2 DLAŊ MULINARA 36 - Boy Lonana

Mulla Joakas taɗta, Joakim u Joakin

¹ Hu Yerusalem suu hu mbassa Yudara man Joakas ma goŋ Josiyasna a varakam mulna balam bumu.

² Joakas kak mulna ni basaɗammi dok-mba' yam hindi. Nam ti mulla hu Yerusalemmi tilna hindi ɦawaa.

³ Neko, mul ma Egiptena, dikim ki hu mulla. Nam tin taara kay mbassa Yudara. Asi ɦam doonora nekeɗ ii kelewna 3,700, ɦam lorra nekeɗ ii kelewna dok-hindi yam kiɗisiya may.

⁴ Mulna Neko man Eliyakim ma wayaŋ Joakasna kakam a mul ma Yudana u Yerusalemma, mbuɗum sem ki ana Joakim, wayamma Joakas nam tuɗum ha ki hu Egipte may.

⁵ Joakim kak mulna na ni basaɗam tew ki na dok-mba' yam vadl. Nam ti mulla hu Yerusalemmi basara doogo yam dew. Nam li ni dlara ka ii Loomma jiviɗira.

⁶ Nabukodonosor, mul ma Babilonna, mba ndugum mbas mamba. Nam ɗag Joakim, tuɗum ki hu mbassa Babilonda.

⁷ Nam yow tlesuu daŋ suu li sunda hu Ziŋ Yawera, tuɗusi ha ki vo hu ziim tamba lay.

⁸ Dlara vi mulna Joakimba ka ɓiiri hu magaara vi muli suu Israelna u suu Yudana. Asi ɓak kay dla coomba nam laɗta u dlara hin mba kamba halaŋ. Goromma, Joakin, varak a mulna balamammi namu.

⁹ Joakin kak mulna na ni basaɗammi kalavandi. Nam ti mulla ni til hindi u buu kayam doogo hu Yerusalem, li dlara ka ii Yawe jiviɗira.

¹⁰ Tew hu vun semeɗna may ni Nabukodonosor, mul ma Babilonna, vammi na gaw, tuɗum ki Babilon, yow tlesuu jivi coco suu hu Ziŋ Lonarana ki lay. Nam man Sedesiyas ma hu deera vi Joakinna kakam a mulma Yerusalem u Yudana.

Mulla Sedesiyas taɗta u tlira tli zi ma Yerusalemma kira

¹¹ Sedesiyas kak mulna na ni basaɗam tew ki ni dok-mba' yam dew. Nam ti mulla hu Yerusalemmi basara doogo yam dew.

¹² Nam li ni dlara ka ii Yawe Loomma jiviɗira, min ka a vi coomba kam fok sa ma jok vun Lona, Jeremiɗi, lay hu li ma Yawe sunum ay egem a ɓakam kay coombana.

¹³ Mulna Nabukodonosor suu tam fokommi u sem Lona. Na may Sedesiyas hin mbuɗ a sa ma babalira u namma. Nam so yam ki ni ka min a hoŋ ay eg Yawe, Lona vi suu Israelnaɗi.

¹⁴ Muli suu ŋgolo suu li ɓivunna u suu halaŋŋa lay cuk tasi hu dla cora ii Lona. Asi li ni dlara suu ka wi Lonaɗina laɗta, mbuɗ Ziŋ Lonara Yawe ɦal tam ki huruɗ hu Yerusalemba ki njenjera.

¹⁵ Yawe, Lo ma vi somoyosina, ma hurum oy u minda coco eg suu mamsina u Ziŋ Lonara layna, cukusi suu vun sunda ay egesi bolow zeɗ zeɗ coco a asi mba ɓakasi dlara nam dasira ayra.

¹⁶ Na may suu Israelna pan suu vun sunda, pan suu jok vun Lona lay, ka min a hum boy ma Yawe dammaɗi ta ta Yawe tak yaamba ki egesiya. Asi ka ndak a suɗ ki ko dlara oloɗi.

¹⁷ Nam min mul ma Babilonna ndugusi mbas masira, ɦasi ki hu duk kom halaŋ. Mul namma ci asgaa suu duuna ki ta ta tew ay ki hu Ziŋ Lonara. Nam ka hin gozoŋgi lay, ka hin go tamaɗi lay, hin sa ŋgolɗi lay, ma maaɗi lay.

¹⁸ Nam yow tlesuu hu Ziŋ Lonarana ki halaŋ halaŋ. Suu ŋgolona u suu gorina lay u begera ka hu Ziŋ Lonara lay ta vi mulnara lay, begera vi suu ŋgolo suu sunda lay. Nam tuɗ tle asina ki hu Babilon bel bel.

¹⁹ Suu Babilonna ŋgal Ziŋ Lonara kiyo, to gulumun ma Yerusalemma ki lay, ŋgal ziŋ mulnana ki lay, ɓalak tlesuu jivi suu hu ɦoŋzi ŋgolnana ki halaŋ.

²⁰ Suu hin iri bay cirana, mul masina tuɗusi ha ki Babilon bel may. Asi mbuɗ ki ni a mborɓii mamsina u gor ŋgologi masisina lay ta ta tew fun lina vi mulla Persa.

²¹ Gola boy ma Yawe dam ay fun sa ma jok vun Lona Jeremina li ki ni ko ndaɗta na, ma di ana, «Mbassa hin hin ki ɦawaa ta ta basara dok-kiɗisiya, ta ta basa mamba koɗ tara daɓ ki tuwa, kay a warak ki ni balam koɗ tara mbassa fi koɗ ta kaɗira ta asi li ka u gaɗtaɗi ndaɗta.»

Sirus ɦal voɗta ana hoŋ min Ziŋ Lonara koloo

²² Hu basara jewra ta Sirus kak a mulna hu Persa gaw ni, Yawe col a li dla mayra nam daɗ ay fun sa ma jok vun Lona, Jeremira, kiyo. Nam kal saara huu mulna Sirus a ɓii boyna ki kay yam mbas mamba halaŋ ko ndal wandara na.

²³ «Gola ni boy ma Sirus, mul ma Persna, damma, Yawe, Lo ma ay kolo huulonna, ɦoŋ yam ndaŋgara ga hu saɓak manna halaŋ. Nam tlan a an minim ziimba hu Yerusalemba, hu mbaassa Yudara. Suu may suu vi Lona suu ka dukugi na halaŋ mba hoŋ vo hu Yerusalem, ko Yawe Loosina li ha u asiya.»