2 DLAŊ MULINARA 35 - Boy Lonana

Josiyas li luu ma vun til Pakŋa

¹ Josiyas li luu ma vun til Pakŋa vi Yawena hu Yerusalem. Asi ŋgaɗ yoori suu Pakŋa ni hu buu ma doogo yam fiɗina hu til ma jewna.

² Nam dliɗ muli suu li ɓivunna kolo hu sun masira hu Ziŋ Lonara. Nam soosi usi a li sunda hu Ziŋ Yawera.

³ Nam di njaf suu vi Levi suu ki a haɗ suu Israelnana suu tasi ki teteɗ maŋ Yawena ana, «Lini agi a tin zandukka kalafi hu Ziŋ Lonara, mulna Salomon ma goŋ Davidna miniɗta ni, ndaɗ ni ka va ma cagi nekgi. Cem wanda agi sunugi ni Yawe Loogina u suu mam suu Israelna.

⁴ Ɓorowogi ii tagi ki u deera, u sun magira magira, ko ndal ka ɓiiri kaŋga duk tlesuu vi mul ma Israelna, David, u goromma, Salomon, wandara na.

⁵ Cologi kurufu hu kaana ni u irigira ki kaay cuɓ cuɓ u deerara, suu a sun suu Israelna ko ɓorowogi irigira agi njaf suu vi Levinara na.

⁶ Ŋgaɗagi Yoori suu Pakŋa, lagi tagi ki teteɗ, njunugi u gorsegina cocoo a li u boy ma vi Yawe ma nam dam ay fun Moizna.»

⁷ Josiyas ɦal yoori suu gorina ha maŋ suuna, gor timigiina u ɦugunina. Ndum tlesuu Pakŋa vi suu moli hu li nammana halaŋŋi ndi na 30,000, mbutlugi suu mulna ɦasi ayna na 3,000 may.

⁸ Suu ŋgolo mamsina ɦal yoori masisina ay maŋ muli suu li ɓivunna u njaf suu vi Levina may, maŋ suu Israelna u suu vi Levina halaŋ, maŋ Hilkiya, Zakari u Yehiyel, suu ŋgolo suu fok suuna hu Ziŋ Lonarana, ɦal timigiina maŋ muli suu li ɓivunna na 2,600 u ɦugunina lay kay a li ɓivun ma Pakŋara, mbutlugina kis kis hindi may.

⁹ Suu ŋgolo suu fok njaf suu vi Levina Konaniya u gorsemma, Semy u Nataneyel, Hasabiya, Yeyel u Yozabad ɦal gor timigiina maŋ suu vi Levina na 5,000 u ɦugunina lay kay a li ɓivun ma Pakŋara, mbutlugina kis kis vadl may.

¹⁰ Gola luu ma Pakŋa li ni ko ndal wandara na, muli suu li ɓivunna njaa hu liisi ma sunda may, njaf suu vi Levina ka irisi ki u deeresi cuɓ cuɓ may, ko gaɗta vi mulna dira na.

¹¹ Suuna gijaŋŋa a ŋgaɗ gor timigii suu Pakŋa u gor ɦugunina gaw may. Asi ɦal busu gor timigiina ay maŋ muli suu li ɓivunna muli suu li ɓivunna vo busuna ha kay li ma ŋgal ɓivunna, njaf suu vi Levina ni suu a zi ɦugunina suu ŋgaɗasi kina may.

¹² Asi col yoo ma li ɓivun ma ŋgolna ki keŋe, ni bolo mbutlna ni ma hin ŋgaɗam a li ɓivun ma ŋgol ma kay suuna belna maŋ Yawera may. Ii suuna ɓorowi ni u deera vi suu Israelnara ko ndal ay ɓiiri hu magaara gaɗta vi Moizza na may.

¹³ Ko asi lira na, asi cuf goo timii ma Pakŋa. Tlesuu ɓivun suu daŋŋa asi zalasi ni zali hu doyogina u tlesuu ɗuu tliwna huna. Asi li zak zak a ɦal tle asina ki maŋ suu Israelnara.

¹⁴ Ŋgoo dagan suu vi Levina li tlena ay maŋ muli suu li ɓivunna, masi tasira lay. Muli suu li ɓivunna suu hu deera vi Aaronda li sunda ta ta fiɗigiya, ni kay a li ɓivun ma ŋgalam ki ŋgalina, ŋgal mbul ma huu ɦugunina ma suuna taaram ayna may. Kay ndaɗta suu vi Levina li tlesuu tira ay ni na.

¹⁵ Dee suu vi Azaf suu gi soolla lak ni hu liisi ma asi lak huna may. U tlege suu bura suu vi David u Azafna, Heman u Yedutum suu ŋgolo suu ɗegee mulnana, suu juɓ vun grekŋa laki hu liisi may. Dukusi ni sa ma jok um ki hin sun mamba kaŋga kaɗi, kay ana dee suu vi levi suu daŋŋa ka yasi funa ay may.

¹⁶ Luuna hu buu namma li ni ko ndaɗta na ni kay a ŋga Yawera. Luu ma Pakŋa u ɓivun ma lam kay givin ma togolla vi Yawena. Ni ko ndal mulna Josiyas dira na.

¹⁷ Ŋgoo dagan luu ma vun til ma Pakŋa ni suu Israel suu ka toki hu li nammana li luu ma fu ma bay kuffa dukumma buuna kiɗisiya olo.

¹⁸ Col ay hu cokira Samuel kara day ni suu Israelna sa bay li luu ma Pakŋa ko ndal luu namma na tuwa, mul ma tin luu ma ko ndal namma na hu Israel ni kaɗi. Josiyas min luu namma ni ko tam u muli suu li ɓivunna, suu vi Levina, suu vo hu Yerusalemma, suu hu mbassa Yudara u suu Israel suu col ay ki keŋŋa may.

¹⁹ Luu ma Pak namma luu ni hu basara doogo yam kalavandi ta Josiyas kak a mulnara.

Mulla vi Josiyassa daɓmi na

²⁰ Hu li ma Josiyas daɓ minda min Ziŋ Lonara kina. Neko, mul ma Egiptena yow ay u suu duu mamsina a tuɗ Karkemis fun mbo lum ma Efratna a tuɗ duuna. Josiyas ka min ana suu Egiptena jak hu voɗ ndaɗtaɗi.

²¹ Neko cuk suu vun sunda ay egem dam ana, «Mul ma Yudana aŋ min a dooron voɗta ni kay mege? An tuɗ ni ka a duu ni u aŋgi ni u suu babali man suu daŋŋa. Lona dan ana an ɓaɗ zak zak. Lona ka u anu, hin dlara aŋ a ci wayra u anda, li ka naɗi ni aŋ duu ni u Lona aŋ hin miɗa.»

²² Na may Josiyas min a duu u Neko ndaa, nam min ka a hum boy ma nam damma aynaɗi. Doli ɗini boy namma col ay ni ko Lona tamba. Nam mbuɗ tam ki zeɗ tuɗ ha ki hu fulla Megidonda a duuna.

²³ Hu li ma asi ka duuna ni sana mun mbuurura ay na ni ndaɗ vamu. Nam di suu sun mamsina ana, «Hoŋon ki dagani, an dagiya.»

²⁴ Suu sun mamsina tlam ay ki hu pus pus ma duuna tani jokom ki hu pus pus ma daŋŋa, hoŋom ay ki vo hu Yerusalem. Nam hin miɗa, hu li ma asi pam hu zulla vi somoyomba ni, suu Yerusalemma u suu hu mbassa Yudara halaŋ tiirimu.

²⁵ Sa ma jok vun Lona, Jeremi, ɓii soolla yoora kay maɗ Josiyas. Col ay hu li namma day ta ta cemi suu gi soolla njufiina u boyogina ka ɓak kay Josiyas, dla ndaɗta mbuɗ ki duk suu Israelna ni dlaasira. Fi boy namma ni hu magra soolla yoora.

²⁶ U dlara vi Josiyas u sun mamba jivi ta nam laɗ u gaɗtara.

²⁷ Boy mamma hu gijaŋŋa ta ta daɓpa daɓ daganda ka ɓiiri hu magaara dlara vi muli suu Israelna u muli suu Yudana.