2 DLAŊ MULINARA 6 - Boy Lonana

¹ Salomon hin di ana, «Yawe min a kak hu li ma ndufunna, duk ndufunda.

² An may ni, an miniŋ zira ŋgol cocora ni li ma aŋ hin kak hu a fafaɗtana.»

Bolla paɗaɗ a mal vun Ziŋ Lonara

³ Suu Israelna halaŋ yow ki kolo u sesiya. Salomon pereɗ irim egesi gasi deɓpa.

⁴ Nam hin di ana, «Gi deɓ Yawe Lona vi suu Israelna ma ɓak maŋ bun David u vun tambana ma u kom tamba hin li dla ndaɗta ki mayna.

⁵ Col ay hu buu ma an cuk suu Israelna ay ki hu mbassa Egiptera day ni, an man ɦoŋzi ma ŋgol maa ka duk suu Israelna a min ziinda hu a yan senda tuɗi. An man sa ma daŋ ma a kak mulna kay suu man suu Israelna kaɗi lay.

⁶ Na may an man ɦoŋzi ma Yerusalemma a sen yi huwa. An hin man David a mul ma Israelna fok suu mansina.

⁷ Bun David tin hurum gin a min Ziŋ Lonara a yi sem Yawe, Lona vi suu Israelna, hura.

⁸ Na may Yawe hin di bun David ana, Aŋ tin gin huruŋ a min zira yan sen hura ni aŋ li ni jiviya.

⁹ Na may aŋ ka hin min zi ndaɗta ni aŋgi. Goroŋ ma aŋ vuɗumma hin min zi ndaɗta a yan sen hura ni namu.

¹⁰ Na daŋ may Yawe li dlara nam daɗta ki wa. An varak balam bun David. An kak kay dlamba mulla vi suu Israelna ko ndal Yawe dira na may. An min zi ndaɗta kay a yi sem Yawe, Lona vi suu Israelna, huwa.

¹¹ Cemi an tin Zandukka Galamba ta an fi galamba Yawe vaɗ u suu Israelna hura.»

Cenda Salomon cen Lonara

¹² Salomon col kolo fok givin ma togolla maŋ Yawe huna, ki kolo fok suu Israelna halaŋ, yow kom koloo, cen Lona.

¹³ Salomon dasi asi yoo va ma daŋŋa u kawi ma tlawna, fiyekem meter mba' u nus, hayam meter mba' u nus lay, wulumba kolora meter dew u nus may. Nam tinim duk gayra kurufu hu kaana. Salomon ɗiŋ kolo kay va namma, goɓ kaŋga u vun givim, cena.

¹⁴ Nam di ana, «Yawe, Lona vi suu Israelna, Lo ma ko ndal aŋ na kaɗi, kolo huulona lay, kaŋga kay ndaŋgara lay. Aŋ li u galam maŋga aŋ vaɗ u suu sun maŋsinara, aŋ ka ɗegee u asi tew tew, hu li ma asi ka poy fokoŋ ɗegeena may.

¹⁵ Aŋ li dlara aŋ vi vunuŋ kaɗ u saaŋ ma sunda bun Davidta ki wa. Na daŋ may dlara aŋ dambara aŋ laɗ ki karam u taŋga wa.

¹⁶ Cem wanda, Yawe, Lona vi suu Israelna, li dla mayra aŋ daɗ maŋ saaŋ ma sunda, bun Davidta, hu li ma aŋ dam ana, goroŋ ma aŋ vuɗumma hin kak ka kay dlamba mulla fok suu Israelna, hol ni ko goryoŋ poy jivi, hum u gaɗ manda, ko aŋ poy fokonda na may.

¹⁷ Cem wanda, Yawe, Lona vi suu Israelna, hal u boy ma aŋ dam maŋ saaŋ ma sunda Davidna kiyo.

¹⁸ Na ni gasi Lona ndak a kak ko tam u suuna dew kay ndaŋgara su? Huulona tamba lay ni ka ndak a kakaŋgi, gol ko zi mayra an miniŋga wandara su?

¹⁹ Na may, Yawe, hum cenda vi saaŋ ma sunda haa. Yawe, Loonna, humun tii manna haa. Humun cen manda an ka ceneŋ wanda.

²⁰ Ko iriŋ li ki mali kay ziiŋ ndaɗta faali lay, njeŋge lay kay li ma aŋ di ana aŋ hin tin seŋ huwana. Hum cenda saaŋ ma sunda ka ceneŋ hu li nammara.

²¹ Tin humuŋ na ta hum cenda saaŋ ma sunda u suu Israelna ka ceneŋ ha hu li nammara na humge. Aŋ ay kolo hu li ma aŋ ha kaki huna day ni huma, ha kolo huulona day ni huma, bulumumi coomira kiyo.

²² «Lini sa maa li dla co wa eg ndaram ma vok zina, asi tinim dlara a gi vunna kam wa, nam mba wa a di dla ndaɗta ki fok givin ma togolla maŋŋa fun ziiŋ ndaɗta tani ni,

²³ aŋ ha kolo huulona day ni huma, kaɓakŋa ki duk suu sun maŋsina, kaɓakŋa kay sa ma dlara vamma, hoŋom dlaamba co ndaɗta ni kay duduu yamu. Sa ma ɗegeena aŋ lam dlaamba ni u ɗegee mamba may.

²⁴ «Lini suu maŋ suu Israelna sa ma babali masi maa su kasi wa kay asi li cora egeŋu, lini asi hin wi coosira wa, gijaŋ a geleɗeŋ seŋu, mba ceneŋ goɓ kaŋga fokoŋ hu ziiŋ ndaɗta ni,

²⁵ aŋ hum ha kolo huulona day ni, bulum cora vi suu maŋ suu Israelna kiyo, hoŋosi ay hu mbassa aŋ ɦaɗ ki maŋ somoyosi, hin ɦasira ka wanda.

²⁶ «Hu li ma huulona duk ki wa, lona ka si kay ndaŋgara oloɗi, kay ana suu Israelna laŋ dla cora egeŋu ni, lini asi ceneŋu hoŋ irisi ay hu li namma tani wa, lini asi ka geleɗeŋ seŋu, wi coosira wa kayra aŋ gaɗasira ni,

²⁷ aŋ ay kolo huulona day ni, hum cenda vi suu maŋsina, bulum cora vi suu sun maŋsina suu Israelna kiyo. Aŋ hin takasi voɗta jivira asi a tlaɗta. Si mbona ay kay mbas maŋga, mbas mayra aŋ ɦaɗ maŋ suu maŋsina a jonara.

²⁸ «Hu li ma may ŋgolla ndi kay mbassa wa, tuguɗira cora ndi wa, hu li ma tlena ka ɓeŋ kiyo, hu li ma baa jeena u gi dladlakŋa cuk kay wana, hu li ma suu babali masisina ŋguy yam ɦoŋzi ma kay mbas masirana wa, lini tuguɗi bona lay, lini tuguɗi megelay,

²⁹ cenda sana a ceneɗta u hoŋga sana a hoŋ yam kaŋga hu cendara, col ay ni fun suuna halaŋ ɗowba fun suu Israelna suu maŋsina halaŋ, lini sana tin hurum gasi kay dlara lamba wa, u lassa nam ka lassa, nam yow kom kolo fun zi ndaɗta wa ni,

³⁰ aŋ ay kolo huulona hu li ma aŋ kaki huna day ni, bulum cora kiyo, li sana ni ko poy mamba nam poyra na may, kay ana aŋ wam hurum kiyo. Aŋ dew ni sa ma wi huu suu warna kina.

³¹ Kay ana asi laŋ ndaaraŋu, li u gaɗ maŋga may ta ta hu iiri masira kay ndaŋgara tanira halaŋ.

³² «Lini ŋgayna lay, ma ka njaf suu Israelɗina, lini nam col ay ni hu mbassa dayra lay a mbay fok seŋ ma ŋgol cocona, koŋ ma saɓak cocona u bikiŋ ma ki malina, lini nam mbay a cen hu zi ndaɗta

³³ aŋ ay kolo huulona day hu li ma aŋ kaki huna ni huma, li ko ndal sa ma ŋgay namma joɓoŋga na may. Ni kay ana suu warna hu duliyara halaŋŋi waŋ seŋ kiyo, a asi laŋ ndaaraŋ ko suu maŋ suu Israelna lira na may. A asi wi ki gasi ana seŋ ki yi kay zira an miniɗ wan ndaɗta.

³⁴ «Lini suu maŋsina tuɗ a duu u suu babali masisina hu li ma aŋ gasi irisi huna, lini asi pereɗ irisi ay eg ɦoŋzi ma namma hu li ma aŋ ka huna, hu ɦoŋzi ma aŋ manamma hu zira an miniɗ wandara ni,

³⁵ aŋ ay kolo huulona day ni, humusi cen masira u gira asi gi yasi kaŋga fokoŋga, njunusi asi a fi yasi ki fok suu babali masisina.

³⁶ «Lini asi li suluk egeŋ wa kay sa war ma bay li co kaɗi, huruŋ ɓeŋ ki egesi wa, hinisi ki duk ko suu babali masisina wa, asi su kasi yowosi ha ki mbaɓura hu mbassa dayra ɗowba ta egesi tokka,

³⁷ hu li ma asi ha ki hu mbassa daŋga ŋgayra, asi gijaŋ saara, hom kay dla coosi ndaɗta, ceneŋ ay hu mbassa asi ha ki yowi hu ndaɗta ana, ‹Ami li ni coo, ami ki ni coo comira vami wa.›

³⁸ Lini asi hoŋ ay egeŋ wa u hurusi halaŋ, ay hu mbassa asi yowosi ha ki mbaɓura hura ni, lini asi ceneŋ mbuɗ irisi ay hu mbas masira na, ni mbassa aŋ ɦaɗ ay maŋ somoyosi dayra, hu ɦoŋzi ŋgol ma aŋ manam tin u zira an miniɗ a yaŋ seŋ hu ndaɗta ni,

³⁹ aŋ ay kolo huulona day ni humusi cen masira u hoŋga asi hoŋ yasi kaŋga fokoŋga, ɦasi eŋga a asi fi yasi kira, bulum cora vi suu maŋsina ta asi laɗ egeŋga kiyo.

⁴⁰ «Cem wandara, Loonna, ko iriŋ li ay ki maliya, humuŋ li ay tini a hum cenda suu maŋsina a ceneɗ hu li nammara.

⁴¹ Cem wanda ni Yawe, Loonna, col ay ki koloo, mbay hu liiŋ ma koɗ tara, aŋ u Zandukka saɓak maŋŋa ka hura. Yawe, Lona. Ko muli maŋ suu li ɓivunna suɗ kiyo, ko suu maŋ suu ɗegeena furi hu jivira.

⁴² Yawe, Lona, zuɗ mul maŋŋa aŋ manamma ha kiɗi. Humuŋ gaŋ kay sunda ɗegeera vi saaŋ ma sunda David.»