2 DLAŊ MULINARA 4 - Boy Lonana

¹ Asi yoo givin ma togolla u kawina fiyekem meter doogo, hayammi meter doogo lay, wulum ma kolona ni meter vadl may.

Tassa ŋgol ma mbus zozoɗta kina

² Asi yoo tassa ŋgolna u kawi ma warna, hurumba kurufura ni meter vadl, wulum ma kolona meter mba' u nus, ŋguyumba halaŋga ni meter doogo yam vadl may.

³ Kaŋga u tassana may, kolo funum na may ni, foto bolo mbutlugina ki ndali huwa, meter dew ni foto mbutlugina hu dok-mba', zaraɗasi cukira ni mba' mba'. Tlesuu ndali hu asina yoorosi ay ni ko tasi u tassa namma dew gaw.

⁴ U tassa namma tini kolo ni kay foto bolo mbutlugina doogo yam mba', suu hindi irisi ha pereɗi ii mbayaw na, suu hindi irisi pereɗi ii u fiɗigina na, suu hindi irisi ha pereɗi ii dali na, suu hindi hiniŋŋa irisi pereɗi u maɗiina na may. Ŋgorosi halaŋ colira ni kurufuwa u tassana tini kasiya.

⁵ Tassa namma doɓorok cocoo. Vunum ki ɦarira ko vun ŋgalina na. Gol ko ndal ɓo pafna na. Hurum vo yona ni litir va ma 60,000.

⁶ Nam yoo tassa kawi ma daŋŋa doogo olo, cuk ma vadl bik njuf may, vadl bik gulu may fun Ziŋ Lonara mbus semma. Asi mbus tlesuu li sunda hu li ma ŋgal ɓivunna ni huwa. May ni muli suu li ɓivunna mbus tasi ay ki ni hu tassa ma ŋgolna, yoori u kawi ma tlawna.

Ndum tlesuu yoorosi u kawinana

⁷ Nam yoo va ma tin pindilla kamma doogo ni lorra ko gaɗta dira na. Cuk bik njuf vadl may, cuk bik ma guluna vadl may kurufu kalafi hu Ziŋ Lonara.

⁸ Nam min tabulla doogo cukuɗ kalafi hu Ziŋ Lonara, vadl bik njuf may, vadl bik gulu may. Min kopma na kis may, ni u lorra may.

⁹ Nam hin huu taraŋga muli suu li ɓivunna lak hura li vun grek ma ŋgolna ay hu may, hoo ta cokorom ma duk vunna ki u kawi ma tlawna.

¹⁰ Tassa ma ŋgolna tinimmi bik njuf keŋ Ziŋ Lonara tok eg keŋ ma dali ii u maɗiina nana.

¹¹ Hu li ma Huram min guɓuu mayra cuk buɗna ki minni, min gi pel ma yow lina may, min ŋgali suu yam busuna ki may, nam daɓ sun tlesuu mulna Salomon joɓom ana nam lasiyana ki halaŋ hu Ziŋ Lonara.

¹² Mbal ma fiyekina mba', jumba ay kuluɓi kolo kay mbal nammara mba' may, cil kawi ma daŋŋa ko ndal bayna na mba' baari kay jumba may.

¹³ Foto va ma ko vuɗ grenadinna nana kis kis fiɗi njaɓi eg bay ma dlaŋaɗi kolo kay jumba kuluɓi kay mbalnara, zaraɗam cukira ni mba' eg bay ma dlaŋaɗi eg jumbana u dlamba jakka.

¹⁴ Nam min pus pusna u li ma asi a tin tlena kam huna may.

¹⁵ Tassa ŋgol ma mbus zozoɗta u foto bolo mbutlugina coli um kaŋga doogo yam mba' may.

¹⁶ Guɓuu mayra cuk buɗna u pel ma tok buɗna kina u dew ma mbot tliwna, tlesuu sunda halaŋ suu Huram-Abi lasi a cukusi hu Zira vi Yawera halaŋ u gaɗta vi mulna Salomonni u ɓalaŋ Silikina, weleɗ cocoo.

¹⁷ Nam yoorosi ay ni duk ndaŋgara hu ɦuɗugumba fun mbo lum ma Jurdenna. Duk ɦoŋ ɦoŋzi ma Sukotna u ma Seradatna.

¹⁸ Salomon li tlena ni bolow cocoo. Sa ka ndak a ŋga nek kawi ma nam lasi u nammaɗi.

¹⁹ Salomon min tlesuu daŋŋa u lorra suu ndaki kay a li sunda hu Ziŋ Lonarana. Givin ma togolla ma ŋgal mbul ma his jivina mini ni u lorra, tabul mayra cuk fu ma ɦam ha maŋ Lona kaɗta.

²⁰ Va ma tin pindilla kamma u pindilla taɗta ta ka ŋgaf fun vok zi mayra ki saɓaki teteɗta ko gaɗta dira na, mini ni u lorra jivira.

²¹ Va ma do kura, pindilla, u va ma mboɗ kura ki fun va ma tin pindilla, yoori ni u lor mayra jivira.

²² Tlesuu mbus tlena kina, ŋgal ma yam busuna, koɓiina u ganunna, yoori ni u lorra. Vun Zira vi Lonara u vun grek ma kurufuna ma kal hu Li ma ki Saɓaki Teteɗna u vun zi mayra ŋgolla halaŋŋi u lorra.