2 KORINTNA 2 - Boy Lonana

¹ An saa ana an ka tuɗ ha varagi a mbuɗugi yoo oloɗi.

² Lini an mbuɗugi yoora ni sa ma hin mbuɗun hurun furira ni gege? Ni nam sa ma mbuɗun a yoorona.

³ Ni kay ndaɗta an ɓiirigi ha ni ko an lira na. An ka tuɗ ha varagiɗi kay suu a furiyun gin hurunna a mbuɗun yoora ni asi tok. An wi kan ana an li ka furiya ni agi lay furi may.

⁴ An ɓiirigi magaara ha wanni hurun haɗ hurun u tiina u simina irinu, ni ka ana a mbuɗugi ni yoora naɗi, kay agi wi ki ana an ka minigiya.

Heɓ hurugi eg sa ma lagi cora

⁵ Lini sana fi dlara yoora wani mbuɗum yoora ni ka anɗi, ni agi halaŋ kay ka a kalaɗ ki saɓakiɗira ni suu ɦiw dukugiya.

⁶ Kay sa namma ŋgolla vi suuna mba tok vunusi kaam ɓakŋa kamu.

⁷ Kay ndaɗta agi ndak a heɓ hurugi ki egemu, gaɗamu, kay ka a mbaaram dlara yoora egem su naɗira wanni agi mba ɗilim irimu.

⁸ An dagiya agi lagi egem wa na ni tak ana agi minimu.

⁹ Gola ni dlara an ɓiirigi magaara ha kaɗta, kay an gologi goliya, kay a wi ana agi ka hum u haɗ manda wan su?

¹⁰ Sa agi heɓ hurugi ki egemma an hurun ni heɓi may. Lini an heɓ hurun ki wa eg saani ko an hin va ma namma ki wa, ni an li dla ndaɗta ni kagi fok Kristu.

¹¹ Ka a hin Satanna su kaygiɗira wanni, kay dlaamba ka iriygi viɗiɗi.

Pol tam lam ndaana hu Troas

¹² Hu li ma an tew Troas a di Boy ma Ayra vi Kristu, u oora vi Bu Suuna an fi voɗta a li sunda.

¹³ Hu li namma an mbuɗ ndaana ŋgolo kay an fi wayayna Tit kaɗi. Kay ndaɗta an gi deɓpa maŋ suu Troasna ka sini, hinisi tuɗ Masedoin.

Saɓakŋa hu Yesu Kristu

¹⁴ Gagi deɓ Lona ma ɦaygi saɓakŋa ay tew tew kay taɓ mayra duk tay u Kristura. Nam li sunda u aya kay tak Kristu ki hu lina aragelay, ko mbul ma hisna his hu lina halaŋga na.

¹⁵ Ami ni ko his ma jivi ma Kristu ɦam maŋ Lonna na, ami ni maŋ suu ka hu voɗta suɗta, u suu ba kina lay.

¹⁶ Kay suu ba kina ni his ma miɗna, ma ɦal miɗna lay. Kay suu ka hu voɗta suɗta, ni his ma iirina ma ɦal iirira lay. Sa ma ndak a li sunda ndaɗta ni gege?

¹⁷ Ami ka ko suu may suu li paara u Boy Lonana naɗi, ni na ɗow Lona sunumi a di gasira ki fokomu ko suu sunda vi Kristu na.