2 MULINA 10 - Boy Lonana

Cira ci dee suu vi Akabma kira

¹ Akab goryom ka hu Samari gor njufiina ni dok-kiɗisiya. Jehu ɓii magaara ha maŋ suu ŋgolo suu hu Samarina u ŋgolora fok suu duunara u suu ka haɗ goryoŋ Akabmana ana,

² «Agi ka so tagi kay goryoŋ mulnana, agi cukusi kulumina u pus pusna lay, agi cuki ni hu ɦoŋzi ma saɓak cocona lay hu li ma agi fagi magaa ndaɗta wa ni.

³ Gologi duk goryoŋ mulnana, ma saɓak coco ndakina agi tinim ha fokogi a mulna, minigi tagi ha ki a duu kay suu vi mulnana.»

⁴ Asi mbuɗ ki ndaa cocoo, ɓak tasi ana, «Muli suu mbana ndak ay ka funumbi ɗow, ɦakŋi gol ko aygi su?»

⁵ Na gawna, sa ŋgol ma hu ziŋ mulnara, sa ma ŋgol asgaana u suu ŋgolo suu hu ɦoŋzi nana u suu haɗta ɓii hoŋ dira ha maŋ Jehu ana, «Ami ni suu sun maŋsina. Ami hin li dlara aŋ damira ayra halaŋ. Ami ka kak sa ki a mul kay tamiɗi. Aŋ li dlara aŋ min a laɗta.»

⁶ Jehu hoŋ lasi magaara daŋga ha a mbara dasi ana, «Lini agi gasi ni varanu, lini agi min a humun vununu ni, kaagi yam goryoŋ sa ŋgol maginana ay na halaŋ, ŋgafangi vini u ndaɗ hu Jizreel.» Na may goryoŋ mulna suu dok-kiɗisiyana ki ni ɓorowi fok suu ŋgolo suu hu ɦoŋzinana a wulusira.

⁷ Hu li ma magaa ndaɗta fasi may ni, asi yow goryoŋ mulnana ŋgaɗasi ki u dlasira dok-kiɗisiyara bel bel. Asi hin cukusi yasi hu kalamina sunuɗ ha maŋ Jehu hu Jizreel.

⁸ Sa ma vun sunda dew mba dam ana, «Asi mbaa yam goryoŋ mulnana ay wa.» Jehu di ana, «Cukuɗ iriɗ ha na mba' vun grek ma ɦoŋzinana ta ta vini maɗii tuwa.»

⁹ Vin maɗiira ni Jehu kal ay ki mba col ki fok suuna dasi ana, «Agi halaŋŋi ɗegee, anni sa ma di ŋgeŋŋa kay sa ŋgol mannana, cam ki ni anu, na ɗaŋŋi suu cana sa ma casina ni ge mayge?

¹⁰ Agi wi ki ana boy ma Yawe dam kay suu vi Akabma ma hin bay li ki dew kaɗi. Yawe faɗ ki ni vun boy ma nam dam ay ki fok jew fun saam ma jokom vunumma Elina.»

¹¹ Jehu ci suu vi Akab suu hin iiri tu hu Jizreelna ki bel bel u suu may suu haɗ ki u dlaamba minim dlaamba cocona lay u muli suu li ɓivun suu vi mulnana lay. Nam hin sa ka a pii ki na dewɗi.

Ci goryoŋ mul ma Yudana kiyo

¹² Ŋgoo dagan Jehu tuɗ hu Samari. Nam ay hu voɗta mba tew hu Bet-Eked ta vi suu taa yoorina.

¹³ Hu li ma nam ŋgaf gorseŋ Ahaziya, mul ma Yudana, may ni nam dasi ana, «Agi ni suu taarage?» Asi hoŋom dira ana, «Ami ni gorseŋ Ahaziyana. Ami tuɗ ni a ɦal suu mamira kay goryoŋ mulnana u goryoŋ ca mullana.»

¹⁴ Jehu di suu umma ana, «Vagisina iiriya.» Asi yowosi iiri, tuɗ casi ha ki ci ni, cukusi maɗasi ha ki hu goloŋga Bet-Ekedda. Asi halaŋŋi dok-fiɗi yam mba', sa suɗ ka dukusi dewɗi.

Jehu ŋgaf u Yonadab

¹⁵ Ҥuɗ ha ki na day ni Jehu wi Yonadab ma goŋ Rekabma tuɗ ay ŋgafam aya. Jehu gam deɓpa, joɓom ana, «Na ni huruŋ ɗegee u an ko ndal an hurun ɗegee egeŋga na may su?» Yonadab hoŋom dira ana, «Ҥaa.» Jehu hin di ana, «Jiviya mbay vay ko taya.» Jehu hin tlam kolo hu pus pus mamma.

¹⁶ Hin dam ana, «Mbay u anu, mbay golon tanda ki fet kay Yawera tu ɗaŋ.» Asi tuɗ ko tasi u Jehu hu pus pus mamma dew.

¹⁷ Nam mba tew hu Samari may ni, Jehu ci u goryoŋ Akab suu hin iiri ka cuki hu Samarina ki bel bel, nam gi njaf dee ndaɗta ki ni na gaw, ni ko ndal Yawe di ay ki fun sa jok vun Lona, Elira, na.

Jehu doo cenda cen Baalla kiyo

¹⁸ Jehu tok suu Israelna halaŋ dasi ana, «Akab sun Baal cocoo, an Jehu may ni min a goɓ Baal ni suumu.

¹⁹ Cemi wanda ni yangi suu jok vun lona vi Baalna ay egen halaŋ. Suu may suu sun Baalna halaŋ, suu muli suu li ɓivunna suu vi Baalna halaŋ. Sa hin ha ki keŋ dewɗi kay an min a li ɓivun ma dlam ŋgol cocona maŋ Baal. Sa ma hin ha ki na ka hin a kak iiri oloɗi.» Doli Jehu li mbeleŋŋa ni a ci suu goɓ Baalna kira.

²⁰ Jehu di ana, «Karam wanni tokka teteɗta vi Baalla kaa.» Asi yi suuna ay halaŋ halaŋ.

²¹ Jehu cuk sunda ki ni hu mbassa Israella halaŋ. Suu may suu goɓ Baalna mbay ki halaŋ halaŋ. Sa hin ha ka ki na dewɗi. Asi cuk kalafi hu zira vi Baalla. Huu zira oy ki u suuna ni na gaw.

²² Jehu di sa ma ɓorow baraw ma teteɗna maŋ suu goɓ Baalna ana, «Yow barawna ay ki bunsu maŋ suu a sun Baalna halaŋ.» Nam yowosi barawina ay ki kiɗik may.

²³ Jehu u Yonadab ma goŋ Rekabma mbay kalafi hu zira vi Baalla. Nam di suu ka li sunda maŋ Baalna ana, «Gologi ki jiviya, ka sa ma goɓ Yawe li dukugi kalafiɗi. Li ni suu goɓ Baalna doy hol.»

²⁴ Jehu u Yonadab cuk ha kalafi a li ɓivun ma ɦawana u ɓivun ma ŋgalam ki ŋgalina. Doli ɗini Jehu lak suuna ka ki bunsu na dok-kalavandi dasi ana, «Lini sa ma dukugi hin sa duk suu an ɦagisina ki hu duk kogi wanna wa ni, sa namma hin warakŋi u iiri mamba kay sa ma nam hinim suɗna may.»

²⁵ Hu li ma asi daɓ ɓivun ma ŋgalam ki ŋgalina may ni, nam di asgaa suu liŋ cocona u suu ŋgolo masisina ana, «Cukugi kalafi usiya, casi kiyo, hinigi sa a suɗ ki dewɗi.» Asi casi ki u ŋgewi suu sii cocona, hu li ma asi cukusi maɗasi ha ki doŋ kaana ca ca ni, asgaa suu liŋ ɦayna u suu ŋgolo masisina hoŋ ay vo hu ɦoŋzina hu li ma zira vi Baal ka mini huna.

²⁶ Asi tli ɦinira ceɗi teteɗta ta ay tini kalafira ay ki bunsuwa, mba ŋgalaɗ kiyo.

²⁷ Hu li ma asi ŋgal fuli ma vi Baal namma ki ŋgal ni, hin hawaɗ ziŋ Baalla ki gaw may, mbuɗ li namma ki zulla oo soɗna maŋ suuna halaŋ, dla ndaɗta ka li ta ta cemi.

Jehu, mul ma Israelna

²⁸ Jehu bulum cenda cen Baalla ki hu mbassa Israella ni ko ndaɗta na.

²⁹ Na vam lay ni nam ka hin dla cora Jeroboam ma goŋ Nebatna laɗta kiɗi. Nam cuk suu Israelna hu cora halaŋ a goɓ goo mbutl lorra hu Betel u Dan.

³⁰ Kay ndaɗta Yawe di Jehu ana, «Aŋ li jiviya, li dlara irin jivira aŋ li suu vi Akabma ni ko ndal an dira na may, kay ndaɗta goryoŋ ta ta tew kay goŋgolo maŋ ma fiɗina hin kak kay dlamba mulla fok suu Israelna.»

³¹ Na may Jehu tuɗ ka u gaɗta vi Yawe Lonara u hurum belɗi. Nam ka hin dla cora Jeroboam cuk suu Israelna huruɗ halaŋga kiɗi.

³² Hu coki ndaɗta ni Yawe gijaŋŋa a yow ki u mbassa vi suu Israelna. Nam hin voɗta maŋ Hazael, mul ma Sirina, duu u asi ay keŋ lina nde nde bel.

³³ Col ay fun mbo lum ma Yurdanna u maɗiina na mbassa Galaadta u mbassa vi suu Gadna u suu vi Rubenna u suu vi Manasena ta ta tew ay ki Aroer fun mbo lum ma Arnonna, Galaad u Basan lay.

³⁴ U dlara Jehu laɗta halaŋ ka ɓiiri hu Magaara Sunda vi Muli suu Israelnara.

³⁵ Jehu buu kaŋga u somoyom wa. Asi pammi hu Samari. Goromma, Joasaz, varak balamam a mulna.

³⁶ Jehu ti mulla kay suu Israelna ni basara dok-mba' yam kalavandi.