2 DLAŊ MULINARA 34 - Boy Lonana

Mulla Josiyas taɗta, vira u Lona jok ki zeɗ

¹ Josiyas kak a mulna na ni basaɗam ki ni kalavandi. Nam li mulla hu Yerusalemmi basara dok-hindi yam dew.

² Nam li ni dlara ii Yawe jivira. Nam li dlara ni ko bum ŋgolo David lira na, tli vunum ka ki eg dlara daŋgi.

³ Basara nam laɗ jew kalavandi hu mullara ni hu li ma nam gogoona tuna. Nam vi tam a hal ni minda vi Lo ma vi bum ŋgolo Davidna. Basara dagan fiɗi gaw ni nam gijaŋ a yow tlesuu fuli suu vi suu ɦawana ki hu Yerusalem u mbassa Yudara halaŋ, li ma li tokka vi suu ɦawana, gu ma vi Aserna u njaf ɓivun ma zeɗ zeɗna halaŋ.

⁴ Asi hawaɗ givin ma togolla ma vi Baalna ki ni irim nam coli huwa, to givin ma togolla ma ŋgal mbitla his jivira ki lay, ka gu ma vi Aserna ki lay, to givin ma tokolla ma mini zeɗ zeɗna ki bel bel, to tle asina ki na gelek gelek, cukusi ha ki kay us suu may suu goɓ loogi suu ɦawa asinana.

⁵ Asi ŋgal sok muli suu li ɓivunna vi suu ɦawana ki hu givin ma togolla masi ma asi minimma. Josiyas mbuɗ ɦoŋzi ma Yerusalemma u mbassa Yudara ki teteɗ ni ko ndaɗta na.

⁶ Ŋgoo dagan nam poy ki hu ɦoŋzi ma vi Manasena, vi Efrayimma, vi Simeonna u ma vi Neftalina tuɗ ay ki hu mbassa keŋesi tok tokka lay.

⁷ Nam to givin ma togolla kiyo, kulukusi ki na gelek gelek, gu ma vi Aser na u li ma tokolla, to givin ma togolla ma ŋgal mbitla his jivira ki lay, li ay hu njaf suu ii mbayawna halaŋ. Ŋgoo dagan nam ti mulla ni hu Yerusalem.

Mul ŋgol ma li ɓivunna fi magaara gaɗta ɓiiri hura aya

⁸ Josiyas hu basaɗamba doogo yam kalavandi ta nam kak a mulnara, hu li ma nam mbuɗ mbassa u Ziŋ Lonara ki teteɗna, Josiyas ɦal voɗta maŋ Safan ma goŋ Joakasna, sa ma fun mulnana a asi tuɗ min Ziŋ Lonara ŋgolla Ziŋ Loommara kiyo.

⁹ Suu asina halaŋ tuɗ vi mul ŋgol ma li ɓivunna, Hilkiya. Asi yow gursu ma suu vi Levi suu juɓ vun grekŋa taaramma, ma suuna ɦam a li sunda hu Ziŋ Lonarana aya, ɦammi deera vi Manasera, ta vi Efrayimba u dee suu daŋ suu ay ii mbayawna u suu hu mbassa Yudara, suu Yerusalemma u suu vi Benjaminna.

¹⁰ Asi ɦal gursu namma ko suu ŋgolo suu gol sunda suu ka a ŋgolora hu Ziŋ Lonarana. Asi warak suu ka li sunda a hoŋ min Ziŋ Lonara kina u gursu namma may.

¹¹ Asi ɦal gursura maŋ suu ceɗ guna u suu min ziginina a asi gus ɦinira ceɗira u gu ma li kolo kay yam zirana. A min ii goŋi suu muli suu Yudana hinisi ɓalak kinara may.

¹² Suu sunda li sun masira ki jivi u voɗoɗ ɗegee u suu ŋgolo suu hu njaf ma vi Levi suu ka fokosina, ni gi Yahat u Obadiya. Asi ni hu deera vi Mararira, Zakari u Mesulammi hu deera vi Kehatta may u njaf suu vi Levi suu daŋ suu wi yal bu tlesuu gi soolla.

¹³ Suu vi Levi suu daŋŋa ka a ŋgolora fok suu zi tlena ayna lay. Lini suu may suu ay hu sunda lay, asi golosi ni asiya kay sunda ɓii magaara ni li sunda halaŋ sun ndaɗta ka ni ko dee suu vi Levina.

¹⁴ Hu li ma asi a tli gursura ay ki hu Ziŋ Lonara u zandukkara ni Hilkiya, mul ŋgol ma li ɓivunna fi magaara gaɗta vi Yawera ta nam ɦaɗ ay maŋ Moizza ay kalafiya.

¹⁵ Hilkiya di sa ma ɓii magaara, Safan, ana, «An fi magaara gaɗta ay kalafi hu Ziŋ Lonara.» Hilkiya hin ɦal magaa ndaɗta maŋ Safan.

¹⁶ Safan hin tuɗ magaa ndaɗta ay maŋ mulna hin cuɗum dlara ana, «Dlara aŋ hiniɗ ko suu sun maŋsinara halaŋ ka liya. Asi ka laɗu.

¹⁷ Asi ɦal gursu ma tlam ay hu Ziŋ Lonarana ay wa. Asi hinim ka ko suu ŋgolo suu fok suu li sundana u suu li sunda.»

¹⁸ Ŋgoo dagan sa ma ɓii dlara, Safan, hin di mulna ana, «Mul ŋgol ma li ɓivunna, Hilkiya, ɦan magaara aya.» Safan hin ndum magaa ndaɗta ki fok mulna.

Josiya joɓ cara jok vun Lona, Hulda

¹⁹ Hu li ma mulna hum boy ma hu magaara gaɗta namma na ni, nam haa barawi suu tamma kiyo.

²⁰ Ŋgoo dagan nam hin ɦal voɗta maŋ Hilkiya, maŋ Ahikam, ma goŋ Safanna, maŋ Abdon, ma goŋ Mikana, maŋ sa ma ɓii magaara, Safan, u Azaya, sa ma li sunda vi mulna ana,

²¹ «Tuɗugi joɓogi Yawe kay u suu Israel suu hin ndena kay suu Yudana kay dla magaara gaɗta ta agi faɗ ay wandara kay yara vi Yawera tok kaygi ni ŋgol cocoo, kay ana somoyoygi li ka u gaɗta vi Yaweraɗi, li ka u dlara ɓiiri hu magaa ndaɗtara belɗi.»

²² Hilkiya u suu mulna manasina halaŋ tuɗ vi cara jok vun Lona, Hulda, ni caŋ Salum ma juɓ u barawina, goŋ Tokhatna, goŋ ŋgolo Hasrana. Ca ndaɗta ka cuki ni vo hu Yerusalem hu ɦoŋzi ma wilina. Asi cuɗuɗ boy namma ki jivi may.

²³ Ndaɗ hoŋosi dira ana, «Gola, Yawe, Lo ma vi suu Israelna, ana, tuɗ dagi sa ma cukugi ay egenna ana,

²⁴ Yawe ana an hin mbaa dlara yoora ay kay li namma kay suu hu zi nammana lay, a li ki u givun ma ka hu magaara gaɗta ta agi ndumuɗ fok mulna wandara halaŋ.

²⁵ Kay asi noyon kiyo, hin ŋgal mbitla his jivira ki ni maŋ loogi suu ɦawana. Asi ɓalakan hurun ki u sunda asi laɗ u bik kosira. Yaanda hin ndi kay li namma ni ko ndal kura na ka heɓbi.

²⁶ May ni mul ma Yuda ma sunugi ay a joɓonna, agi dam ana, Yawe, Lo ma vi suu Israelna, di ana, aŋ hum ki jiviya,

²⁷ kay ana boy namma ŋgeneŋ huruŋu. Aŋ hoŋ yaŋ kaŋga fok Lona may hu li ma aŋ hum dla ndaɗtana, aŋ haa barawi maŋsina ki lay, tii taŋ fokon coco lay, an may ni an humuŋ wa. Di ni Yawe, Lona.

²⁸ Gola, an hin taɓaŋ u somoyoŋ suu ŋgolona. Aŋ hin taɓ u asi ni u heɓpa hu zulla may. Iriŋ hin ka a wi dlara hahaw ta an hin a mbaaraɗ kay suu hu li nammanaraɗi.» Suu sunusi hana hoŋ ay cuɗ boy namma maŋ mulna.

Josiyas li galamba u Lona

²⁹ Mulna gi sunda ha maŋ suu ŋgolo suu hu Yudana u suu hu Yerusalemma ana, asi tok ha kaŋgaa.

³⁰ Nam tuɗ kolo hu Ziŋ Lonara u suu Yudana halaŋ u suu hu Yerusalemma halaŋ, muli suu li ɓivunna u njaf suu vi Levina u suu daŋŋa halaŋ suu ŋgolona u kemba. Nam ndumusi boy ma ɓiiri hu magaara gaɗta vi Yawera ki kolo u della eŋga halaŋ. Ni Magaara Galamba ta asi faɗ ay hu Ziŋ Lonarara.

³¹ Mulna kolo coli u colom na ni, suu tam ki fok Yawe a li u gaɗta ɓiiri hu magaara wanda u hurum halaŋ u iiri mamba halaŋ, li u boy ma gaɗta u nera vi Lona damma ma ka ɓiiri hu Magaara Galamba wanna.

³² Nam zuɗ suu hu Yerusalemma u deera vi Benjaminda u suu vo hu Yerusalemma halaŋ a asi li u Galamba vi Lonara, Lo ma vi somoyosina.

³³ Ŋgoo dagani, Josiyas bulum dla cora hu mbassara ki bel bel kay yam mbassa vi suu Israelna. Nam ɦeɓ suu ka hu mbassa Israella halaŋ a sunni Yawe, Loosina. Hu iiri mamba halaŋŋi nam jok hurum ka a hin Yawe, Lo ma vi somoyomma, kiɗi.