2 MULINA 1 - Boy Lonana

Lona kaɓakŋa kay poyra vi Ahaziyassa

¹ Hu li ma mulna Akab miɗ kina ni, suu Moabma mbuɗ yara min a suu Israelna ti kasi oloɗi.

² Fali taa dew ni Ahaziyas ay kolo hu zira mini kolo kay ndaraɗtara. Nam ndi ay kaŋga dag ki cocoo. Nam cuk suuna vun sunda dasi ana, «Tuɗugi joɓogi Baal-Zebub, lo ma vi suu Ekronna aya, na ni an ndak a garaɗ ki ko dagka fan wandara ko su?»

³ Sa sunda huulona vi Yawe mba di Eli ma Tisbena ana, «Tuɗ hu voɗta, tuɗ ŋgaf vok suu mul ma Samarina cukusi ayna dasi ana, Lo vi suu Israelna kaɗi su? Agi a tuɗ joɓ Baal-Zebub, lo ma vi suu Ekronna, na day ni kay mege?»

⁴ Kay ndaɗta Yawe di ana, «Lay ma aŋ buuri kam wanna aŋ ka ndak a col ki kolo kam oloɗi. Aŋ hin miɗ ki gasi.» Eli hin tuɗ may.

⁵ Suu vun sunda hoŋ ay eg mulna. Mulna dasi ana, «Agi hin hoŋ ay ni kay mege?»

⁶ Asi hoŋom dira ana, «Sana col ay kolo na ŋgafami ay dami ana, Hoŋogi eg mul ma sunugi ayna, agi tuɗ dam ana, Yawe di ana, aŋ tuɗ a joɓ Baal-Zebub, lo ma vi suu Ekronna, ni Lo ma vi suu Israelna kaɗi su? Kay ndaɗta lay ma aŋ buuri kamma ni aŋ ka cuk ki kaŋga oloɗi. Aŋ hin miɗ ki gasi.»

⁷ Mulna joɓosi ana, «Sa ma ŋgafagi voɗ dagi boy nammana tam ana mege?»

⁸ Asi dam ana, «Sa namma ni sa ma cuk baraw ma cili u tlimiɗtana njun baraw ɗikka hurum may.» Nam mulna hin di ana, «Ni Eli ma Tisbena.»

Ahaziyas hal a vi Eli

⁹ Mulna sun sa ma ŋgol asgaana u asgaarina um dok-vadl. Nam tuɗ ha kolo egemu, ni Eli ha ki kaki kolo kay ɦinira. Sa ma ŋgol asgaana dam ana, «Sa ma vi Lonna, mulna di ay ni namu aŋ ɗiŋ ay ki kaŋgaa.»

¹⁰ Eli hoŋ dira maŋ sa ma suuna um dok-vadlna ana, «Lini anni sa ma vi Lonna ni ko kura col ay kolo huulona ŋgalaŋ ki u suu maŋ suu dok-vadl asina.» Kura col ay kolo huulona, ŋgalam ki u suu mam suu dok-vadlna halaŋ.

¹¹ Mulna hoŋ sun sa ŋgol ma daŋŋa ha u suuna um dok-vadl olo. Sa ŋgol namma tuɗ dam ana, «Sa ma vi Lonna, mulna di ay ana aŋ diŋ ha ki ga na zak zak.»

¹² Eli hoŋosi dira ana, «Lini anni sa ma vi Lonna ni ko kura col ay kolo huulona ŋgalaŋ ki u suu maŋ suu dok-vadl asina halaŋ.» Kura vi Lona col ay kolo huulona, ŋgalam ki u suu mam suu dok-vadlna halaŋ.

¹³ Mulna sun sa ŋgol ma daŋŋa ay u suuna um dok-vadl olo. Ma hindi namma ɗiŋ ha koloo, may nam tuɗ cuk vun givim kaŋga fok Eli, cenem di ana, «Sa ma vi Lonna, ko iiri manda gol iriŋ jivi na golge, u iirira vi suu sun maŋsina suu un dok-vadlna, li iriŋ jivi na li mayge?

¹⁴ Gola, kura col ay kolo huulona ŋgal suu fok jew u suuna usi dok-vadl, dok-vadl mbana ki wa. Cemi wandara iiri manda gol iriŋ jivi na golge?»

¹⁵ Sa sunda huulona vi Yawe di Eli ana, «Ɗiŋ ha ki ga u namu. Li ndaaɗi.» Eli ɗiŋ ay ki kaŋga, tuɗ eg mulna u namu.

¹⁶ Nam hin dam ana, «Gola ni boy ma Yawe damma. Aŋ sun a tuɗ joɓ Baal-Zebub, lo ma vi suu Ekronna ni, Lo ka vi suu Israelnaɗi su? Kay ndaɗta lay ma aŋ buuri kamma aŋ hin ka ɗiŋ ki kaŋga oloɗi. Aŋ hin miɗ ki gasi.»

¹⁷ Ahaziyas miɗ ko ndal boy ma Yawe dam ay fun Elina na may. Kayra goo ka kombira, wayamma, Joram, hin varak balamam a mulna. Ni hu li ma Josafat, mul ma Yudana, basaɗ ki hu mulla mba' tuna may.

¹⁸ U dlara Ahaziyas laɗta ka ɓiiri hu magaara Sunda vi Muli suu Israelnara.