2 DLAŊ MULINARA 7 - Boy Lonana

Ɓivun ma lam maŋ Yawena

¹ Hu li ma vun Salomon ma cenda ndi kaŋga may ni, kura col ay kolo huulona mba ŋgal li ma ŋgal ɓivunna u tlesuu ŋgaɗasi a li ɓivunnana ki halaŋ halaŋ. Bibiŋil Yawera oy hu Ziŋ Lonara ki na ndiŋ ndiŋ.

² Muli suu li ɓivunna ka ndak a cuk kalafi hu zira vi Yawera oloɗi kay Bibiŋil Yawera oy huu Ziŋ Lonara ki wa.

³ Suu Israelna halaŋ wi kura ay kolo huulona ndaɗta u Bibiŋil Yawera kolo kay Ziŋ Lonara, asi goɓ kaŋga daɓ vogosi kaŋga duk ndaŋgara, huu kaana kurufu fun Ziŋ Lonara, ŋga Lona di ana, «Kay nam jiviya, ɗegee mamba ha ni na din din.»

⁴ Mulna u suu Israelna halaŋ li ɓivunna fok Yawe.

⁵ Mulna Salomon ŋgaɗ yoori suu ŋgolona a li ɓivunna na 22.000. Yoori suu gorina na 120,000. Mulna u suu Israelna li luu ma mal vun Ziŋ Lonara ni ko ndaɗta na.

⁶ Muli suu li ɓivunna col ki hu liisi ma sunda halaŋ. Njaf suu vi Levina ka u tlesuu bura kosi may a geleɗ Yawera, tle asina lasi ka ni mulna David a geleɗ Yawera ana, «Kay ɗegee mamba ha ni na din din.» Hu li ma David ŋga Lona u tle asina ni muli suu li ɓivunna bu tokolomma gaw may. Suu Israelna halaŋ yow ki kolo u sesiya.

⁷ Salomon li ɓivunna kay li ma kurufu huu taraŋga fun Ziŋ Lonarana ki teteɗ kay ana givin ma togolla ma nam minimma ka ndak a ŋgal tlesuu ɓivunna u mbul ma ŋgalam kay li ma ŋgal ɓivunnaɗi. Nam mbuɗ li ɓivun ma taɓ dukka ki ni huu taraŋga hu li namma.

⁸ Hu coki ndaɗta Salomon li luuna ni buuna kiɗisiya, asi u suu Israelna halaŋ. Hu li namma ni suuna toki ŋgol cocoo, col ay fun mbo lum ma Lebo-Hamatna ta ta tew ay ki vi suu vun lum ma Egiptena.

⁹ Hu buu ma kalavandina ni asi luu ni luu ma ŋgolna, asi li luu ma kay givin ma togolla ni buuna kiɗisiya. Luu ma ŋgolna tamba ni buuna kiɗisiya may.

¹⁰ Ŋgoo dagan buu ma dok-mba' yam hindina hu til ma kiɗisiyana ni mulna njay suu Israelna ki voo. Asi tuɗ vo ni u furira. Hurusi li furira coco kay ana Yawe takasi jivi mamba ki egesi coco ɦay. Tak oo mamba ki kay David, kay Salomon, kay suu mam suu Israelna halaŋ.

Yawe tak tam ii Salomon a mbara

¹¹ Hu li ma Salomon daɓ sun Ziŋ Lonara u zira vi mulnara kina, nam li sunda halaŋ ki u hurum ma haɓma ko nam saa ay kaɗ a laɗta na. Hu Ziŋ Yawera u ziim tambana lay.

¹² Yawe tak tam ki irim duk njeŋgera dam ana, «An humuŋ cen maŋga wa. An man li namma ni an tanda a li ma li ɓivunna.

¹³ Lini an duk huulona ki lo ka siɗi, lini an cuk baa jeena kay mbassa, lini an gi tuguɗi bona kay mbas manda duk suu mansina,

¹⁴ lini suu mansina mba yan sen hu li ma sen ka yii huna, lini asi hoŋ yasi kaŋgaa, lini asi cena, halan a wanu hin dla coosira kiyo ni an ay kolo huulona day ni hin humusi cen masira, an hin bulumusi coosi ndaɗta kiyo, hin suɗusi mbas masira ki may.

¹⁵ Cem wandara irin ki maliya, humun ka tini ta a hum cenda hu li nammara.

¹⁶ Cemi ni an man li namma wa, an mbuɗ ziin ndaɗta ki teteɗ kay sen yi ha huna gak gak. Irin u hurun halaŋ ka cuki kay li namma.

¹⁷ Aŋ may ni lini aŋ tuɗ fokon jivi ko ndal buŋ David lira na, li u dlara an daŋgara halaŋ, aŋ golon gaɗ manda u dlara an miniɗta jivi may ni.

¹⁸ An hin ŋgomoŋ dlam maŋga mulla ha na din din ko an di ay ki fok jew maŋ buŋ Davidta na may ana, Sa ma hu njafaŋŋa hin kak ka mulla kay suu Israelna na gak gak.

¹⁹ Na may lini aŋ taŋga, aŋ hinin gaɗ manda ki mbuɗ iriŋ ki u dlara daŋga, hin dlara an miniɗta kiyo, lini aŋ tuɗ sun ni loogi suu daŋŋa goɓ ga fokosiya,

²⁰ an may ni hin tlaŋ ki kay ndaŋgara an ɦaŋga wandara u ziin mayra an mbuɗuɗ ki teteɗ tin sen huruɗ wanda lay. An hin hin ziin ndaɗta ha ki egen na day. An hin mbuɗuɗ ki ni a njun njunda maŋ suuna halaŋ.

²¹ Ziin mayra dlaɗ ay ŋgol coco ndaɗta, gegelay ma hin jak egeɗna saara cammi na ci, hin di ana Yawe a li na ni dla me eg mbas ndaɗta u Ziŋ Lonara ndaɗta nage?

²² Asi hin hoŋosi dira ni ana, Ni kay asi noy Yawe Lo ma vi somoyosina kira. Nam ma cukusi ay ki hu mbassa Egipterana kay asi pereɗ irisi ki u loogi suu daŋŋa goɓ kaŋga fokosiya ni kay ndaɗta hahawra mba kasi ni na.»