2 JAŊ 1 - Boy Lonana

Gi deɓpa

¹ Anu an sa gol suu vina vi Lonna ɓii ha ni maŋ cara Lona ŋgaɓaɗta u goryoɗ suu an minisi gasina, an minigi ni ka an doy holɗi suu may suu wi gasira halaŋ minigi lay.

² Kay me gasira huruygiya ndaɗ hin li huruygi na gak gak.

³ Ko Lona Buna u Goromma, Yesu Kristu, ɦaygi oora, vaɗ huuna u heɓpa a aygi vi ɦal ndaɗta koygi u gasira u minda.

Gasira u minda

⁴ An wi ana goryok suu ɦiw ni li dlara gasira coco ko ndal Buna daygira na, ni an hurun furi ɦay.

⁵ Cecemi an ka joɓok haa cara, miniygi taygi duk taygiya. An ɓiirik ha ni ka gaɗta wiliraɗi, ni gaɗta ay humuɗ ay ki fok jew day dayra.

⁶ Minda ɗoɓoygi iriygi a li dlaaygira kay cee gaɗta vi Lona ni ndaɗu, gaɗta agi haɗaɗ ay ki fok jewra ni agi lagi dlaagira u minda.

⁷ Suu kaboyna zul ki hu duliyara cocoo asi ka vi ana Yesu Kristu mbuɗ ki gasi sana naɗi, sa di nana ni sa kaboyna, ni Babali ma vi Kristuna.

⁸ Gologi tagi jiviya a ba warakŋa vi sunda ami laɗ kagira kiɗi, ni na ɗow ana agi fi warak magina.

⁹ Lini gegelay ka tuɗ kay cee haɗta vi Kristuraɗi, li zaŋ irim ki na ɗow ni Lona ka hurumbi. Sa tuɗ kay cee haɗ ndaɗtana Goona u Buna ka hurum jak.

¹⁰ Lini sa maa mbay varagi wa haɗ ndaɗta li ay ka funumbi ni hinigina varagiɗi, gagina deɓbi lay.

¹¹ Sa gam deɓpana mbuɗ ni malaŋ dla cora nam laɗta.

Boy ma daɓ daganna

¹² Boyna ka funun a ɓakagi cocoo, an min ana an ka a ɓiirim hu magaa u yo bikgi lay, an wi ana an a tuɗ ha varagiya an hin ɓakagi u vunun na ni huruygi hin furi cocoo.

¹³ Wayakka Lona ŋgaɓaɗta u goryoɗ gak deɓ masira ha may.