2 DLAŊ MULINARA 8 - Boy Lonana

Sunda Salomon laɗ zeɗ zeɗta

¹ Hu basara dok-mba' ta Salomon ka min Ziŋ Lonara u ziim tambana.

² Nam hin min ɦoŋzi ŋgol ma Hiram ɦamana ki may, hin cuk suu Israelna ha ki huwa.

³ Salomon tuɗ ndug zi ma Hamat-Sobana tlam ki may.

⁴ Nam min mbassa Tadmor ta ŋgoo bagi hu fullara ki u ɦoŋzi ŋgolo ma daŋŋa zeɗ zeɗna nam minim ki hu Hamat lay.

⁵ Nam min Bet-Horon ta kolora u Bet-Horon ta kaŋgara ki halaŋ a ɦoŋzi ma saɓakŋa cocona, gi gulumunna ki kamu dug vun grekŋa ki u cokorom kawina.

⁶ Balat u ɦoŋzi ŋgolo ma daŋŋa zeɗ zeɗ ma nam ŋgay tlesuu tira huna, ɦoŋzi ma cuk pus pus ma kulumina huna u ɦoŋzi ma buu kulumina huna, nam min tlesuu hurum minisina halaŋ hu ɦoŋzi ma Yerusalemma lay. Kolo kay ɦinira Libanda lay, hu mbassa nam ka ti mulla kaɗta halaŋ halaŋ.

⁷ Suu hin ki ka u suu Israelnaɗina ni suu Hitna, suu Amonna, suu Perizna, suu Hivna u suu Jebusna doy hol.

⁸ Duk njaf suu asina goryosi suu hin kana kay Salomon daɓasi ka ki belɗi. Suu asina Salomon tinisi sunda nekka kasi zeɗ zeɗ ta ta cemi asi ka hu tuwa.

⁹ May suu Israelna Salomon ka tinisi hu sunda nek cocoraɗi, nam tinisi ni a suu ŋgolona fok suu duuna, a jaŋ pus pus ma kulumina may a suu jaŋ kulumina hu li duuna may.

¹⁰ Gola ni ndum muli suu ŋgolo suu ka li sunda u Salomon hu ɦoŋzi ma ŋgolonana, asi suu ka fok suu Israelna asina ni 250 ni suu ka gol u sunda fok suu Israelnana.

¹¹ Salomon kal goŋ Farawnda kolo hu Ҥoŋzi Davidna hu zi ma nam miniɗna kaɗna. Kay nam di ana, «Caanda ka ndak a kak hu zi ma vi David mul ma Israelnaɗi, kay ziimma ki ni teteɗ, Zandukka Galamba vi Yawera ay tini ni huwa.»

¹² Hu li namma na gaw ni Salomon li ɓivunna kay givin ma togolla fun Ziŋ Lonara hu li ma nam minim a li ɓivunna maŋ Yawena.

¹³ Ko ndal gaɗta vi Moiz dira na hu buu ma daŋŋa ki zeɗ ma nam ka li ɓivunnana, nam li ɓivunna hu buu ma vi Lonna, hu buuma jewna hu tilna tew tew, hu buuma luu ŋgolo ma lam hindi hu basarana may. Luu ma fu ma bay kuffa, luu ma buuma dok-vadlna u luu ma vun mbutluɓma.

¹⁴ Salomon li ni ko dlara bum David laɗ kara na may, nam tin muli suu li ɓivunna ki hu liisina zeɗ zeɗ halaŋ. Suu vi Levi suu ka ŋga Yawe hu buuna tew tewna u suu ka njun muli suu li ɓivunna hu sundana, suu zii nekka lay, ni ko ndal sunda vi dee taaragelay ta ɦasira ka kosi a asi laɗta na may. Dla ndaɗta David sa ma vi Lonna daɗ ka na ni namu.

¹⁵ Dlara David daɗ kara halaŋ sa ka calaɗ taa kiɗi, kay dla mayra ŋgom begera lay li ni ko nam dira na.

¹⁶ Sunda Salomon saa kaɗ a laɗta li ki wa halaŋ, col ay hu minda nam min tam a min Ziŋ Lonara day ta ta sunda halaŋ daɓ ki u voɗoɗu. Ziŋ Yawera min ki jivi coco ɦay.

¹⁷ Salomon tuɗ hu Esiyon-Geber u Elat vun voona fun mbo lum ŋgol ma hu mbassa Edomba.

¹⁸ Mulna Hiram sunum lum kawina aya, suu jaŋam ayna ni suu Finisina. Asi ni suu wi dla mbo lum ŋgolna cocona. Suu asina mbay ni u suu vi Salomonna usiya. Asi mba tew ki hu Offir. Asi mbaa lorra ay maŋ mulna Salomon nekeɗ ii kelewna va ma 13.000.