2 DLAŊ MULINARA 9 - Boy Lonana

Ca mulla Sabara mba gol Salomon

¹ Ca mulla col ay hu mbassa Sabara, hum dla Salomon u sem ma tii ki cocona ha kiyo. Ndaɗ mbay hu Yerusalem a tuk yal ma vi Salomonna. Ndaɗ mba joɓom joɓ mayra eŋ cocora. Ndaɗ mbay u suu maɗ suu sunda uɗ bolow coco ugi jamballa mba ugi mbul ma his jivina, lorra ŋgol coco lay u ɦinira ceɗi ta gus loɓma may. Ndaɗ mba eg Salomon dam dlara ndaɗ saaraɗ ay huruɗ a dambara ki halaŋ.

² Salomon hoŋoɗ dira ki kay joɓ maɗta halaŋ, joɓpa doorom dew bay nam a faɗ hoŋ diiɗta kaɗi.

³ Ca mulla Sabara hum boy ma yal coco ma vi Salomonna. Ndaɗ golom ziimba jivi coco ta nam miniɗta may.

⁴ Ti may ma mbay kaŋga fokom kay tabullana, li ma suu mam suu sunda bu huna yal ma vi suu mam suu sundana suu sunda baraw ma ta suu sunda suu mbaa tina ay kay tabulla u tlesuu cirana, ndaɗ wi mulna kal ay ki kolo hu Ziŋ Yawera na, saara su ki kaɗ cocoo. Ndaɗ mbuɗ ni ko ndal miɗira ɦawa na.

⁵ Ndaɗ hin di mulna Salomon ana, «Dlara an humuɗ ay kaŋ hu mbas manda kay boy ma aŋ damma u yal maŋŋara ni gasi daŋ may.

⁶ Bay an a mba ki egeŋ tani tura ni an vi boy namma kaɗi, kay an wi dla ndaɗta ka ki u ii tanda tuɗi. Doli ɗi ni asi cuɗun ay ni nus dlaaŋga ɦawaa. Dlaaŋga su ki ni kay seŋ ma tii ma an humum ha ki keŋŋa olo.

⁷ Furira ka kay suu maŋsina, furira ka kay suu sun maŋsina suu ka laki fokoŋ tew tew a humuŋ boy maŋŋa u yal maŋŋana.

⁸ Gi deɓ Yawe, Looŋŋa, ma min a kakaŋ kay dlam mamba mulla ko mulna na a sun Yawe Looŋŋara. Ni kay ana Looŋŋa min suu Israelna cocoo. Kay a njafasi li ha fok gak gakka nam tiniŋ fokosi a mulna, kay a aŋ li ni dlara gasira u ɗegeera.»

⁹ Ŋgoo dagan ca mulla Sabara ɦal lorra maŋ mulna Salomon nekeɗ ii va ma kelew 3.500, mbulma his jivina ŋgol cocoo u ɦinira gus loɓ ɦayra lay. Sa wi mbul ma his jivi ko namma na ka day day ɦoyɗi.

¹⁰ Suu sunda vi mulna Hiram u suu sun suu vi Salomon suu tuɗ ay Offirna mbay u lorra u gu ma yam ana santalna usi ŋgol coco olo u ɦini mayra gus loɓma may.

¹¹ Mulna Salomon ci balafoŋŋa kolo hu Ziŋ Lonara u gu ma yam ana santal namma. Nam ceɗ tlesuu bura a gi soolla may, diŋŋa u tlesuu bu suu daŋŋa zeɗ zeɗ maŋ suu gi soolla. Day day hu mbassa Yudara ni sa wi tle asina ka na ɦoyɗi.

¹² Mulna Salomon di ca mulla Sabara ana ndaɗ joɓ tlesuu ndaɗ minisina halaŋ ko ndaɗ minda na, caa yaɗ ka kay tlesuu ay kaɗnaɗi. Ŋgoo dagan ndaɗ hin hoŋ vo u suu sun maɗsina may.

Ҥizza u Bibiŋil Salomonda

¹³ Hu basara dewra lorra Salomon faɗta ni nekeɗ ii kelewna 25.000.

¹⁴ Ni ndum mayra koyogina mbay u ndaɗta ka huɗi. Muli suu hu mbassa Arabira halaŋ u suu ŋgolo suu kay mbassa daŋga mbaa gi lorra u donora ay maŋ Salomon.

¹⁵ Mulna Salomon yoo mbari lorra na kis kis mba'. Mbari ma dewna nekemmi kelewna karkiya. Ni mbari ma ŋgolona sak sak.

¹⁶ Mbari ma gorina ni kis kis hindi may lammi u lorra yoorira lay. Mbari ma dewna nekemmi ii kelewna hindi hindi. Nam cuk mbari namma ni hu zira ŋgol mayra yaɗ ana Gura Libandara.

¹⁷ Mulna hin ceɗ dlamba ŋgolla mulla ndalaɗ taɗ ki u sii tlokka, hin hooroɗ taɗ ki u lorra halaŋ may.

¹⁸ Dlamba mul ndaɗta li ma tin semma ka hu ni irim kaay na zeɗ zeɗ karkiya. Li ma tin sem maa dew ni lammi u lorra. Keŋ dlamba li ma gi kom huna ni foto dlona ka coli hu mba' mba'.

¹⁹ Foto dlo ma daŋŋa ka hu njaari na doogo yam mba', keŋ li ma tuɗ ha kolo huna, karkiya bik gulu may, karkiya bik njuf may. Vi muli suu daŋŋa halaŋŋi sa li dlara ko ndaɗta na ka dew tuɗi.

²⁰ Tlesuu ci yona u gi summa vi Salomon halaŋ yoori ni u lorra. Tlesuu li sunda hu zira yaɗ ana Gura Libanda yoori ni u lorra. Tlena halaŋŋi sa ka yoo va u donoraɗi, kay hu cokira vi Salomon ni donora sa ka ŋgaaɗ duk dlaɗi.

²¹ Mulna lum kawi mamsina kaa. Nam sunusi u tlena hu mbassa dayra. Suu ka jaŋ lum kawi asinana ni suu vi mulna Hiram suu wi sun lum kawina. Basara hindi ni lum kawina hoŋ ay halaŋŋi ki oy u gi lorra, donora, sii tlokka, viina u layagi suu juɓ u zina.

²² Mulna Salomon su muli suu daŋŋa ki bel bel u begera lay u yalna lay.

²³ Muli suu hu duliyarna halaŋ min a mba wi Salomon kay yal ma Lona ɦamma hurumma, asi min a hum boy ma nam damma.

²⁴ Gegelay ni mba u vaam ma nam a ɦammana, gursura tlesuu yoori u lorrana, barawina, kawina, mbitla his jivira, kulumina, koro Makkana, tle asina mba ni hu basara tew tew.

²⁵ Salomon ka u zigini suu buu kulumi suu pus pusna na buɓ buɓ fiɗi u suu jaŋ kulumina buɓ buɓ doogo yam mba'. Nam cukusi hu ɦoŋzi ŋgol ma buu suu asgaana, vo tok eg mulna hu Yerusalem.

²⁶ Nam kak mulla ni kay muli suu daŋŋa halaŋ col ha fun mbo lum ŋgolna ta ta tew ay ki hu mbassa Filistinda, tuɗ ta ta tew ay ki ii hakara u mbassa Egiptera.

²⁷ Mulna gursu ma ka kom hu ɦoŋzi ma Yerusalemma ni ŋgol su gogoyra. Gu ma yam ana sedrena ni ŋgol a su gu sikomar ma ka hu mbassa kaŋgarana.

²⁸ Kulumi suu vi Salomonna col ay ni Egipte u mbassa daŋga daŋga zeɗ zeɗ lay.

Miɗ ma Salomon miɗna

²⁹ Dlara vi Salomon ta nam laɗta col ha hu gijaŋŋa ta ta daɓ maɗta halaŋ ka ɓiiri hu magaara yaɗ ana Sunda vi sa ma jok vun Lona Natan, sa ma jok vun Lona Ahiya ma Silona u dlara tak taɗ ki ii sa ma jok vun Lona Yedorra. Magaara daɓ dagan ndaɗta ka njaɗ Jeroboam ma goŋ Nebatna u mul ma Israelna.

³⁰ Salomon ti mulla hu Yerusalemmi basara dok-fiɗi ni kay suu Israelna u dlasira bella.

³¹ Hu li ma nam miɗna asi pammi eg bum tok. Ni hu ɦoŋzi ma yam ana Ҥoŋzi ma vi Davidnana. Goromma Roboam hin varak balamam a mulna ni namu.