mulna Joramba wayaŋ Ahaziyara, tli Joas ma goŋ Ahaziyana suɗum ki duk goryoŋ mulna suu ndaɗ a casi kina, tuɗ ŋgayam ki u cara ɦam tina kalafi kaŋga u layna. Asi ŋgayam ki ko Ataliya. Ndaɗ wam kaɗi, tew ka a cam kiɗi.

³ Nam li basara ay ki ŋgayra na karkiya u cara wulumba. Asi ay ki ŋgayra ni hu Ziŋ Lonara. Ni hu li ma Ataliya kaki a mulla ni ndaɗ may.

Joas asi fuurum ki a mulna huu Ziŋ Lonara

⁴ Hu basara kiɗisiyara ni Yoyada, mul ŋgol ma li ɓivunna, yi sa ma ŋgol asgaa suu yasi ana Kariyenna kay cerem kisna u suu asgaari suu daŋŋa ha egem hu Ziŋ Yawera, vi vunum u asi ko suu tam fokosi suuri na, hin takasi goŋ mulnana.

⁵ Ŋgoo dagan nam hin ɦasi voɗta dasi ana, «Gola agi tuɗ li ni ko ndal wandara na. Suu taa dukugi ɦiw ni tuɗ li sunda hu buu ma vi Lonna may, suu hiniŋŋa ha a juɓ yam ziŋ mulnara may.

⁶ Suu a mbarna tuɗ ha ki vun grek ma Surna na may. Suu hindina varak tasi a juɓ vun ziŋ mulnara may.

⁷ Ii suu may suu hin ki mba' cana tuɗ ka a li sunda hu buuma vi Lonaɗina, mbay a juɓ u goozoŋ ma mulna hu Ziŋ Yawera tani may.

⁸ Suu asgaarina halaŋ yow ŋgewi masina kosiya. Asi ŋguy yam mulna, tinim hu li ma nam kal ay ki a tuɗ huna. Sa ma ɦuɗ tam ay egegina ni agi camu.»

⁹ Suu ŋgolo suu asgaarina usi kis kisna li ko ndal mul ma li ɓivunna, Yoyada, dasira na may. Gegelay ni yow suu mamsina umu, suu a li sunda hu buu ma vi Lonna u suu may suu tuɗ ki keŋŋa u suu tuɗ eg mul ma li ɓivunna, Yoyadana.

¹⁰ Mul ma li ɓivunna ɦal saɓpa u mbari ma vi Davidna ay ko sa ŋgol ma fok suu asgaari suu kisna. Tle asina ay cuki ni kalafi hu Ziŋ Yawera.

¹¹ Suu asgaarina njaa fun Ziŋ Lonara. Suu lak ii keŋ ma mbayaw ii u maɗiina nana may, suu lak ii keŋ ma dali ii u maɗiina nana may, tok eg otella, ŋguy yam mulna ki na cutl.

¹² Yoyada hin kal goŋ mulnana ay ki kiɗiki, tinim jumba mulla kamu u tlesuu tak ki ana ni mulnana. Asi kakam a mulna fuurum ki u mbulna may. Asi gijaŋ ko kosi sawalla ha kolo ana, «Gaŋ deɓe, mulna.»

¹³ Ataliya hum vun ma suuna lam may, tuɗ irisi ha liŋŋa nana may ni ndaɗ tuɗ ha eg suuna fun Ziŋ Yawera may.

¹⁴ Ndaɗ gola ni mul ma wilina coli eg mbal ma duk gayra hu Ziŋ Lonara zow, ko ndal asi li day dayara na. Muli suu daŋŋa u suu bu tlena a luuna coli eg mul ma wilina ca may, u tokolomma lay ay laki na tok eg mulna. Suuna halaŋ ka furi cocoo. Asi bu tokolomma. Ataliya haa baraw maɗna ki oo uɗ kolo di ana, «Ni dlara ŋgeŋŋa, ni ŋgeŋŋa.»

¹⁵ Mul ma li ɓivunna Yoyada di asgaa suu kisna u sa ŋgol ma fokosina ana, «Kalagira ha ki hu Ziŋ Lonara duk suuna sa ma tuɗ uɗna ni agi cam ki u ŋgewna.» Kay ndaɗta mul ma li ɓivunna hin di ana, «Ka agi caɗ kalafi tani hu Ziŋ Yaweraɗi.»

¹⁶ Asi vi Ataliya aya. Ndaɗ mba vo fun ziŋ mulna hu vun grek ma vi kuluminana may ni, asi caɗ ni hu li namma gaw.

¹⁷ Yoyada njun galamba duk ɦoŋ Yawe u mulna u suuna may kay a asi li ni suu vi Yawena. Nam taɓ Galamba duk ɦoŋ mulna u suunara may.

¹⁸ Suuna halaŋ tuɗ hu ziŋ Baalla. Asi hawaɗaɗ kiyo, to otella hura ki may, u fuli suu mini huna lay, ci mul ma li ɓivunna vi Baalna, ki may. Yoyada tin suuna a juɓ u Ziŋ Yawera.

¹⁹ Ŋgoo dagan nam yow suu ŋgolo suu asgaarina usi kis kisna may. Suu asgaarina may, u suu may suu belna may. Asi cuk mulna ay ki kaŋga hu Ziŋ Lonara. Asi sel ay ki hu vun ma vi suu asgaarina, tuɗ hu ziŋ mulna Joasna. Nam tuɗ kak kay dlamba mulla vi mulina.

²⁰ Suu may suu hu mbassana halaŋ furi cocoo. Ҥoŋzina hin heɓpa may. Ataliya asi caɗ ki u ŋgewna hu ziŋ mulnana.